៣. សាមញ្ញផលកថាវណ្ណនា

៨៣៥-៨៣៦. ឥទានិ សាមញ្ញផលកថា នាម ហោតិ. តត្ថ មគ្គវីថិយម្បិ ផលសមាបត្តិវីថិយម្បិ អរិយមគ្គស្ស វិបាកចិត្តំ សាមញ្ញផលំ នាមាតិ សកសមយេ សន្និដ្ឋានំ. យេសំ បន តថា អគ្គហេត្វា ‘‘កិលេសបហានញ្ចេវ ផលុប្បត្តិ ច សាមញ្ញផលំ, តស្មា អសង្ខត’’ន្តិ លទ្ធិ, សេយ្យថាបិ បុព្ពសេលិយានំ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស. សេសមេត្ថ ហេដ្ឋា វុត្តនយត្តា យថា បាឡិមេវ និយ្យាតីតិ.

សាមញ្ញផលកថាវណ្ណនា.