៤. បត្តិកថាវណ្ណនា

៨៣៧-៨៤០. ឥទានិ បត្តិកថា នាម ហោតិ. តត្ថ ‘‘យំ យំ បដិលព្ភតិ, តស្ស តស្ស បដិលាភោ បត្តិ នាម. សា ច អសង្ខតា’’តិ យេសំ លទ្ធិ, សេយ្យថាបិ បុព្ពសេលិយានញ្ញេវ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស. សេសមិធាបិ ហេដ្ឋា វុត្តនយត្តា យថាបាឡិមេវ និយ្យាតីតិ. ន វត្តព្ពន្តិអាទិ យាយ លទ្ធិយា បត្តិ អសង្ខតាតិ មញ្ញតិ, តំ បកាសេតុំ វុត្តំ. តត្ថ សកវាទី ‘‘ន ហេវំ វត្តព្ពេ’’តិ បដិក្ខិបន្តោ កេវលំ បត្តិយា រូបាទិភាវំ ន សម្បដិច្ឆតិ. ន ហិ បត្តិ នាម កោចិ ធម្មោ អត្ថិ, ន បន អសង្ខតភាវំ អនុជានាតិ. ឥតរោ បន បដិក្ខេបមត្តេនេវ អសង្ខតាតិ លទ្ធិំ បតិដ្ឋបេតិ, សា អយោនិសោ បតិដ្ឋាបិតត្តា អប្បតិដ្ឋិតាយេវាតិ.

បត្តិកថាវណ្ណនា.