២. ធម្មទេសនាកថាវណ្ណនា

៨០៤-៨០៦. ឥទានិ ធម្មទេសនាកថា នាម ហោតិ. តត្ថ ‘‘តុសិតបុរេ ឋិតោ ភគវា ធម្មទេសនត្ថាយ អភិនិម្មិតំ បេសេសិ, តេន ចេវ តស្ស ច ទេសនំ សម្បដិច្ឆិត្វា អាយស្មតា អានន្ទេន ធម្មោ ទេសិតោ, ន ពុទ្ធេន ភគវតា’’តិ យេសំ លទ្ធិ, សេយ្យថាបិ វេតុល្លកានញ្ញេវ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស. អថ នំ ‘‘យទិ តេន ធម្មោ ទេសិតោ, ស្វេវ សត្ថា ភវេយ្យា’’តិ ចោទេតុំ អភិនិម្មិតោ ជិនោតិអាទិមាហ. ឥតរោ តថា អសម្បដិច្ឆន្តោ បដិក្ខិបតិ. សេសមេត្ថ ឧត្តានត្ថមេវាតិ.

ធម្មទេសនាកថាវណ្ណនា.