៨. ន វត្តព្ពំ សង្ឃោ ភុញ្ជតីតិកថាវណ្ណនា

៧៩៥-៧៩៦. ឥទានិ ន វត្តព្ពំ សង្ឃោ ភុញ្ជតីតិកថា នាម ហោតិ. តត្រាបិ ‘‘មគ្គផលានេវ សង្ឃោ នាម, ន ច តានិ កិញ្ចិ ភុញ្ជន្តិ, តស្មា ន វត្តព្ពំ សង្ឃោ ភុញ្ជតិ, បិវតិ, ខាទតិ, សាយតី’’តិ យេសំ លទ្ធិ, សេយ្យថាបិ តេសំយេវ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស. អថ នំ ‘‘យទិ សង្ឃោ ន ភុញ្ជេយ្យ, សង្ឃភត្តាទិករណំ និរត្ថកំ ភវេយ្យា’’តិ ចោទេតុំ ននុ អត្ថិ កេចិ សង្ឃភត្តានិ ករោន្តីតិអាទិមាហ. គណភោជនន្តិអាទិ ‘‘យទិ សង្ឃោ ន ភុញ្ជេយ្យ, កស្ស គណភោជនាទីនិ សិយុ’’ន្តិ ចោទនត្ថំ វុត្តំ. អដ្ឋ បានានីតិ ឥទម្បិ ‘‘យទិ សង្ឃោ ន បិវេយ្យ, កស្សេតានិ បានានិ សត្ថា អនុជានេយ្យា’’តិ ចោទនត្ថំ វុត្តំ. សេសមិធាបិ ហេដ្ឋា វុត្តនយេនេវ វេទិតព្ពន្តិ.

ន វត្តព្ពំ សង្ឃោ ភុញ្ជតីតិកថាវណ្ណនា.