៦. ន វត្តព្ពំ សង្ឃោ ទក្ខិណំ បដិគ្គណ្ហាតីតិកថាវណ្ណនា

៧៩១-៧៩២. ឥទានិ ន វត្តព្ពំ សង្ឃោ ទក្ខិណំ បដិគ្គណ្ហាតីតិកថា នាម ហោតិ. តត្ថ ‘‘បរមត្ថតោ មគ្គផលានេវ សង្ឃោ, មគ្គផលេហិ អញ្ញោ សង្ឃោ នាម នត្ថិ, មគ្គផលានិ ច ន កិញ្ចិ បដិគ្គណ្ហន្តិ, តស្មា ន វត្តព្ពំ សង្ឃោ ទក្ខិណំ បដិគ្គណ្ហាតី’’តិ យេសំ លទ្ធិ, សេយ្យថាបិ ឯតរហិ មហាបុញ្ញវាទីសង្ខាតានំ វេតុល្លកានំ; តេ សន្ធាយ ន វត្តព្ពន្តិ បុច្ឆា សកវាទិស្ស, បដិញ្ញា ឥតរស្ស. អថ នំ ‘‘យទិ សង្ឃោ ន បដិគ្គណ្ហេយ្យ, ន នំ សត្ថា អាហុនេយ្យាតិអាទីហិ ថោមេយ្យា’’តិ ចោទេតុំ ននុ សង្ឃោ អាហុនេយ្យោតិអាទិមាហ. សង្ឃស្ស ទានំ ទេន្តីតិ ‘‘យេ តេ សង្ឃស្ស ទេន្តិ, តេ បដិគ្គាហកេសុ អសតិ កស្ស ទទេយ្យុ’’ន្តិ ចោទនត្ថំ វុត្តំ. អាហុតិំ ជាតវេទោ វាតិ សុត្តំ បរសមយតោ អាគតំ. តត្ថ មហាមេឃន្តិ មេឃវុដ្ឋិំ សន្ធាយ វុត្តំ. វុដ្ឋិញ្ហិ មេទនី បដិគ្គណ្ហាតិ, ន មេឃមេវ. មគ្គោ បដិគ្គណ្ហាតីតិ ‘‘មគ្គផលានិ សង្ឃោ’’តិ លទ្ធិយា វទតិ, ន ច មគ្គផលានេវ សង្ឃោ. មគ្គផលបាតុភាវបរិសុទ្ធេ បន ខន្ធេ ឧបាទាយ បញ្ញត្តា អដ្ឋ បុគ្គលា សង្ឃោ, តស្មា អសាធកមេតន្តិ.

ន វត្តព្ពំ សង្ឃោ ទក្ខិណំ បដិគ្គណ្ហាតីតិកថាវណ្ណនា.