៦. ជរាមរណកថាវណ្ណនា

៧២៦-៧២៧. ឥទានិ ជរាមរណកថា នាម ហោតិ. តត្ថ ជរាមរណំ នាម អបរិនិប្ផន្នត្តា លោកិយន្តិ វា លោកុត្តរន្តិ វា ន វត្តព្ពំ. ‘‘លោកិយា ធម្មា លោកុត្តរា ធម្មា’’តិ ហិ ទុកេ ជរាមរណំ នេវ លោកិយបទេ, ន លោកុត្តរបទេ និទ្ទិដ្ឋំ. តត្ថ យេសំ ឥមំ លក្ខណំ អនាទិយិត្វា លោកុត្តរានំ ធម្មានំ ជរាមរណំ លោកុត្តរន្តិ លទ្ធិ, សេយ្យថាបិ មហាសង្ឃិកានំ, តេ សន្ធាយ បុច្ឆា សកវាទិស្ស, បដិញ្ញា ឥតរស្ស. សេសមេត្ថ យថាបាឡិមេវ និយ្យាតីតិ.

ជរាមរណកថាវណ្ណនា.