១០. អសញ្ញសត្តុបិកាកថាវណ្ណនា

៧៣៥. ឥទានិ អសញ្ញសត្តុបិកាកថា នាម ហោតិ. តត្ថ សញ្ញាវិរាគវសេន បវត្តភាវនា អសញ្ញសមាបត្តិបិ និរោធសមាបត្តិបិ សញ្ញាវេទយិតនិរោធសមាបត្តិ នាម. ឥតិ ទ្វេ សញ្ញាវេទយិតនិរោធសមាបត្តិយោ លោកិយា ច លោកុត្តរា ច. តត្ថ លោកិយា បុថុជ្ជនស្ស អសញ្ញសត្តុបិកា ហោតិ, លោកុត្តរា អរិយានំ, សា ច នាសញ្ញសត្តុបិកា. ឥមំ បន វិភាគំ អកត្វា អវិសេសេន សញ្ញាវេទយិតនិរោធសមាបត្តិ អសញ្ញសត្តុបិកាតិ យេសំ លទ្ធិ, សេយ្យថាបិ ហេតុវាទានំ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស. អថ នំ យស្មា អសញ្ញសមាបត្តិំ សមាបន្នស្ស អលោភាទយោ អត្ថិ, ន និរោធសមាបត្តិំ, តស្មា តេសំ វសេន ចោទេតុំ អត្ថីតិអាទិមាហ.

៧៣៦. ឥធាបិ អសញ្ញីតិ បញ្ហេ ឥធ សញ្ញាវិរាគវសេន សមាបន្នត្តា អសញ្ញិតា អនុញ្ញាតា, តត្រាបិ អសញ្ញសត្តេនេវ. តស្មា ឥមំ បដិញ្ញំ គហេត្វា លទ្ធិំ បតិដ្ឋបេន្តេន ឆលេន បតិដ្ឋាបិតា ហោតិ. ឥធ វា និរោធសមាបត្តិំ សន្ធាយ អសញ្ញិតា អនុញ្ញាតា. តត្រាបិ ឥតោ ចុតស្ស អនាគាមិនោ និរោធសមាបត្តិមេវ តស្មាបិ ឥមាយ បដិញ្ញាយ បតិដ្ឋាបិតា លទ្ធិ អប្បតិដ្ឋិតាយេវាតិ.

អសញ្ញសត្តុបិកាកថាវណ្ណនា.