៦. បរិយុដ្ឋានំ ចិត្តវិប្បយុត្តន្តិកថាវណ្ណនា

៧០២. ឥទានិ បរិយុដ្ឋានំ ចិត្តវិប្បយុត្តន្តិកថា នាម ហោតិ. តត្ថ យស្មា អនិច្ចាទិតោ មនសិករោតោបិ រាគាទយោ ឧប្បជ្ជន្តិ. វុត្តម្បិ ចេតំ – ‘‘អប្បេកទា, ភោ ភារទ្វាជ, អសុភតោ មនសិករិស្សាមីតិ សុភតោវ មនសិករោតី’’តិ (សំ. និ. ៤.១២៧). តស្មា បរិយុដ្ឋានំ ចិត្តវិប្បយុត្តន្តិ យេសំ លទ្ធិ, សេយ្យថាបិ អន្ធកានំយេវ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស. សេសមេត្ថ ឧត្តានត្ថមេវាតិ.

បរិយុដ្ឋានំ ចិត្តវិប្បយុត្តន្តិកថាវណ្ណនា.