៥. និវុតកថាវណ្ណនា

៦៦៥-៦៦៧. ឥទានិ និវុតកថា នាម ហោតិ. តត្ថ សុទ្ធស្ស សុទ្ធកិច្ចាភាវតោ នីវរណេហិ និវុតោ ឱផុដោ បរិយោនទ្ធោ ច នីវរណំ ជហតីតិ យេសំ លទ្ធិ, សេយ្យថាបិ ឧត្តរាបថកានំ; តេ សន្ធាយ និវុតោតិបុច្ឆា សកវាទិស្ស, បដិញ្ញា ឥតរស្ស. រត្តោ រាគន្តិអាទិ និវុតស្ស នីវរណជហនេ ទោសទស្សនត្ថំ វុត្តំ. បរិសុទ្ធេ បរិយោទាតេតិអាទិ វិក្ខម្ភនវិសុទ្ធិយា វិសុទ្ធស្ស សមុច្ឆេទវិសុទ្ធិទស្សនត្ថំ វុត្តំ. តស្ស ឯវំ ជានតោតិអាទិ ជានតោ បស្សតោ អាសវក្ខយំ ទីបេតិ, ន និវុតស្ស នីវរណជហនំ, តស្មា អសាធកន្តិ.

និវុតកថាវណ្ណនា.