៩. ធម្មដ្ឋិតតាកថាវណ្ណនា

៦២៧. ឥទានិ ធម្មដ្ឋិតតាកថា នាម ហោតិ. តត្ថ ‘‘ឋិតាវ សា ធាតូ’’តិ វចនំ និស្សាយ ‘‘បដិច្ចសមុប្បាទសង្ខាតា ធម្មដ្ឋិតតា នាម ឯកា អត្ថិ, សា ច បរិនិប្ផន្នា’’តិ យេសំ លទ្ធិ, សេយ្យថាបិ អន្ធកានំ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស. អថ នំ ‘‘យទិ បរិនិប្ផន្នានំ អវិជ្ជាទីនំ អញ្ញា ធម្មដ្ឋិតតា នាម បរិនិប្ផន្នា អត្ថិ, តាយបិ ច តេ ធម្មដ្ឋិតតាយ អញ្ញា ឋិតតា បរិនិប្ផន្នា អាបជ្ជតី’’តិ ចោទេតុំ តាយ ឋិតតាតិអាទិមាហ. បរវាទី ឯវរូបាយ លទ្ធិយា អភាវេន បដិក្ខិបតិ. ទុតិយំ បុដ្ឋោ អនន្តរបច្ចយតញ្ចេវ អញ្ញមញ្ញបច្ចយតញ្ច សន្ធាយ បដិជានាតិ. សេសំ ហេដ្ឋា វុត្តនយត្តា ឧត្តានត្ថមេវាតិ.

ធម្មដ្ឋិតតាកថាវណ្ណនា.