១០. វិញ្ញត្តិ សីលន្តិកថាវណ្ណនា

៦០១-៦០២. ឥទានិ វិញ្ញត្តិ សីលន្តិកថា នាម ហោតិ. តត្ថ កាយវិញ្ញត្តិ កាយកម្មំ, វចីវិញ្ញត្តិ វចីកម្មន្តិ គហិតត្តា ‘‘វិញ្ញត្តិ សីល’’ន្តិ យេសំ លទ្ធិ, សេយ្យថាបិ មហាសំឃិកានញ្ចេវ សម្មិតិយានញ្ច; តេ សន្ធាយ វិញ្ញត្តីតិ បុច្ឆា សកវាទិស្ស, បដិញ្ញា ឥតរស្ស. អថ នំ យស្មា សីលំ នាម វិរតិ, ន រូបធម្មោ, តស្មា តេនត្ថេន ចោទេតុំ បាណាតិបាតា វេរមណីតិអាទិមាហ. អភិវាទនំ សីលន្តិអាទិ យថារូបំ វិញ្ញត្តិំ សោ ‘‘សីល’’ន្តិ មញ្ញតិ តំ ឧទ្ធរិត្វា ទស្សេតុំ វុត្តំ. យស្មា បន សា វិរតិ ន ហោតិ, តស្មា បុន បាណាតិបាតាតិអាទិមាហ. លទ្ធិ បនស្ស ឆលេន បតិដ្ឋិតត្តា អប្បតិដ្ឋិតាយេវាតិ.

វិញ្ញត្តិ សីលន្តិកថាវណ្ណនា.