២. អមតារម្មណកថាវណ្ណនា

៥៤៩. ឥទានិ អមតារម្មណកថា នាម ហោតិ. តត្ថ យេសំ ‘‘និព្ពានំ មញ្ញតី’’តិអាទីនំ អយោនិសោ អត្ថំ គហេត្វា អមតារម្មណំ សំយោជនំ ហោតីតិ លទ្ធិ, សេយ្យថាបិ បុព្ពសេលិយានំ, តេ សន្ធាយ បុច្ឆា សកវាទិស្ស, បដិញ្ញា ឥតរស្ស. អថ នំ សចេ អមតារម្មណំ សំយោជនំ, អមតស្ស សំយោជនិយាទិភាវោ អាបជ្ជតីតិ ចោទេតុំ អមតំ សំយោជនិយន្តិអាទិមាហ. ឥតរោ សុត្តវិរោធភយេន សព្ពំ បដិក្ខិបតិ. ឥមិនា ឧបាយេន សព្ពវារេសុ អត្ថោ វេទិតព្ពោ. និព្ពានំ និព្ពានតោតិ អាហដសុត្តំ បន ទិដ្ឋធម្មនិព្ពានំ សន្ធាយ ភាសិតំ, តស្មា អសាធកន្តិ.

អមតារម្មណកថាវណ្ណនា.