១០. បថវីធាតុសនិទស្សនាតិអាទិកថាវណ្ណនា

៤៦៥-៤៧០. ឥទានិ បថវីធាតុ សនិទស្សនាតិអាទិកថា នាម ហោតិ. តត្ថ យេសំ បាសាណឧទកជាលរុក្ខចលនានញ្ចេវ បញ្ចិន្ទ្រិយបតិដ្ឋោកាសានញ្ច វណ្ណាយតនំ កាយវិញ្ញត្តិកាលេ ហត្ថបាទាទិរូបញ្ច ទិស្វា ‘‘បថវីធាតុអាទយោ សនិទស្សនា’’តិ លទ្ធិ, សេយ្យថាបិ អន្ធកានំ; តេ សន្ធាយ សព្ពកថាសុ អាទិបុច្ឆា សកវាទិស្ស, បដិញ្ញា ឥតរស្ស. សេសំ សព្ពត្ថ បាឡិអនុសារេន ចេវ ហេដ្ឋា វុត្តនយេន ច វេទិតព្ពន្តិ. បថវីធាតុ សនិទស្សនាតិ អាទិំ កត្វា កាយកម្មំ សនិទស្សនន្តិ បរិយោសានកថា និដ្ឋិតា.

ឆដ្ឋោ វគ្គោ.