៩. ហេវត្ថិកថាវណ្ណនា

៣០៤. ឥទានិ ហេវត្ថិកថា នាម ហោតិ. តត្ថ យេសំ ‘‘សព្ពេបិ អតីតាទិភេទា ធម្មា រូបាទិវសេន អត្ថិ, អតីតំ អនាគតបច្ចុប្បន្នវសេន, អនាគតបច្ចុប្បន្នានិ វា អតីតាទិវសេន នត្ថិ; តស្មា សព្ពមេវិទំ ឯវំ អត្ថិ ឯវំ នត្ថី’’តិ លទ្ធិ, សេយ្យថាបិ ឯតរហិ វុត្តប្បភេទានំ អន្ធកានំ; តេ សន្ធាយ អតីតំ អត្ថីតិ បុច្ឆា សកវាទិស្ស. ហេវត្ថិ ហេវ នត្ថីតិ វិស្សជ្ជនំ បរវាទិស្ស. តត្ថ ហេវាតិ ឯវំ. អថ នំ សកវាទី ‘‘យទិ អតីតោវ ឯវំ អត្ថិ, ឯវំ នត្ថីតិ លទ្ធិ, ឯវំ សន្តេ សោយេវ អត្ថិ, សោយេវ នត្ថិ នាមា’’តិ បុច្ឆន្តោ សេវត្ថិ, សេវ នត្ថីតិ អាហ. ឥតរោ តេនេវ សភាវេន អត្ថិតំ, តេនេវ នត្ថិតំ សន្ធាយ បដិក្ខិបតិ. ទុតិយំ បុដ្ឋោ សកភាវេនេវ អត្ថិតំ, បរភាវេនេវ នត្ថិតំ សន្ធាយ បដិជានាតិ. តតោ បរំ អត្ថដ្ឋោ នត្ថដ្ឋោតិ អត្ថិសភាវោ នត្ថិសភាវោ នាម ហោតីតិ បុច្ឆតិ. ឥមិនាវុបាយេន សព្ពវារេសុ អត្ថោ វេទិតព្ពោ. បរិយោសានេ បន ‘‘តេន ហិ អតីតំ ហេវត្ថិ, ហេវ នត្ថី’’តិ ច ‘‘តេន ហិ រូបំ ហេវត្ថិ, ហេវ នត្ថី’’តិ ចាតិអាទីនិ វត្វា កិញ្ចាបិ បរវាទិនា លទ្ធិ បតិដ្ឋាបិតា, អយោនិសោ បតិដ្ឋាបិតត្តា បនេសា អប្បតិដ្ឋាបិតាយេវាតិ.

ហេវត្ថិកថាវណ្ណនា.

មហាវគ្គោ និដ្ឋិតោ.