១០. សោតសុត្តវណ្ណនា

១៤០. ទសមេ ទុរុត្តានន្តិ ន សុដ្ឋុ វុត្តានំ ទោសវសេន បវត្តិតានំ ផរុសវចនានំ. ទុរាគតានន្តិ ទុក្ខុប្បាទនាការេន សោតទ្វារំ អាគតានំ. វចនបថានន្តិ វចនានំ. ទុក្ខានន្តិ ទុក្ខមានំ. តិព្ពានន្តិ ពហលានំ តាបនសភាវានំ វា. ខរានន្តិ ផរុសានំ. កដុកានន្តិ តិខិណានំ. អសាតានន្តិ អមធុរានំ. អមនាបានន្តិ មនំ អប្បាយិតុំ វឌ្ឍេតុំ អសមត្ថានំ. បាណហរានន្តិ ជីវិតហរានំ. យា សា ទិសាតិ សព្ពសង្ខារសមថាទិវសេន ទិស្សតិ អបទិស្សតីតិ និព្ពានំ ទិសាតិ វេទិតព្ពំ. យស្មា បន តំ អាគម្ម សព្ពេ សង្ខារា សមថំ គច្ឆន្តិ, តស្មា សព្ពសង្ខារសមថោតិ វុត្តំ. សេសំ សព្ពត្ថ ឧត្តានមេវ. ឥមស្មិំ បន សុត្តេ សីលសមាធិបញ្ញា មិស្សិកា កថិតាតិ.

រាជវគ្គោ ចតុត្ថោ.