១០. កម្ពោជសុត្តវណ្ណនា

៨០. ទសមេ នេវ សភាយំ និសីទតីតិ វិនិច្ឆយករណត្ថំ វិនិច្ឆយសភាយំ នេវ និសីទតិ. ន កម្មន្តំ បយោជេតីតិ កសិវណិជ្ជាទិមហាកម្មន្តំ នប្បយោជេតិ. ន កម្ពោជំ គច្ឆតីតិ ភោគេ សម្ភរណត្ថាយ កម្ពោជរដ្ឋំ ន គច្ឆតិ. ទេសនាមត្តមេវ ចេតំ, យំ កិញ្ចិ តិរោរដ្ឋំ ន គច្ឆតីតិ អត្ថោ. កោធនោតិអាទីសុ កោធនតាយ កោធបរិយុដ្ឋិតោ អត្ថានត្ថំ ន ជានាតិ, ឥស្សុកិតាយ បរសម្បត្តិំ ន សហតិ, មច្ឆរិតាយ ធនំ ទត្វា កិច្ចំ កាតុំ ន សក្កោតិ, និប្បញ្ញតាយ កិច្ចំ សំវិធាតុំ ន សក្កោតិ. តស្មា ឯតានិ សភានិសីទនាទីនិ ន ករោតីតិ.

អបណ្ណកវគ្គោ តតិយោ.