១០. ឧបក្កិលេសសុត្តវណ្ណនា

៥០. ទសមេ ឧបក្កិលេសាតិ វិរោចិតុំ អទត្វា ឧបក្កិលិដ្ឋភាវករណេន ឧបក្កិលេសា. មហិកាតិ ហិមំ. ធូមោ រជោតិ ធូមោ ច រជោ ច. រាហូតិ បុរិមា តយោ អសម្បត្តឧបក្កិលេសា, រាហុ បន សម្បត្តឧបក្កិលេសវសេន កថិតោតិ វេទិតព្ពោ. សមណព្រាហ្មណា ន តបន្តិ ន ភាសន្តិ ន វិរោចន្តីតិ គុណប្បតាបេន ន តបន្តិ, គុណោភាសេន ន ភាសន្តិ, គុណវិរោចនេន ន វិរោចន្តិ. សុរាមេរយបានា អប្បដិវិរតាតិ បញ្ចវិធាយ សុរាយ ចតុព្ពិធស្ស មេរយស្ស ច បានតោ អវិរតា.

អវិជ្ជានិវុតាតិ អវិជ្ជាយ និវារិតា បិហិតា. បិយរូបាភិនន្ទិនោតិ បិយរូបំ សាតរូបំ អភិនន្ទមានា តុស្សមានា. សាទិយន្តីតិ គណ្ហន្តិ. អវិទ្ទសូតិ អន្ធពាលា. សនេត្តិកាតិ តណ្ហាយោត្តេនេវ សយោត្តា. កដសិន្តិ អត្តភាវំ. ឃោរន្តិ កក្ខឡំ. ឥមស្មិំ សុត្តេបិ គាថាសុបិ វដ្ដមេវ កថិតន្តិ.

រោហិតស្សវគ្គោ បញ្ចមោ.