១០. ឧទាយិសុត្តវណ្ណនា

៤០. ទសមេ អភិសង្ខតន្តិ រាសិកតំ. និរារម្ភន្តិ បាណសមារម្ភរហិតំ. យញ្ញន្តិ ទេយ្យធម្មំ. តញ្ហិ យជិតព្ពត្តា យញ្ញន្តិ វុច្ចតិ. កាលេនាតិ យុត្តប្បត្តកាលេន. ឧបសំយន្តីតិ ឧបគច្ឆន្តិ. កុលំ គតិន្តិ វដ្ដកុលញ្ចេវ វដ្ដគតិញ្ច អតិក្កន្តា. យញ្ញស្ស កោវិទាតិ ចតុភូមកយញ្ញេ កុសលា. យញ្ញេតិ បកតិទានេ. សទ្ធេតិ មតកទានេ. ហព្យំ កត្វាតិ ហុនិតព្ពំ ទេយ្យធម្មំ ឧបកប្បេត្វា. សុខេត្តេ ព្រហ្មចារិសូតិ ព្រហ្មចារិសង្ខាតេ សុខេត្តម្ហីតិ អត្ថោ. សុប្បត្តន្តិ សុដ្ឋុ បត្តំ. ទក្ខិណេយ្យេសុ យំ កតន្តិ យំ ទក្ខិណាយ អនុច្ឆវិកេសុ ឧបកប្បិតំ, តំ សុហុតំ សុយិដ្ឋំ សុប្បត្តន្តិ អត្ថោ. សទ្ធោតិ ពុទ្ធធម្មសង្ឃគុណានំ សទ្ទហនតាយ សទ្ធោ. មុត្តេន ចេតសាតិ វិស្សដ្ឋេន ចិត្តេន. ឥមិនាស្ស មុត្តចាគំ ទីបេតីតិ.

ចក្កវគ្គោ ចតុត្ថោ.