៩. ចរិយសុត្តវណ្ណនា

៩. នវមេ លោកំ បាលេន្តីតិ លោកំ សន្ធារេន្តិ ឋបេន្តិ រក្ខន្តិ. នយិធ បញ្ញាយេថ មាតាតិ ឥមស្មិំ លោកេ ជនិកា មាតា ‘‘អយំ មេ មាតា’’តិ គរុចិត្តីការវសេន ន បញ្ញាយេថ. សេសបទេសុបិ ឯសេវ នយោ. សម្ភេទន្តិ សង្ករំ មរិយាទភេទំ វា. យថា អជេឡកាតិអាទីសុ ឯតេ ហិ សត្តា ‘‘អយំ មេ មាតា’’តិ វា ‘‘មាតុច្ឆា’’តិ វា គរុចិត្តីការវសេន ន ជានន្តិ. យំ វត្ថុំ និស្សាយ ឧប្បន្នា, តត្ថេវ វិប្បដិបជ្ជន្តិ. តស្មា ឧបមំ អាហរន្តោ ‘‘យថា អជេឡកា’’តិអាទិមាហ. នវមំ.