(៤) មូលមូលកនយោ

៩៥. (ក) យេ កេចិ នាមា ធម្មា, សព្ពេ តេ នាមមូលមូលកាតិ?

អហេតុកំ នាមំ ន នាមមូលមូលកំ. សហេតុកំ នាមំ នាមមូលមូលកំ.

(ខ) យេ វា បន នាមមូលមូលកា, សព្ពេ តេ ធម្មា នាមាតិ?

នាមសមុដ្ឋានំ រូបំ នាមមូលមូលកំ, ន នាមំ. នាមំ នាមមូលមូលកញ្ចេវ នាមញ្ច.

៩៦. (ក) យេ កេចិ នាមា ធម្មា, សព្ពេ តេ នាមមូលេន ឯកមូលមូលកាតិ?

អហេតុកំ នាមំ នាមមូលេន ន ឯកមូលមូលកំ. សហេតុកំ នាមំ នាមមូលេន ឯកមូលមូលកំ.

(ខ) យេ វា បន នាមមូលេន ឯកមូលមូលកា, សព្ពេ តេ ធម្មា នាមាតិ?

នាមសមុដ្ឋានំ រូបំ នាមមូលេន ឯកមូលមូលកំ, ន នាមំ. នាមំ នាមមូលេន ឯកមូលមូលកញ្ចេវ នាមញ្ច.

៩៧. (ក) យេ កេចិ នាមមូលេន ឯកមូលមូលកា ធម្មា, សព្ពេ តេ នាមមូលេន អញ្ញមញ្ញមូលមូលកាតិ?

មូលានិ យានិ ឯកតោ ឧប្បជ្ជន្តិ នាមមូលានិ ឯកមូលមូលកានិ ចេវ អញ្ញមញ្ញមូលមូលកានិ ច. អវសេសា នាមមូលសហជាតា ធម្មា នាមមូលេន ឯកមូលមូលកា, ន ច អញ្ញមញ្ញមូលមូលកា.

(ខ) យេ វា បន នាមមូលេន អញ្ញមញ្ញមូលមូលកា, សព្ពេ តេ ធម្មា នាមាតិ?

អាមន្តា.

មូលវារនិទ្ទេសោ.