៤. នាមា ធម្មា (១) មូលនយោ
៨៦. (ក) យេ កេចិ នាមា ធម្មា, សព្ពេ តេ នាមមូលាតិ?
នវេវ នាមមូលានិ. អវសេសា នាមា ធម្មា ន នាមមូលា.
(ខ) យេ វា បន នាមមូលា, សព្ពេ តេ ធម្មា នាមាតិ? អាមន្តា.
៨៧. (ក) យេ កេចិ នាមា ធម្មា, សព្ពេ តេ នាមមូលេន ឯកមូលាតិ?
អហេតុកំ នាមំ នាមមូលេន ន ឯកមូលំ. សហេតុកំ នាមំ នាមមូលេន ឯកមូលំ.
(ខ) យេ វា បន នាមមូលេន ឯកមូលា, សព្ពេ តេ ធម្មា នាមាតិ?
នាមសមុដ្ឋានំ រូបំ នាមមូលេន ឯកមូលំ, ន នាមំ. នាមំ នាមមូលេន ឯកមូលញ្ចេវ នាមញ្ច.
៨៨. (ក) យេ កេចិ នាមមូលេន ឯកមូលា ធម្មា, សព្ពេ តេ នាមមូលេន អញ្ញមញ្ញមូលាតិ?
មូលានិ យានិ ឯកតោ ឧប្បជ្ជន្តិ នាមមូលានិ ឯកមូលានិ ចេវ អញ្ញមញ្ញមូលានិ ច. អវសេសា នាមមូលសហជាតា ធម្មា នាមមូលេន ឯកមូលា, ន ច អញ្ញមញ្ញមូលា.
(ខ) យេ វា បន នាមមូលេន អញ្ញមញ្ញមូលា, សព្ពេ តេ ធម្មា នាមាតិ? អាមន្តា.
(២) មូលមូលនយោ
៨៩. (ក) យេ កេចិ នាមា ធម្មា, សព្ពេ តេ នាមមូលមូលាតិ?
នវេវ នាមមូលមូលានិ. អវសេសា នាមា ធម្មា ន នាមមូលមូលា.
(ខ) យេ វា បន នាមមូលមូលា, សព្ពេ តេ ធម្មា នាមាតិ? អាមន្តា.
៩០. (ក) យេ កេចិ នាមា ធម្មា, សព្ពេ តេ នាមមូលេន ឯកមូលមូលាតិ?
អហេតុកំ នាមំ នាមមូលេន ន ឯកមូលមូលំ. សហេតុកំ នាមំ នាមមូលេន ឯកមូលមូលំ.
(ខ) យេ វា បន នាមមូលេន ឯកមូលមូលា, សព្ពេ តេ ធម្មា នាមាតិ?
នាមសមុដ្ឋានំ រូបំ នាមមូលេន ឯកមូលមូលំ, ន នាមំ. នាមំ នាមមូលេន ឯកមូលមូលញ្ចេវ នាមញ្ច.
៩១. (ក) យេ កេចិ នាមមូលេន ឯកមូលមូលា ធម្មា, សព្ពេ តេ នាមមូលេន អញ្ញមញ្ញមូលមូលាតិ?
មូលានិ យានិ ឯកតោ ឧប្បជ្ជន្តិ នាមមូលានិ ឯកមូលមូលានិ ចេវ អញ្ញមញ្ញមូលមូលានិ ច. អវសេសា នាមមូលសហជាតា ធម្មា នាមមូលេន ឯកមូលមូលា, ន ច អញ្ញមញ្ញមូលមូលា.
(ខ) យេ វា បន នាមមូលេន អញ្ញមញ្ញមូលមូលា, សព្ពេ តេ ធម្មា នាមាតិ? អាមន្តា.
(៣) មូលកនយោ
៩២. (ក) យេ កេចិ នាមា ធម្មា, សព្ពេ តេ នាមមូលកាតិ?
អហេតុកំ នាមំ ន នាមមូលកំ. សហេតុកំ នាមំ នាមមូលកំ.
(ខ) យេ វា បន នាមមូលកា, សព្ពេ តេ ធម្មា នាមាតិ?
នាមសមុដ្ឋានំ រូបំ នាមមូលកំ, ន នាមំ. នាមំ នាមមូលកញ្ចេវ នាមញ្ច.
៩៣. (ក) យេ កេចិ នាមា ធម្មា, សព្ពេ តេ នាមមូលេន ឯកមូលកាតិ?
អហេតុកំ នាមំ នាមមូលេន ន ឯកមូលកំ. សហេតុកំ នាមំ នាមមូលេន ឯកមូលកំ.
(ខ) យេ វា បន នាមមូលេន ឯកមូលកា, សព្ពេ តេ ធម្មា នាមាតិ?
នាមសមុដ្ឋានំ រូបំ នាមមូលេន ឯកមូលកំ, ន នាមំ. នាមំ នាមមូលេន ឯកមូលកញ្ចេវ នាមញ្ច.
៩៤. (ក) យេ កេចិ នាមមូលេន ឯកមូលកា ធម្មា, សព្ពេ តេ នាមមូលេន អញ្ញមញ្ញមូលកាតិ?
មូលានិ យានិ ឯកតោ ឧប្បជ្ជន្តិ នាមមូលានិ ឯកមូលកានិ ចេវ អញ្ញមញ្ញមូលកានិ ច. អវសេសា នាមមូលសហជាតា ធម្មា នាមមូលេន ឯកមូលកា, ន ច អញ្ញមញ្ញមូលកា.
(ខ) យេ វា បន នាមមូលេន អញ្ញមញ្ញមូលកា, សព្ពេ តេ ធម្មា នាមាតិ? អាមន្តា.
(៤) មូលមូលកនយោ
៩៥. (ក) យេ កេចិ នាមា ធម្មា, សព្ពេ តេ នាមមូលមូលកាតិ?
អហេតុកំ នាមំ ន នាមមូលមូលកំ. សហេតុកំ នាមំ នាមមូលមូលកំ.
(ខ) យេ វា បន នាមមូលមូលកា, សព្ពេ តេ ធម្មា នាមាតិ?
នាមសមុដ្ឋានំ រូបំ នាមមូលមូលកំ, ន នាមំ. នាមំ នាមមូលមូលកញ្ចេវ នាមញ្ច.
៩៦. (ក) យេ កេចិ នាមា ធម្មា, សព្ពេ តេ នាមមូលេន ឯកមូលមូលកាតិ?
អហេតុកំ នាមំ នាមមូលេន ន ឯកមូលមូលកំ. សហេតុកំ នាមំ នាមមូលេន ឯកមូលមូលកំ.
(ខ) យេ វា បន នាមមូលេន ឯកមូលមូលកា, សព្ពេ តេ ធម្មា នាមាតិ?
នាមសមុដ្ឋានំ រូបំ នាមមូលេន ឯកមូលមូលកំ, ន នាមំ. នាមំ នាមមូលេន ឯកមូលមូលកញ្ចេវ នាមញ្ច.
៩៧. (ក) យេ កេចិ នាមមូលេន ឯកមូលមូលកា ធម្មា, សព្ពេ តេ នាមមូលេន អញ្ញមញ្ញមូលមូលកាតិ?
មូលានិ យានិ ឯកតោ ឧប្បជ្ជន្តិ នាមមូលានិ ឯកមូលមូលកានិ ចេវ អញ្ញមញ្ញមូលមូលកានិ ច. អវសេសា នាមមូលសហជាតា ធម្មា នាមមូលេន ឯកមូលមូលកា, ន ច អញ្ញមញ្ញមូលមូលកា.
(ខ) យេ វា បន នាមមូលេន អញ្ញមញ្ញមូលមូលកា, សព្ពេ តេ ធម្មា នាមាតិ?
អាមន្តា.
មូលវារនិទ្ទេសោ.