នមោ តស្ស ភគវតោ អរហតោ សម្មាសម្ពុទ្ធស្ស

អភិធម្មបិដកេ

យមកបាឡិ (បឋមោ ភាគោ)

១. មូលយមកំ

(ក) ឧទ្ទេសោ

១. មូលវារោ

១. កុសលា ធម្មា

(១) មូលនយោ

១. (ក) យេ កេចិ កុសលា ធម្មា, សព្ពេ តេ កុសលមូលា?

(ខ) យេ វា បន កុសលមូលា, សព្ពេ តេ ធម្មា កុសលា?

២. (ក) យេ កេចិ កុសលា ធម្មា, សព្ពេ តេ កុសលមូលេន ឯកមូលា?

(ខ) យេ វា បន កុសលមូលេន ឯកមូលា, សព្ពេ តេ ធម្មា កុសលា?

៣. (ក) យេ កេចិ កុសលមូលេន ឯកមូលា ធម្មា, សព្ពេ តេ កុសលមូលេន អញ្ញមញ្ញមូលា?

(ខ) យេ វា បន កុសលមូលេន អញ្ញមញ្ញមូលា, សព្ពេ តេ ធម្មា កុសលា?

(២) មូលមូលនយោ

៤. (ក) យេ កេចិ កុសលា ធម្មា, សព្ពេ តេ កុសលមូលមូលា?

(ខ) យេ វា បន កុសលមូលមូលា, សព្ពេ តេ ធម្មា កុសលា?

៥. (ក) យេ កេចិ កុសលា ធម្មា, សព្ពេ តេ កុសលមូលេន ឯកមូលមូលា?

(ខ) យេ វា បន កុសលមូលេន ឯកមូលមូលា, សព្ពេ តេ ធម្មា កុសលា?

៦. (ក) យេ កេចិ កុសលមូលេន ឯកមូលមូលា ធម្មា, សព្ពេ តេ កុសលមូលេន អញ្ញមញ្ញមូលមូលា?

(ខ) យេ វា បន កុសលមូលេន អញ្ញមញ្ញមូលមូលា, សព្ពេ តេ ធម្មា កុសលា?

(៣) មូលកនយោ

៧. (ក) យេ កេចិ កុសលា ធម្មា, សព្ពេ តេ កុសលមូលកា?

(ខ) យេ វា បន កុសលមូលកា, សព្ពេ តេ ធម្មា កុសលា?

៨. (ក) យេ កេចិ កុសលា ធម្មា, សព្ពេ តេ កុសលមូលេន ឯកមូលកា?

(ខ) យេ វា បន កុសលមូលេន ឯកមូលកា, សព្ពេ តេ ធម្មា កុសលា?

៩. (ក) យេ កេចិ កុសលមូលេន ឯកមូលកា ធម្មា, សព្ពេ តេ កុសលមូលេន អញ្ញមញ្ញមូលកា?

(ខ) យេ វា បន កុសលមូលេន អញ្ញមញ្ញមូលកា, សព្ពេ តេ ធម្មា កុសលា?

(៤) មូលមូលកនយោ

១០. (ក) យេ កេចិ កុសលា ធម្មា, សព្ពេ តេ កុសលមូលមូលកា?

(ខ) យេ វា បន កុសលមូលមូលកា, សព្ពេ តេ ធម្មា កុសលា?

១១. (ក) យេ កេចិ កុសលា ធម្មា, សព្ពេ តេ កុសលមូលេន ឯកមូលមូលកា?

(ខ) យេ វា បន កុសលមូលេន ឯកមូលមូលកា, សព្ពេ តេ ធម្មា កុសលា?

១២. (ក) យេ កេចិ កុសលមូលេន ឯកមូលមូលកា ធម្មា, សព្ពេ តេ កុសលមូលេន អញ្ញមញ្ញមូលមូលកា?

(ខ) យេ វា បន កុសលមូលេន អញ្ញមញ្ញមូលមូលកា, សព្ពេ តេ ធម្មា កុសលា?

២. អកុសលា ធម្មា (១) មូលនយោ

១៣. (ក) យេ កេចិ អកុសលា ធម្មា, សព្ពេ តេ អកុសលមូលា?

(ខ) យេ វា បន អកុសលមូលា, សព្ពេ តេ ធម្មា អកុសលា?

១៤. (ក) យេ កេចិ អកុសលា ធម្មា, សព្ពេ តេ អកុសលមូលេន ឯកមូលា?

(ខ) យេ វា បន អកុសលមូលេន ឯកមូលា, សព្ពេ តេ ធម្មា អកុសលា?

១៥. (ក) យេ កេចិ អកុសលមូលេន ឯកមូលា ធម្មា, សព្ពេ តេ អកុសលមូលេន អញ្ញមញ្ញមូលា?

(ខ) យេ វា បន អកុសលមូលេន អញ្ញមញ្ញមូលា, សព្ពេ តេ ធម្មា អកុសលា?

(២) មូលមូលនយោ

១៦. (ក) យេ កេចិ អកុសលា ធម្មា, សព្ពេ តេ អកុសលមូលមូលា?

(ខ) យេ វា បន អកុសលមូលមូលា, សព្ពេ តេ ធម្មា អកុសលា?

១៧. (ក) យេ កេចិ អកុសលា ធម្មា, សព្ពេ តេ អកុសលមូលេន ឯកមូលមូលា?

(ខ) យេ វា បន អកុសលមូលេន ឯកមូលមូលា, សព្ពេ តេ ធម្មា អកុសលា?

១៨. (ក) យេ កេចិ អកុសលមូលេន ឯកមូលមូលា ធម្មា, សព្ពេ តេ អកុសលមូលេន អញ្ញមញ្ញមូលមូលា?

(ខ) យេ វា បន អកុសលមូលេន អញ្ញមញ្ញមូលមូលា, សព្ពេ តេ ធម្មា អកុសលា?

(៣) មូលកនយោ

១៩. (ក) យេ កេចិ អកុសលា ធម្មា, សព្ពេ តេ អកុសលមូលកា?

(ខ) យេ វា បន អកុសលមូលកា, សព្ពេ តេ ធម្មា អកុសលា?

២០. (ក) យេ កេចិ អកុសលា ធម្មា, សព្ពេ តេ អកុសលមូលេន ឯកមូលកា?

(ខ) យេ វា បន អកុសលមូលេន ឯកមូលកា, សព្ពេ តេ ធម្មា អកុសលា?

២១. (ក) យេ កេចិ អកុសលមូលេន ឯកមូលកា ធម្មា, សព្ពេ តេ អកុសលមូលេន អញ្ញមញ្ញមូលកា?

(ខ) យេ វា បន អកុសលមូលេន អញ្ញមញ្ញមូលកា, សព្ពេ តេ ធម្មា អកុសលា?

(៤) មូលមូលកនយោ

២២. (ក) យេ កេចិ អកុសលា ធម្មា, សព្ពេ តេ អកុសលមូលមូលកា?

(ខ) យេ វា បន អកុសលមូលមូលកា, សព្ពេ តេ ធម្មា អកុសលា?

២៣. (ក) យេ កេចិ អកុសលា ធម្មា, សព្ពេ តេ អកុសលមូលេន ឯកមូលមូលកា?

(ខ) យេ វា បន អកុសលមូលេន ឯកមូលមូលកា, សព្ពេ តេ ធម្មា អកុសលា?

២៤. (ក) យេ កេចិ អកុសលមូលេន ឯកមូលមូលកា ធម្មា, សព្ពេ តេ អកុសលមូលេន អញ្ញមញ្ញមូលមូលកា?

(ខ) យេ វា បន អកុសលមូលេន អញ្ញមញ្ញមូលមូលកា, សព្ពេ តេ ធម្មា អកុសលា?

៣. អព្យាកតា ធម្មា (១) មូលនយោ

២៥. (ក) យេ កេចិ អព្យាកតា ធម្មា, សព្ពេ តេ អព្យាកតមូលា?

(ខ) យេ វា បន អព្យាកតមូលា, សព្ពេ តេ ធម្មា អព្យាកតា?

២៦. (ក) យេ កេចិ អព្យាកតា ធម្មា, សព្ពេ តេ អព្យាកតមូលេន ឯកមូលា?

(ខ) យេ វា បន អព្យាកតមូលេន ឯកមូលា, សព្ពេ តេ ធម្មា អព្យាកតា?

២៧. (ក) យេ កេចិ អព្យាកតមូលេន ឯកមូលា ធម្មា, សព្ពេ តេ អព្យាកតមូលេន អញ្ញមញ្ញមូលា?

(ខ) យេ វា បន អព្យាកតមូលេន អញ្ញមញ្ញមូលា, សព្ពេ តេ ធម្មា អព្យាកតា?

(២) មូលមូលនយោ

២៨. (ក) យេ កេចិ អព្យាកតា ធម្មា, សព្ពេ តេ អព្យាកតមូលមូលា?

(ខ) យេ វា បន អព្យាកតមូលមូលា, សព្ពេ តេ ធម្មា អព្យាកតា?

២៩. (ក) យេ កេចិ អព្យាកតា ធម្មា, សព្ពេ តេ អព្យាកតមូលេន ឯកមូលមូលា?

(ខ) យេ វា បន អព្យាកតមូលេន ឯកមូលមូលា, សព្ពេ តេ ធម្មា អព្យាកតា?

៣០. (ក) យេ កេចិ អព្យាកតមូលេន ឯកមូលមូលា ធម្មា, សព្ពេ តេ អព្យាកតមូលេន អញ្ញមញ្ញមូលមូលា?

(ខ) យេ វា បន អព្យាកតមូលេន អញ្ញមញ្ញមូលមូលា, សព្ពេ តេ ធម្មា អព្យាកតា?

(៣) មូលកនយោ

៣១. (ក) យេ កេចិ អព្យាកតា ធម្មា, សព្ពេ តេ អព្យាកតមូលកា?

(ខ) យេ វា បន អព្យាកតមូលកា, សព្ពេ តេ ធម្មា អព្យាកតា?

៣២. (ក) យេ កេចិ អព្យាកតា ធម្មា, សព្ពេ តេ អព្យាកតមូលេន ឯកមូលកា?

(ខ) យេ វា បន អព្យាកតមូលេន ឯកមូលកា, សព្ពេ តេ ធម្មា អព្យាកតា?

៣៣. (ក) យេ កេចិ អព្យាកតមូលេន ឯកមូលកា ធម្មា, សព្ពេ តេ អព្យាកតមូលេន អញ្ញមញ្ញមូលកា?

(ខ) យេ វា បន អព្យាកតមូលេន អញ្ញមញ្ញមូលកា, សព្ពេ តេ ធម្មា អព្យាកតា?

(៤) មូលមូលកនយោ

៣៤. (ក) យេ កេចិ អព្យាកតា ធម្មា, សព្ពេ តេ អព្យាកតមូលមូលកា?

(ខ) យេ វា បន អព្យាកតមូលមូលកា, សព្ពេ តេ ធម្មា អព្យាកតា?

៣៥. (ក) យេ កេចិ អព្យាកតា ធម្មា, សព្ពេ តេ អព្យាកតមូលេន ឯកមូលមូលកា?

(ខ) យេ វា បន អព្យាកតមូលេន ឯកមូលមូលកា, សព្ពេ តេ ធម្មា អព្យាកតា?

៣៦. (ក) យេ កេចិ អព្យាកតមូលេន ឯកមូលមូលកា ធម្មា, សព្ពេ តេ អព្យាកតមូលេន អញ្ញមញ្ញមូលមូលកា?

(ខ) យេ វា បន អព្យាកតមូលេន អញ្ញមញ្ញមូលមូលកា, សព្ពេ តេ ធម្មា អព្យាកតា?

៤. នាមា ធម្មា (១) មូលនយោ

៣៧. (ក) យេ កេចិ នាមា ធម្មា, សព្ពេ តេ នាមមូលា?

(ខ) យេ វា បន នាមមូលា, សព្ពេ តេ ធម្មា នាមា?

៣៨. (ក) យេ កេចិ នាមា ធម្មា, សព្ពេ តេ នាមមូលេន ឯកមូលា?

(ខ) យេ វា បន នាមមូលេន ឯកមូលា, សព្ពេ តេ ធម្មា នាមា?

៣៩. (ក) យេ កេចិ នាមមូលេន ឯកមូលា ធម្មា, សព្ពេ តេ នាមមូលេន អញ្ញមញ្ញមូលា?

(ខ) យេ វា បន នាមមូលេន អញ្ញមញ្ញមូលា, សព្ពេ តេ ធម្មា នាមា?

(២) មូលមូលនយោ

៤០. (ក) យេ កេចិ នាមា ធម្មា, សព្ពេ តេ នាមមូលមូលា?

(ខ) យេ វា បន នាមមូលមូលា, សព្ពេ តេ ធម្មា នាមា?

៤១. (ក) យេ កេចិ នាមា ធម្មា, សព្ពេ តេ នាមមូលេន ឯកមូលមូលា?

(ខ) យេ វា បន នាមមូលេន ឯកមូលមូលា, សព្ពេ តេ ធម្មា នាមា?

៤២. (ក) យេ កេចិ នាមមូលេន ឯកមូលមូលា ធម្មា, សព្ពេ តេ នាមមូលេន អញ្ញមញ្ញមូលមូលា?

(ខ) យេ វា បន នាមមូលេន អញ្ញមញ្ញមូលមូលា, សព្ពេ តេ ធម្មា នាមា?

(៣) មូលកនយោ

៤៣. (ក) យេ កេចិ នាមា ធម្មា, សព្ពេ តេ នាមមូលកា?

(ខ) យេ វា បន នាមមូលកា, សព្ពេ តេ ធម្មា នាមា?

៤៤. (ក) យេ កេចិ នាមា ធម្មា, សព្ពេ តេ នាមមូលេន ឯកមូលកា?

(ខ) យេ វា បន នាមមូលេន ឯកមូលកា, សព្ពេ តេ ធម្មា នាមា?

៤៥. (ក) យេ កេចិ នាមមូលេន ឯកមូលកា ធម្មា, សព្ពេ តេ នាមមូលេន អញ្ញមញ្ញមូលកា?

(ខ) យេ វា បន នាមមូលេន អញ្ញមញ្ញមូលកា, សព្ពេ តេ ធម្មា នាមា?

(៤) មូលមូលកនយោ

៤៦. (ក) យេ កេចិ នាមា ធម្មា, សព្ពេ តេ នាមមូលមូលកា?

(ខ) យេ វា បន នាមមូលមូលកា, សព្ពេ តេ ធម្មា នាមា?

៤៧. (ក) យេ កេចិ នាមា ធម្មា, សព្ពេ តេ នាមមូលេន ឯកមូលមូលកា?

(ខ) យេ វា បន នាមមូលេន ឯកមូលមូលកា, សព្ពេ តេ ធម្មា នាមា?

៤៨. (ក) យេ កេចិ នាមមូលេន ឯកមូលមូលកា ធម្មា, សព្ពេ តេ នាមមូលេន អញ្ញមញ្ញមូលមូលកា?

(ខ) យេ វា បន នាមមូលេន អញ្ញមញ្ញមូលមូលកា, សព្ពេ តេ ធម្មា នាមា?

មូលវារឧទ្ទេសោ.

២-១០. ហេតុវារាទិ

៤៩. យេ កេចិ កុសលា ធម្មា, សព្ពេ តេ កុសលហេតូ…បេ… កុសលនិទានា…បេ… កុសលសម្ភវា…បេ… កុសលប្បភវា…បេ… កុសលសមុដ្ឋានា…បេ… កុសលាហារា…បេ… កុសលារម្មណា…បេ… កុសលបច្ចយា…បេ… កុសលសមុទយា…បេ….

មូលំ ហេតុ និទានញ្ច, សម្ភវោ បភវេន ច;

សមុដ្ឋានាហារារម្មណា [សមុដ្ឋានាហារារម្មណំ (ក.)], បច្ចយោ សមុទយេន ចាតិ.

ឧទ្ទេសវារោ និដ្ឋិតោ.

(ខ) និទ្ទេសោ

១. មូលវារោ

១. កុសលា ធម្មា (១) មូលនយោ

៥០. (ក) យេ កេចិ កុសលា ធម្មា, សព្ពេ តេ កុសលមូលាតិ? តីណេវ កុសលមូលានិ. អវសេសា កុសលា ធម្មា ន កុសលមូលា.

(ខ) យេ វា បន កុសលមូលា, សព្ពេ តេ ធម្មា កុសលាតិ? អាមន្តា.

៥១. (ក) យេ កេចិ កុសលា ធម្មា, សព្ពេ តេ កុសលមូលេន ឯកមូលាតិ? អាមន្តា.

(ខ) យេ វា បន កុសលមូលេន ឯកមូលា, សព្ពេ តេ ធម្មា កុសលាតិ?

កុសលសមុដ្ឋានំ រូបំ កុសលមូលេន ឯកមូលំ, ន កុសលំ. កុសលំ កុសលមូលេន ឯកមូលញ្ចេវ កុសលញ្ច.

៥២. (ក) យេ កេចិ កុសលមូលេន ឯកមូលា ធម្មា, សព្ពេ តេ កុសលមូលេន អញ្ញមញ្ញមូលាតិ?

មូលានិ យានិ ឯកតោ ឧប្បជ្ជន្តិ កុសលមូលានិ ឯកមូលានិ ចេវ អញ្ញមញ្ញមូលានិ ច. អវសេសា កុសលមូលសហជាតា ធម្មា កុសលមូលេន ឯកមូលា, ន ច អញ្ញមញ្ញមូលា.

(ខ) យេ វា បន កុសលមូលេន អញ្ញមញ្ញមូលា, សព្ពេ តេ ធម្មា កុសលាតិ? អាមន្តា.

(២) មូលមូលនយោ

៥៣. (ក) យេ កេចិ កុសលា ធម្មា, សព្ពេ តេ កុសលមូលមូលាតិ? តីណេវ កុសលមូលមូលានិ. អវសេសា កុសលា ធម្មា ន កុសលមូលមូលា.

(ខ) យេ វា បន កុសលមូលមូលា, សព្ពេ តេ ធម្មា កុសលាតិ? អាមន្តា.

៥៤. (ក) យេ កេចិ កុសលា ធម្មា, សព្ពេ តេ កុសលមូលេន ឯកមូលមូលាតិ? អាមន្តា.

(ខ) យេ វា បន កុសលមូលេន ឯកមូលមូលា, សព្ពេ តេ ធម្មា កុសលាតិ?

កុសលសមុដ្ឋានំ រូបំ កុសលមូលេន ឯកមូលមូលំ, ន កុសលំ. កុសលំ កុសលមូលេន ឯកមូលមូលញ្ចេវ កុសលញ្ច.

៥៥. (ក) យេ កេចិ កុសលមូលេន ឯកមូលមូលា ធម្មា, សព្ពេ តេ កុសលមូលេន អញ្ញមញ្ញមូលមូលាតិ?

មូលានិ យានិ ឯកតោ ឧប្បជ្ជន្តិ កុសលមូលានិ ឯកមូលមូលានិ ចេវ អញ្ញមញ្ញមូលមូលានិ ច. អវសេសា កុសលមូលសហជាតា ធម្មា កុសលមូលេន ឯកមូលមូលា, ន ច អញ្ញមញ្ញមូលមូលា.

(ខ) យេ វា បន កុសលមូលេន អញ្ញមញ្ញមូលមូលា, សព្ពេ តេ ធម្មា កុសលាតិ? អាមន្តា.

(៣) មូលកនយោ

៥៦. (ក) យេ កេចិ កុសលា ធម្មា, សព្ពេ តេ កុសលមូលកាតិ? អាមន្តា.

(ខ) យេ វា បន កុសលមូលកា, សព្ពេ តេ ធម្មា កុសលាតិ?

កុសលសមុដ្ឋានំ រូបំ កុសលមូលកំ ន កុសលំ. កុសលំ កុសលមូលកញ្ចេវ កុសលញ្ច.

៥៧. (ក) យេ កេចិ កុសលា ធម្មា, សព្ពេ តេ កុសលមូលេន ឯកមូលកាតិ? អាមន្តា.