(៣) មូលកនយោ

៩២. (ក) យេ កេចិ នាមា ធម្មា, សព្ពេ តេ នាមមូលកាតិ?

អហេតុកំ នាមំ ន នាមមូលកំ. សហេតុកំ នាមំ នាមមូលកំ.

(ខ) យេ វា បន នាមមូលកា, សព្ពេ តេ ធម្មា នាមាតិ?

នាមសមុដ្ឋានំ រូបំ នាមមូលកំ, ន នាមំ. នាមំ នាមមូលកញ្ចេវ នាមញ្ច.

៩៣. (ក) យេ កេចិ នាមា ធម្មា, សព្ពេ តេ នាមមូលេន ឯកមូលកាតិ?

អហេតុកំ នាមំ នាមមូលេន ន ឯកមូលកំ. សហេតុកំ នាមំ នាមមូលេន ឯកមូលកំ.

(ខ) យេ វា បន នាមមូលេន ឯកមូលកា, សព្ពេ តេ ធម្មា នាមាតិ?

នាមសមុដ្ឋានំ រូបំ នាមមូលេន ឯកមូលកំ, ន នាមំ. នាមំ នាមមូលេន ឯកមូលកញ្ចេវ នាមញ្ច.

៩៤. (ក) យេ កេចិ នាមមូលេន ឯកមូលកា ធម្មា, សព្ពេ តេ នាមមូលេន អញ្ញមញ្ញមូលកាតិ?

មូលានិ យានិ ឯកតោ ឧប្បជ្ជន្តិ នាមមូលានិ ឯកមូលកានិ ចេវ អញ្ញមញ្ញមូលកានិ ច. អវសេសា នាមមូលសហជាតា ធម្មា នាមមូលេន ឯកមូលកា, ន ច អញ្ញមញ្ញមូលកា.

(ខ) យេ វា បន នាមមូលេន អញ្ញមញ្ញមូលកា, សព្ពេ តេ ធម្មា នាមាតិ? អាមន្តា.