៩. ទិដ្ឋសុតាទិទស្សនវារោ

១០៣៦. បញ្ចន្នំ ខន្ធានំ កតិ ទិដ្ឋា, កតិ សុតា, កតិ មុតា, កតិ វិញ្ញាតា, កតិ ន ទិដ្ឋា ន សុតា ន មុតា ន វិញ្ញាតា…បេ… សត្តន្នំ ចិត្តានំ កតិ ទិដ្ឋា, កតិ សុតា, កតិ មុតា, កតិ វិញ្ញាតា, កតិ ន ទិដ្ឋា ន សុតា ន មុតា ន វិញ្ញាតា?

១០៣៧. រូបក្ខន្ធោ សិយា ទិដ្ឋោ, សិយា សុតោ, សិយា មុតោ, សិយា វិញ្ញាតោ, សិយា ន ទិដ្ឋោ ន សុតោ ន មុតោ, វិញ្ញាតោ. ចត្តារោ ខន្ធា ន ទិដ្ឋា ន សុតា ន មុតា, វិញ្ញាតា.

រូបាយតនំ ទិដ្ឋំ, ន សុតំ ន មុតំ, វិញ្ញាតំ. សទ្ទាយតនំ ន ទិដ្ឋំ, សុតំ, ន មុតំ, វិញ្ញាតំ. គន្ធាយតនំ… រសាយតនំ… ផោដ្ឋព្ពាយតនំ ន ទិដ្ឋំ ន សុតំ, មុតំ, វិញ្ញាតំ. សត្តាយតនា ន ទិដ្ឋា ន សុតា ន មុតា, វិញ្ញាតា.

រូបធាតុ ទិដ្ឋា, ន សុតា ន មុតា, វិញ្ញាតា. សទ្ទធាតុ ន ទិដ្ឋា, សុតា, ន មុតា, វិញ្ញាតា. គន្ធធាតុ… រសធាតុ… ផោដ្ឋព្ពធាតុ ន ទិដ្ឋា ន សុតា, មុតា, វិញ្ញាតា. តេរស ធាតុយោ ន ទិដ្ឋា ន សុតា ន មុតា, វិញ្ញាតា.

តីណិ សច្ចានិ ន ទិដ្ឋា ន សុតា ន មុតា, វិញ្ញាតា. ទុក្ខសច្ចំ សិយា ទិដ្ឋំ, សិយា សុតំ, សិយា មុតំ, សិយា វិញ្ញាតំ, សិយា ន ទិដ្ឋំ ន សុតំ ន មុតំ, វិញ្ញាតំ.

ពាវីសតិន្ទ្រិយា ន ទិដ្ឋា ន សុតា ន មុតា, វិញ្ញាតា. នវ ហេតូ ន ទិដ្ឋា ន សុតា ន មុតា, វិញ្ញាតា. ចត្តារោ អាហារា ន ទិដ្ឋា ន សុតា ន មុតា, វិញ្ញាតា. សត្ត ផស្សា ន ទិដ្ឋា ន សុតា ន មុតា, វិញ្ញាតា. សត្ត វេទនា… សត្ត សញ្ញា… សត្ត ចេតនា… សត្ត ចិត្តា ន ទិដ្ឋា ន សុតា ន មុតា, វិញ្ញាតា.