១០. តិកាទិទស្សនវារោ

១. កុសលត្តិកំ

១០៣៨. បញ្ចន្នំ ខន្ធានំ កតិ កុសលា, កតិ អកុសលា, កតិ អព្យាកតា…បេ… សត្តន្នំ ចិត្តានំ កតិ កុសលា, កតិ អកុសលា, កតិ អព្យាកតា?

រូបក្ខន្ធោ អព្យាកតោ. ចត្តារោ ខន្ធា សិយា កុសលា, សិយា អកុសលា, សិយា អព្យាកតា. ទសាយតនា អព្យាកតា. ទ្វាយតនា សិយា កុសលា, សិយា អកុសលា, សិយា អព្យាកតា. សោឡស ធាតុយោ អព្យាកតា. ទ្វេ ធាតុយោ សិយា កុសលា, សិយា អកុសលា, សិយា អព្យាកតា. សមុទយសច្ចំ អកុសលំ. មគ្គសច្ចំ កុសលំ. និរោធសច្ចំ អព្យាកតំ. ទុក្ខសច្ចំ សិយា កុសលំ, សិយា អកុសលំ, សិយា អព្យាកតំ.

ទសិន្ទ្រិយា អព្យាកតា. ទោមនស្សិន្ទ្រិយំ អកុសលំ. អនញ្ញាតញ្ញស្សាមីតិន្ទ្រិយំ កុសលំ. ចត្តារិន្ទ្រិយា សិយា កុសលា, សិយា អព្យាកតា. ឆ ឥន្ទ្រិយា សិយា កុសលា, សិយា អកុសលា, សិយា អព្យាកតា.

តយោ កុសលហេតូ កុសលា. តយោ អកុសលហេតូ អកុសលា. តយោ អព្យាកតហេតូ អព្យាកតា. កពឡីការោ អាហារោ អព្យាកតោ. តយោ អាហារា សិយា កុសលា, សិយា អកុសលា, សិយា អព្យាកតា. ឆ ផស្សា អព្យាកតា. មនោវិញ្ញាណធាតុសម្ផស្សោ សិយា កុសលោ, សិយា អកុសលោ, សិយា អព្យាកតោ. ឆ វេទនា… ឆ សញ្ញា… ឆ ចេតនា… ឆ ចិត្តា អព្យាកតា. មនោវិញ្ញាណធាតុ សិយា កុសលា, សិយា អកុសលា, សិយា អព្យាកតា.

២. វេទនាតិកំ

១០៣៩. បញ្ចន្នំ ខន្ធានំ កតិ សុខាយ វេទនាយ សម្បយុត្តា, កតិ ទុក្ខាយ វេទនាយ សម្បយុត្តា, កតិ អទុក្ខមសុខាយ វេទនាយ សម្បយុត្តា…បេ… សត្តន្នំ ចិត្តានំ កតិ សុខាយ វេទនាយ សម្បយុត្តា, កតិ ទុក្ខាយ វេទនាយ សម្បយុត្តា, កតិ អទុក្ខមសុខាយ វេទនាយ សម្បយុត្តា?

ទ្វេ ខន្ធា ន វត្តព្ពា សុខាយ វេទនាយ សម្បយុត្តាតិបិ, ទុក្ខាយ វេទនាយ សម្បយុត្តាតិបិ, អទុក្ខមសុខាយ វេទនាយ សម្បយុត្តាតិបិ. តយោ ខន្ធា សិយា សុខាយ វេទនាយ សម្បយុត្តា, សិយា ទុក្ខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា.

ទសាយតនា ន វត្តព្ពា សុខាយ វេទនាយ សម្បយុត្តាតិបិ, ទុក្ខាយ វេទនាយ សម្បយុត្តាតិបិ, អទុក្ខមសុខាយ វេទនាយ សម្បយុត្តាតិបិ. មនាយតនំ សិយា សុខាយ វេទនាយ សម្បយុត្តំ, សិយា ទុក្ខាយ វេទនាយ សម្បយុត្តំ, សិយា អទុក្ខមសុខាយ វេទនាយ សម្បយុត្តំ. ធម្មាយតនំ សិយា សុខាយ វេទនាយ សម្បយុត្តំ, សិយា ទុក្ខាយ វេទនាយ សម្បយុត្តំ, សិយា អទុក្ខមសុខាយ វេទនាយ សម្បយុត្តំ, សិយា ន វត្តព្ពំ សុខាយ វេទនាយ សម្បយុត្តន្តិបិ, ទុក្ខាយ វេទនាយ សម្បយុត្តន្តិបិ, អទុក្ខមសុខាយ វេទនាយ សម្បយុត្តន្តិបិ.

ទស ធាតុយោ ន វត្តព្ពា សុខាយ វេទនាយ សម្បយុត្តាតិបិ, ទុក្ខាយ វេទនាយ សម្បយុត្តាតិបិ, អទុក្ខមសុខាយ វេទនាយ សម្បយុត្តាតិបិ. បញ្ច ធាតុយោ អទុក្ខមសុខាយ វេទនាយ សម្បយុត្តា, កាយវិញ្ញាណធាតុ សិយា សុខាយ វេទនាយ សម្បយុត្តា, សិយា ទុក្ខាយ វេទនាយ សម្បយុត្តា. មនោវិញ្ញាណធាតុ សិយា សុខាយ វេទនាយ សម្បយុត្តា, សិយា ទុក្ខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា. ធម្មធាតុ សិយា សុខាយ វេទនាយ សម្បយុត្តា, សិយា ទុក្ខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា, សិយា ន វត្តព្ពា សុខាយ វេទនាយ សម្បយុត្តាតិបិ, ទុក្ខាយ វេទនាយ សម្បយុត្តាតិបិ, អទុក្ខមសុខាយ វេទនាយ សម្បយុត្តាតិបិ.

ទ្វេ សច្ចា សិយា សុខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា. និរោធសច្ចំ ន វត្តព្ពំ សុខាយ វេទនាយ សម្បយុត្តន្តិបិ, ទុក្ខាយ វេទនាយ សម្បយុត្តន្តិបិ, អទុក្ខមសុខាយ វេទនាយ សម្បយុត្តន្តិបិ. ទុក្ខសច្ចំ សិយា សុខាយ វេទនាយ សម្បយុត្តំ, សិយា ទុក្ខាយ វេទនាយ សម្បយុត្តំ, សិយា អទុក្ខមសុខាយ វេទនាយ សម្បយុត្តំ, សិយា ន វត្តព្ពំ សុខាយ វេទនាយ សម្បយុត្តន្តិបិ, ទុក្ខាយ វេទនាយ សម្បយុត្តន្តិបិ, អទុក្ខមសុខាយ វេទនាយ សម្បយុត្តន្តិបិ.

ទ្វាទសិន្ទ្រិយា ន វត្តព្ពា សុខាយ វេទនាយ សម្បយុត្តាតិបិ, ទុក្ខាយ វេទនាយ សម្បយុត្តាតិបិ, អទុក្ខមសុខាយ វេទនាយ សម្បយុត្តាតិបិ. ឆ ឥន្ទ្រិយា សិយា សុខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា. តីណិន្ទ្រិយា សិយា សុខាយ វេទនាយ សម្បយុត្តា, សិយា ទុក្ខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា. ជីវិតិន្ទ្រិយំ សិយា សុខាយ វេទនាយ សម្បយុត្តំ, សិយា ទុក្ខាយ វេទនាយ សម្បយុត្តំ, សិយា អទុក្ខមសុខាយ វេទនាយ សម្បយុត្តំ, សិយា ន វត្តព្ពំ សុខាយ វេទនាយ សម្បយុត្តន្តិបិ, ទុក្ខាយ វេទនាយ សម្បយុត្តន្តិបិ, អទុក្ខមសុខាយ វេទនាយ សម្បយុត្តន្តិបិ.

ទោសោ អកុសលហេតុ ទុក្ខាយ វេទនាយ សម្បយុត្តោ. សត្ត ហេតូ សិយា សុខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា. មោហោ អកុសលហេតុ សិយា សុខាយ វេទនាយ សម្បយុត្តោ, សិយា ទុក្ខាយ វេទនាយ សម្បយុត្តោ, សិយា ទុក្ខមសុខាយ វេទនាយ សម្បយុត្តោ.

កពឡីការោ អាហារោ ន វត្តព្ពោ សុខាយ វេទនាយ សម្បយុត្តោតិ បិ, ទុក្ខាយ វេទនាយ សម្បយុត្តោតិបិ, អទុក្ខមសុខាយ វេទនាយ សម្បយុត្តោតិបិ. តយោ អាហារា សិយា សុខាយ វេទនាយ សម្បយុត្តា, សិយា ទុក្ខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា.

បញ្ច ផស្សា អទុក្ខមសុខាយ វេទនាយ សម្បយុត្តា. កាយវិញ្ញាណធាតុសម្ផស្សោ សិយា សុខាយ វេទនាយ សម្បយុត្តោ, សិយា ទុក្ខាយ វេទនាយ សម្បយុត្តោ. មនោវិញ្ញាណធាតុសម្ផស្សោ សិយា សុខាយ វេទនាយ សម្បយុត្តោ, សិយា ទុក្ខាយ វេទនាយ សម្បយុត្តោ, សិយា អទុក្ខមសុខាយ វេទនាយ សម្បយុត្តោ.

សត្ត វេទនា ន វត្តព្ពា សុខាយ វេទនាយ សម្បយុត្តាតិបិ, ទុក្ខាយ វេទនាយ សម្បយុត្តាតិបិ, អទុក្ខមសុខាយ វេទនាយ សម្បយុត្តាតិបិ. បញ្ច សញ្ញា… បញ្ច ចេតនា… បញ្ច ចិត្តា អទុក្ខមសុខាយ វេទនាយ សម្បយុត្តា, កាយវិញ្ញាណធាតុ សិយា សុខាយ វេទនាយ សម្បយុត្តា, សិយា ទុក្ខាយ វេទនាយ សម្បយុត្តា. មនោវិញ្ញាណធាតុ សិយា សុខាយ វេទនាយ សម្បយុត្តា, សិយា ទុក្ខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា.

៣. វិបាកត្តិកំ

១០៤០. បញ្ចន្នំ ខន្ធានំ កតិ វិបាកា, កតិ វិបាកធម្មធម្មា, កតិ នេវវិបាកនវិបាកធម្មធម្មា…បេ… សត្តន្នំ ចិត្តានំ កតិ វិបាកា, កតិ វិបាកធម្មធម្មា, កតិ នេវវិបាកនវិបាកធម្មធម្មា?

រូបក្ខន្ធោ នេវវិបាកនវិបាកធម្មធម្មោ. ចត្តារោ ខន្ធា សិយា វិបាកា, សិយា វិបាកធម្មធម្មា, សិយា នេវវិបាកនវិបាកធម្មធម្មា.

ទសាយតនា នេវវិបាកនវិបាកធម្មធម្មា. ទ្វាយតនា សិយា វិបាកា, សិយា វិបាកធម្មធម្មា, សិយា នេវវិបាកនវិបាកធម្មធម្មា.

ទស ធាតុយោ នេវវិបាកនវិបាកធម្មធម្មា. បញ្ច ធាតុយោ វិបាកា. មនោធាតុ សិយា វិបាកា, សិយា នេវវិបាកនវិបាកធម្មធម្មា. ទ្វេ ធាតុយោ សិយា វិបាកា សិយា វិបាកធម្មធម្មា, សិយា នេវវិបាកនវិបាកធម្មធម្មា.

ទ្វេ សច្ចា វិបាកធម្មធម្មា. និរោធសច្ចំ នេវវិបាកនវិបាកធម្មធម្មំ. ទុក្ខសច្ចំ សិយា វិបាកំ, សិយា វិបាកធម្មធម្មំ, សិយា នេវវិបាកនវិបាកធម្មធម្មំ.

សត្តិន្ទ្រិយា នេវវិបាកនវិបាកធម្មធម្មា. តីណិន្ទ្រិយា វិបាកា. ទ្វិន្ទ្រិយា វិបាកធម្មធម្មា. អញ្ញិន្ទ្រិយំ សិយា វិបាកំ, សិយា វិបាកធម្មធម្មំ. នវិន្ទ្រិយា សិយា វិបាកា, សិយា វិបាកធម្មធម្មា, សិយា នេវវិបាកនវិបាកធម្មធម្មា.

ឆ ហេតូ វិបាកធម្មធម្មា. តយោ អព្យាកតហេតូ សិយា វិបាកា, សិយា នេវវិបាកនវិបាកធម្មធម្មា.

កពឡីការោ អាហារោ នេវវិបាកនវិបាកធម្មធម្មោ. តយោ អាហារា សិយា វិបាកា, សិយា វិបាកធម្មធម្មា, សិយា នេវវិបាកនវិបាកធម្មធម្មា. បញ្ច ផស្សា វិបាកា. មនោធាតុសម្ផស្សោ សិយា វិបាកោ, សិយា នេវវិបាកនវិបាកធម្មធម្មោ. មនោវិញ្ញាណធាតុសម្ផស្សោ សិយា វិបាកោ, សិយា វិបាកធម្មធម្មោ, សិយា នេវវិបាកនវិបាកធម្មធម្មោ. បញ្ច វេទនា… បញ្ច សញ្ញា… បញ្ច ចេតនា… បញ្ច ចិត្តា វិបាកា. មនោធាតុ សិយា វិបាកា, សិយា នេវវិបាកនវិបាកធម្មធម្មា. មនោវិញ្ញាណធាតុ សិយា វិបាកា, សិយា វិបាកធម្មធម្មា, សិយា នេវវិបាកនវិបាកធម្មធម្មា.

៤. ឧបាទិន្នត្តិកំ

១០៤១. បញ្ចន្នំ ខន្ធានំ កតិ ឧបាទិន្នុបាទានិយា, កតិ អនុបាទិន្នុបាទានិយា, កតិ អនុបាទិន្នអនុបាទានិយា…បេ… សត្តន្នំ ចិត្តានំ កតិ ឧបាទិន្នុបាទានិយា, កតិ អនុបាទិន្នុបាទានិយា, កតិ អនុបាទិន្នអនុបាទានិយា?

រូបក្ខន្ធោ សិយា ឧបាទិន្នុបាទានិយោ, សិយា អនុបាទិន្នុបាទានិយោ ៤. ចត្តារោ ខន្ធា សិយា ឧបាទិន្នុបាទានិយា, សិយា អនុបាទិន្នុបាទានិយា, សិយា អនុបាទិន្នអនុបាទានិយា.

បញ្ចាយតនា ឧបាទិន្នុបាទានិយា. សទ្ទាយតនំ អនុបាទិន្នុបាទានិយំ. ចត្តារោ អាយតនា សិយា ឧបាទិន្នុបាទានិយា, សិយា អនុបាទិន្នុបាទានិយា. ទ្វាយតនា សិយា ឧបាទិន្នុបាទានិយា, សិយា អនុបាទិន្នុបាទានិយា, សិយា អនុបាទិន្នអនុបាទានិយា.

ទស ធាតុយោ ឧបាទិន្នុបាទានិយា. សទ្ទធាតុ អនុបាទិន្នុបាទានិយា. បញ្ច ធាតុយោ សិយា ឧបាទិន្នុបាទានិយា, សិយា អនុបាទិន្នុបាទានិយា. ទ្វេ ធាតុយោ សិយា ឧបាទិន្នុបាទានិយា, សិយា អនុបាទិន្នុបាទានិយា, សិយា អនុបាទិន្នអនុបាទានិយា.

សមុទយសច្ចំ អនុបាទិន្នុបាទានិយំ. ទ្វេ សច្ចា អនុបាទិន្នអនុបាទានិយា. ទុក្ខសច្ចំ សិយា ឧបាទិន្នុបាទានិយំ, សិយា អនុបាទិន្នុបាទានិយំ.

នវិន្ទ្រិយា ឧបាទិន្នុបាទានិយា. ទោមនស្សិន្ទ្រិយំ អនុបាទិន្នុបាទានិយំ. តីណិន្ទ្រិយា អនុបាទិន្នអនុបាទានិយា. នវិន្ទ្រិយា សិយា ឧបាទិន្នុបាទានិយា, សិយា អនុបាទិន្នុបាទានិយា, សិយា អនុបាទិន្នអនុបាទានិយា. តយោ អកុសលហេតូ អនុបាទិន្នុបាទានិយា. តយោ កុសលហេតូ សិយា អនុបាទិន្នុបាទានិយា, សិយា អនុបាទិន្នអនុបាទានិយា. តយោ អព្យាកតហេតូ សិយា ឧបាទិន្នុបាទានិយា, សិយា អនុបាទិន្នុបាទានិយា, សិយា អនុបាទិន្នអនុបាទានិយា.

កពឡីការោ អាហារោ សិយា ឧបាទិន្នុបាទានិយោ, សិយា អនុបាទិន្នុបាទានិយោ. តយោ អាហារា សិយា ឧបាទិន្នុបាទានិយា, សិយា អនុបាទិន្នុបាទានិយា, សិយា អនុបាទិន្នអនុបាទានិយា.

បញ្ច ផស្សា ឧបាទិន្នុបាទានិយា. មនោធាតុសម្ផស្សោ សិយា ឧបាទិន្នុបាទានិយោ, សិយា អនុបាទិន្នុបាទានិយោ. មនោវិញ្ញាណធាតុសម្ផស្សោ សិយា ឧបាទិន្នុបាទានិយោ, សិយា អនុបាទិន្នុបាទានិយោ, សិយា អនុបាទិន្នអនុបាទានិយោ. បញ្ច វេទនា… បញ្ច សញ្ញា… បញ្ច ចេតនា… បញ្ច ចិត្តា ឧបាទិន្នុបាទានិយា. មនោធាតុ សិយា ឧបាទិន្នុបាទានិយា, សិយា អនុបាទិន្នុបាទានិយា. មនោវិញ្ញាណធាតុ សិយា ឧបាទិន្នុបាទានិយា, សិយា អនុបាទិន្នុបាទានិយា, សិយា អនុបាទិន្នអនុបាទានិយា.

៥. វិតក្កត្តិកំ

១០៤២. បញ្ចន្នំ ខន្ធានំ កតិ សវិតក្កសវិចារា, កតិ អវិតក្កវិចារមត្តា, កតិ អវិតក្កអវិចារា…បេ… សត្តន្នំ ចិត្តានំ កតិ សវិតក្កសវិចារា, កតិ អវិតក្កវិចារមត្តា, កតិ អវិតក្កអវិចារា?

រូបក្ខន្ធោ អវិតក្កអវិចារោ. តយោ ខន្ធា សិយា សវិតក្កសវិចារា, សិយា អវិតក្កវិចារមត្តា, សិយា អវិតក្កអវិចារា. សង្ខារក្ខន្ធោ សិយា សវិតក្កសវិចារោ, សិយា អវិតក្កវិចារមត្តោ, សិយា អវិតក្កអវិចារោ សិយា ន វត្តព្ពោ សវិតក្កសវិចារោតិបិ, អវិតក្កវិចារមត្តោតិបិ, អវិតក្កអវិចារោតិបិ.

ទសាយតនា អវិតក្កអវិចារា. មនាយតនំ សិយា សវិតក្កសវិចារំ, សិយា អវិតក្កវិចារមត្តំ, សិយា អវិតក្កអវិចារំ. ធម្មាយតនំ សិយា សវិតក្កសវិចារំ, សិយា អវិតក្កវិចារមត្តំ, សិយា អវិតក្កអវិចារំ, សិយា ន វត្តព្ពំ សវិតក្កសវិចារន្តិបិ, អវិតក្កវិចារមត្តន្តិបិ, អវិតក្កអវិចារន្តិបិ.

បន្នរស ធាតុយោ អវិតក្កអវិចារា. មនោធាតុ សវិតក្កសវិចារា. មនោវិញ្ញាណធាតុ សិយា សវិតក្កសវិចារា, សិយា អវិតក្កវិចារមត្តា, សិយា អវិតក្កអវិចារា. ធម្មធាតុ សិយា សវិតក្កសវិចារា, សិយា អវិតក្កវិចារមត្តា, សិយា អវិតក្កអវិចារា, សិយា ន វត្តព្ពា សវិតក្កសវិចារាតិបិ, អវិតក្កវិចារមត្តាតិបិ, អវិតក្កអវិចារាតិបិ.

សមុទយសច្ចំ សវិតក្កសវិចារំ. និរោធសច្ចំ អវិតក្កអវិចារំ. មគ្គសច្ចំ សិយា សវិតក្កសវិចារំ, សិយា អវិតក្កវិចារមត្តំ, សិយា អវិតក្កអវិចារំ. ទុក្ខសច្ចំ សិយា សវិតក្កសវិចារំ, សិយា អវិតក្កវិចារមត្តំ, សិយា អវិតក្កអវិចារំ, សិយា ន វត្តព្ពំ សវិតក្កសវិចារន្តិបិ, អវិតក្កវិចារមត្តន្តិបិ, អវិតក្កអវិចារន្តិបិ.

នវិន្ទ្រិយា អវិតក្កអវិចារា. ទោមនស្សិន្ទ្រិយំ សវិតក្កសវិចារំ. ឧបេក្ខិន្ទ្រិយំ សិយា សវិតក្កសវិចារំ, សិយា អវិតក្កអវិចារំ. ឯកាទសិន្ទ្រិយា សិយា សវិតក្កសវិចារា, សិយា អវិតក្កវិចារមត្តា, សិយា អវិតក្កអវិចារា.

តយោ អកុសលហេតូ សវិតក្កសវិចារា. ឆ ហេតូ សិយា សវិតក្កសវិចារា, សិយា អវិតក្កវិចារមត្តា, សិយា អវិតក្កអវិចារា. កពឡីការោ អាហារោ អវិតក្កអវិចារោ. តយោ អាហារា សិយា សវិតក្កសវិចារា, សិយា អវិតក្កវិចារមត្តា, សិយា អវិតក្កអវិចារា. បញ្ច ផស្សា អវិតក្កអវិចារា. មនោធាតុសម្ផស្សោ សវិតក្កសវិចារោ. មនោវិញ្ញាណធាតុសម្ផស្សោ សិយា សវិតក្កសវិចារោ, សិយា អវិតក្កវិចារមត្តោ, សិយា អវិតក្កអវិចារោ. បញ្ច វេទនា… បញ្ច សញ្ញា… បញ្ច ចេតនា… បញ្ច ចិត្តា អវិតក្កអវិចារា មនោធាតុ សវិតក្កសវិចារា, មនោវិញ្ញាណធាតុ សិយា សវិតក្កសវិចារា, សិយា អវិតក្កវិចារមត្តា, សិយា អវិតក្កអវិចារា.

(១) រូបទុកំ

១០៤៣. បញ្ចន្នំ ខន្ធានំ កតិ រូបា, កតិ អរូបា…បេ… សត្តន្នំ ចិត្តានំ កតិ រូបា, កតិ អរូបា?

រូបក្ខន្ធោ រូបំ. ចត្តារោ ខន្ធា អរូបា. ទសាយតនា រូបា. មនាយតនំ អរូបំ. ធម្មាយតនំ សិយា រូបំ, សិយា អរូបំ. ទស ធាតុយោ រូបា. សត្ត ធាតុយោ អរូបា. ធម្មធាតុ សិយា រូបា, សិយា អរូបា. តីណិ សច្ចានិ អរូបា. ទុក្ខសច្ចំ សិយា រូបំ, សិយា អរូបំ. សត្តិន្ទ្រិយា រូបា. ចុទ្ទសិន្ទ្រិយា អរូបា. ជីវិតិន្ទ្រិយំ សិយា រូបំ, សិយា អរូបំ. នវ ហេតូ អរូបា. កពឡីការោ អាហារោ រូបំ. តយោ អាហារា អរូបា. សត្ត ផស្សា អរូបា. សត្ត វេទនា… សត្ត សញ្ញា… សត្ត ចេតនា សត្ត ចិត្តា អរូបា.

(២) លោកិយទុកំ

១០៤៤. បញ្ចន្នំ ខន្ធានំ កតិ លោកិយា, កតិ លោកុត្តរា? ទ្វាទសន្នំ អាយតនានំ កតិ លោកិយា, កតិ លោកុត្តរា? អដ្ឋារសន្នំ ធាតូនំ កតិ លោកិយា, កតិ លោកុត្តរា? ចតុន្នំ សច្ចានំ កតិ លោកិយា, កតិ លោកុត្តរា…បេ… សត្តន្នំ ចិត្តានំ កតិ លោកិយា, កតិ លោកុត្តរា?

រូបក្ខន្ធោ លោកិយោ. ចត្តារោ ខន្ធា សិយា លោកិយា, សិយា លោកុត្តរា. ទសាយតនា លោកិយា. ទ្វេ អាយតនា សិយា លោកិយា, សិយា លោកុត្តរា. សោឡស ធាតុយោ លោកិយា. ទ្វេ ធាតុយោ សិយា លោកិយា, សិយា លោកុត្តរា. ទ្វេ សច្ចា លោកិយា. ទ្វេ សច្ចា លោកុត្តរា.

ទសិន្ទ្រិយា លោកិយា. តីណិន្ទ្រិយា លោកុត្តរា. នវិន្ទ្រិយា សិយា លោកិយា, សិយា លោកុត្តរា. តយោ អកុសលហេតូ លោកិយា. ឆ ហេតូ សិយា លោកិយា, សិយា លោកុត្តរា. កពឡីការោ អាហារោ លោកិយោ. តយោ អាហារា សិយា លោកិយា, សិយា លោកុត្តរា. ឆ ផស្សា លោកិយា. មនោវិញ្ញាណធាតុសម្ផស្សោ សិយា លោកិយោ, សិយា លោកុត្តរោ. ឆ វេទនា លោកិយា. មនោវិញ្ញាណធាតុសម្ផស្សជា វេទនា សិយា លោកិយា, សិយា លោកុត្តរា. ឆ សញ្ញា លោកិយា. មនោវិញ្ញាណធាតុសម្ផស្សជា សញ្ញា សិយា លោកិយា, សិយា លោកុត្តរា. ឆ ចេតនា លោកិយា. មនោវិញ្ញាណធាតុសម្ផស្សជា ចេតនា សិយា លោកិយា, សិយា លោកុត្តរា. ឆ ចិត្តា លោកិយា. មនោវិញ្ញាណធាតុ សិយា លោកិយា, សិយា លោកុត្តរាតិ.

អភិញ្ញា ទ្វេ សារម្មណា, ទិដ្ឋា កុសលវេទនា;

វិបាកា ច ឧបាទិន្នា, វិតក្កំ រូបលោកិយាតិ.

ធម្មហទយវិភង្គោ និដ្ឋិតោ.

វិភង្គបករណំ និដ្ឋិតំ.