៨. សារម្មណានារម្មណវារោ

១០៣២. បញ្ចន្នំ ខន្ធានំ កតិ សារម្មណា, កតិ អនារម្មណា…បេ… សត្តន្នំ ចិត្តានំ កតិ សារម្មណា, កតិ អនារម្មណា?

១០៣៣. រូបក្ខន្ធោ អនារម្មណោ. ចត្តារោ ខន្ធា សារម្មណា.

ទសាយតនា អនារម្មណា. មនាយតនំ សារម្មណំ. ធម្មាយតនំ សិយា សារម្មណំ, សិយា អនារម្មណំ.

ទស ធាតុយោ អនារម្មណា. សត្ត ធាតុយោ សារម្មណា. ធម្មធាតុ សិយា សារម្មណា, សិយា អនារម្មណា.

ទ្វេ សច្ចា សារម្មណា. និរោធសច្ចំ អនារម្មណំ. ទុក្ខសច្ចំ សិយា សារម្មណំ, សិយា អនារម្មណំ.

សត្តិន្ទ្រិយា អនារម្មណា. ចុទ្ទសិន្ទ្រិយា សារម្មណា. ជីវិតិន្ទ្រិយំ សិយា សារម្មណំ, សិយា អនារម្មណំ. នវ ហេតូ សារម្មណា. កពឡីការោ អាហារោ អនារម្មណោ. តយោ អាហារា សារម្មណា. សត្ត ផស្សា… សត្ត វេទនា… សត្ត សញ្ញា… សត្ត ចេតនា… សត្ត ចិត្តា សារម្មណា.

១០៣៤. បញ្ចន្នំ ខន្ធានំ កតិ សារម្មណារម្មណា, កតិ អនារម្មណារម្មណា…បេ… សត្តន្នំ ចិត្តានំ កតិ សារម្មណារម្មណា, កតិ អនារម្មណារម្មណា?

១០៣៥. រូបក្ខន្ធោ អនារម្មណោ. ចត្តារោ ខន្ធា សិយា សារម្មណារម្មណា, សិយា អនារម្មណារម្មណា.

ទសាយតនា អនារម្មណា. មនាយតនំ សិយា សារម្មណារម្មណំ, សិយា អនារម្មណារម្មណំ. ធម្មាយតនំ សិយា សារម្មណារម្មណំ, សិយា អនារម្មណារម្មណំ, សិយា អនារម្មណំ.

ទស ធាតុយោ អនារម្មណា. ឆ ធាតុយោ អនារម្មណារម្មណា. មនោវិញ្ញាណធាតុ សិយា សារម្មណារម្មណា, សិយា អនារម្មណារម្មណា. ធម្មធាតុ សិយា សារម្មណារម្មណា, សិយា អនារម្មណារម្មណា, សិយា អនារម្មណា.

និរោធសច្ចំ អនារម្មណំ. មគ្គសច្ចំ អនារម្មណារម្មណំ. សមុទយសច្ចំ សិយា សារម្មណារម្មណំ, សិយា អនារម្មណារម្មណំ. ទុក្ខសច្ចំ សិយា សារម្មណារម្មណំ, សិយា អនារម្មណារម្មណំ, សិយា អនារម្មណំ.

សត្តិន្ទ្រិយា អនារម្មណា. បញ្ចិន្ទ្រិយា អនារម្មណារម្មណា. នវិន្ទ្រិយា សិយា សារម្មណារម្មណា, សិយា អនារម្មណារម្មណា. ជីវិតិន្ទ្រិយំ សិយា សារម្មណារម្មណំ, សិយា អនារម្មណារម្មណំ, សិយា អនារម្មណំ.

នវ ហេតូ សិយា សារម្មណារម្មណា, សិយា អនារម្មណារម្មណា. កពឡីការោ អាហារោ អនារម្មណោ. តយោ អាហារា សិយា សារម្មណារម្មណា, សិយា អនារម្មណារម្មណា. ឆ ផស្សា អនារម្មណារម្មណា. មនោវិញ្ញាណធាតុសម្ផស្សោ សិយា សារម្មណារម្មណោ សិយា អនារម្មណារម្មណោ. ឆ វេទនា… ឆ សញ្ញា… ឆ ចេតនា… ឆ ចិត្តា អនារម្មណារម្មណា. មនោវិញ្ញាណធាតុ សិយា សារម្មណារម្មណា, សិយា អនារម្មណារម្មណា.