៧. អភិញ្ញេយ្យាទិវារោ

១០៣០. បញ្ចន្នំ ខន្ធានំ កតិ អភិញ្ញេយ្យា, កតិ បរិញ្ញេយ្យា, កតិ បហាតព្ពា, កតិ ភាវេតព្ពា, កតិ សច្ឆិកាតព្ពា, កតិ ន បហាតព្ពា, ន ភាវេតព្ពា, ន សច្ឆិកាតព្ពា…បេ… សត្តន្នំ ចិត្តានំ កតិ អភិញ្ញេយ្យា, កតិ បរិញ្ញេយ្យា, កតិ បហាតព្ពា, កតិ ភាវេតព្ពា, កតិ សច្ឆិកាតព្ពា, កតិ ន បហាតព្ពា ន ភាវេតព្ពា ន សច្ឆិកាតព្ពា?

១០៣១. រូបក្ខន្ធោ អភិញ្ញេយ្យោ បរិញ្ញេយ្យោ ន បហាតព្ពោ ន ភាវេតព្ពោ ន សច្ឆិកាតព្ពោ. ចត្តារោ ខន្ធា អភិញ្ញេយ្យា បរិញ្ញេយ្យា, សិយា បហាតព្ពា, សិយា ភាវេតព្ពា, សិយា សច្ឆិកាតព្ពា, សិយា ន បហាតព្ពា ន ភាវេតព្ពា ន សច្ឆិកាតព្ពា.

ទសាយតនា អភិញ្ញេយ្យា បរិញ្ញេយ្យា ន បហាតព្ពា ន ភាវេតព្ពា ន សច្ឆិកាតព្ពា. ទ្វេ អាយតនា អភិញ្ញេយ្យា បរិញ្ញេយ្យា, សិយា បហាតព្ពា, សិយា ភាវេតព្ពា, សិយា សច្ឆិកាតព្ពា, សិយា ន បហាតព្ពា ន ភាវេតព្ពា ន សច្ឆិកាតព្ពា.

សោឡស ធាតុយោ អភិញ្ញេយ្យា បរិញ្ញេយ្យា ន បហាតព្ពា ន ភាវេតព្ពា ន សច្ឆិកាតព្ពា. ទ្វេ ធាតុយោ អភិញ្ញេយ្យា បរិញ្ញេយ្យា, សិយា បហាតព្ពា, សិយា ភាវេតព្ពា, សិយា សច្ឆិកាតព្ពា, សិយា ន បហាតព្ពា ន ភាវេតព្ពា ន សច្ឆិកាតព្ពា.

សមុទយសច្ចំ អភិញ្ញេយ្យំ បរិញ្ញេយ្យំ បហាតព្ពំ ន ភាវេតព្ពំ ន សច្ឆិកាតព្ពំ. មគ្គសច្ចំ អភិញ្ញេយ្យំ បរិញ្ញេយ្យំ ន បហាតព្ពំ ភាវេតព្ពំ ន សច្ឆិកាតព្ពំ. និរោធសច្ចំ អភិញ្ញេយ្យំ បរិញ្ញេយ្យំ ន បហាតព្ពំ ន ភាវេតព្ពំ សច្ឆិកាតព្ពំ. ទុក្ខសច្ចំ អភិញ្ញេយ្យំ បរិញ្ញេយ្យំ, សិយា បហាតព្ពំ, ន ភាវេតព្ពំ, ន សច្ឆិកាតព្ពំ, សិយា ន បហាតព្ពំ.

នវិន្ទ្រិយា អភិញ្ញេយ្យា បរិញ្ញេយ្យា ន បហាតព្ពា ន ភាវេតព្ពា ន សច្ឆិកាតព្ពា. ទោមនស្សិន្ទ្រិយំ អភិញ្ញេយ្យំ បរិញ្ញេយ្យំ បហាតព្ពំ ន ភាវេតព្ពំ ន សច្ឆិកាតព្ពំ. អនញ្ញាតញ្ញស្សាមីតិន្ទ្រិយំ អភិញ្ញេយ្យំ បរិញ្ញេយ្យំ ន បហាតព្ពំ ភាវេតព្ពំ ន សច្ឆិកាតព្ពំ. អញ្ញិន្ទ្រិយំ អភិញ្ញេយ្យំ បរិញ្ញេយ្យំ ន បហាតព្ពំ, សិយា ភាវេតព្ពំ, សិយា សច្ឆិកាតព្ពំ. អញ្ញាតាវិន្ទ្រិយំ អភិញ្ញេយ្យំ បរិញ្ញេយ្យំ ន បហាតព្ពំ ន ភាវេតព្ពំ សច្ឆិកាតព្ពំ. តីណិន្ទ្រិយា អភិញ្ញេយ្យា បរិញ្ញេយ្យា ន បហាតព្ពា, សិយា ភាវេតព្ពា, សិយា សច្ឆិកាតព្ពា, សិយា ន ភាវេតព្ពា, សច្ឆិកាតព្ពា. ឆ ឥន្ទ្រិយា អភិញ្ញេយ្យា បរិញ្ញេយ្យា, សិយា បហាតព្ពា, សិយា ភាវេតព្ពា, សិយា សច្ឆិកាតព្ពា, សិយា ន បហាតព្ពា ន ភាវេតព្ពា ន សច្ឆិកាតព្ពា.

តយោ អកុសលហេតូ អភិញ្ញេយ្យា បរិញ្ញេយ្យា បហាតព្ពា ន ភាវេតព្ពា ន សច្ឆិកាតព្ពា. តយោ កុសលហេតូ អភិញ្ញេយ្យា បរិញ្ញេយ្យា ន បហាតព្ពា, សិយា ភាវេតព្ពា, ន សច្ឆិកាតព្ពា, សិយា ន ភាវេតព្ពា. តយោ អព្យាកតហេតូ អភិញ្ញេយ្យា បរិញ្ញេយ្យា ន បហាតព្ពា ន ភាវេតព្ពា, សិយា សច្ឆិកាតព្ពា, សិយា ន សច្ឆិកាតព្ពា.

កពឡីការោ អាហារោ អភិញ្ញេយ្យោ បរិញ្ញេយ្យោ ន បហាតព្ពោ ន ភាវេតព្ពោ ន សច្ឆិកាតព្ពោ. តយោ អាហារា អភិញ្ញេយ្យា បរិញ្ញេយ្យា, សិយា បហាតព្ពា, សិយា ភាវេតព្ពា, សិយា សច្ឆិកាតព្ពា, សិយា ន បហាតព្ពា ន ភាវេតព្ពា ន សច្ឆិកាតព្ពា.

ឆ ផស្សា អភិញ្ញេយ្យា បរិញ្ញេយ្យា ន បហាតព្ពា ន ភាវេតព្ពា ន សច្ឆិកាតព្ពា. មនោវិញ្ញាណធាតុសម្ផស្សោ អភិញ្ញេយ្យោ បរិញ្ញេយ្យោ, សិយា បហាតព្ពោ, សិយា ភាវេតព្ពោ, សិយា សច្ឆិកាតព្ពោ, សិយា ន បហាតព្ពោ ន ភាវេតព្ពោ ន សច្ឆិកាតព្ពោ.

ឆ វេទនា…បេ… ឆ សញ្ញា… ឆ ចេតនា… ឆ ចិត្តា អភិញ្ញេយ្យា បរិញ្ញេយ្យា ន បហាតព្ពា ន ភាវេតព្ពា ន សច្ឆិកាតព្ពា. មនោវិញ្ញាណធាតុ អភិញ្ញេយ្យា បរិញ្ញេយ្យា, សិយា បហាតព្ពា, សិយា ភាវេតព្ពា, សិយា សច្ឆិកាតព្ពា, សិយា ន បហាតព្ពា ន ភាវេតព្ពា ន សច្ឆិកាតព្ពា.