២. អាយុប្បមាណំ

១០២២. មនុស្សានំ កិត្តកំ អាយុប្បមាណំ? វស្សសតំ, អប្បំ វា ភិយ្យោ [អប្បំ វា ភិយ្យោ វា (ស្យា. ក.) ទី. និ. ២.៧].

១០២៣. ចាតុមហារាជិកានំ ទេវានំ កិត្តកំ អាយុប្បមាណំ? យានិ មានុសកានិ បញ្ញាស វស្សានិ, ចាតុម្មហារាជិកានំ ទេវានំ ឯសោ ឯកោ រត្តិន្ទិវោ [រត្តិទិវោ (ក.) អ. និ. ៣.៧១]. តាយ រត្តិយា តិំស រត្តិយោ មាសោ. តេន មាសេន ទ្វាទសមាសិយោ សំវច្ឆរោ. តេន សំវច្ឆរេន ទិព្ពានិ បញ្ច វស្សសតានិ ចាតុម្មហារាជិកានំ ទេវានំ អាយុប្បមាណំ. មនុស្សានំ គណនាយ កិត្តកំ ហោតិ? នវុតិ វស្សសតសហស្សានិ.

តាវតិំសានំ ទេវានំ កិត្តកំ អាយុប្បមាណំ? យំ មានុសកំ វស្សសតំ, តាវតិំសានំ ទេវានំ ឯសោ ឯកោ រត្តិន្ទិវោ. តាយ រត្តិយា តិំស រត្តិយោ មាសោ. តេន មាសេន ទ្វាទសមាសិយោ សំវច្ឆរោ. តេន សំវច្ឆរេន ទិព្ពំ វស្សសហស្សំ តាវតិំសានំ ទេវានំ អាយុប្បមាណំ. មនុស្សានំ គណនាយ កិត្តកំ ហោតិ? តិស្សោ ច វស្សកោដិយោ សដ្ឋិ ច វស្សសតសហស្សានិ.

យាមានំ ទេវានំ កិត្តកំ អាយុប្បមាណំ? យានិ មានុសកានិ ទ្វេ វស្សសតានិ, យាមានំ ទេវានំ ឯសោ ឯកោ រត្តិន្ទិវោ. តាយ រត្តិយា តិំសរត្តិយោ មាសោ. តេន មាសេន ទ្វាទសមាសិយោ សំវច្ឆរោ. តេន សំវច្ឆរេន ទិព្ពានិ ទ្វេ វស្សសហស្សានិ យាមានំ ទេវានំ អាយុប្បមាណំ. មនុស្សានំ គណនាយ កិត្តកំ ហោតិ? ចុទ្ទសញ្ច វស្សកោដិយោ ចត្តារីសញ្ច វស្សសតសហស្សានិ.

តុសិតានំ ទេវានំ កិត្តកំ អាយុប្បមាណំ? យានិ មានុសកានិ ចត្តារិ វស្សសតានិ, តុសិតានំ ទេវានំ ឯសោ ឯកោ រត្តិន្ទិវោ. តាយ រត្តិយា តិំសរត្តិយោ មាសោ. តេន មាសេន ទ្វាទសមាសិយោ សំវច្ឆរោ. តេន សំវច្ឆរេន ទិព្ពានិ ចត្តារិ វស្សសហស្សានិ តុសិតានំ ទេវានំ អាយុប្បមាណំ. មនុស្សានំ គណនាយ កិត្តកំ ហោតិ? សត្តបញ្ញាស វស្សកោដិយោ សដ្ឋិ ច វស្សសតសហស្សានិ.

និម្មានរតីនំ ទេវានំ កិត្តកំ អាយុប្បមាណំ? យានិ មានុសកានិ អដ្ឋ វស្សសតានិ, និម្មានរតីនំ ទេវានំ ឯសោ ឯកោ រត្តិន្ទិវោ. តាយ រត្តិយា តិំសរត្តិយោ មាសោ. តេន មាសេន ទ្វាទសមាសិយោ សំវច្ឆរោ. តេន សំវច្ឆរេន ទិព្ពានិ អដ្ឋ វស្សសហស្សានិ និម្មានរតីនំ ទេវានំ អាយុប្បមាណំ. មនុស្សានំ គណនាយ កិត្តកំ ហោតិ? ទ្វេ វស្សកោដិសតានិ តិំសញ្ច វស្សកោដិយោ ចត្តារីសញ្ច វស្សសតសហស្សានិ.

បរនិម្មិតវសវត្តីនំ ទេវានំ កិត្តកំ អាយុប្បមាណំ? យានិ មានុសកានិ សោឡស វស្សសតានិ, បរនិម្មិតវសវត្តីនំ ទេវានំ ឯសោ ឯកោ រត្តិន្ទិវោ. តាយ រត្តិយា តិំសរត្តិយោ មាសោ. តេន មាសេន ទ្វាទសមាសិយោ សំវច្ឆរោ. តេន សំវច្ឆរេន ទិព្ពានិ សោឡស វស្សសហស្សានិ បរនិម្មិតវសវត្តីនំ ទេវានំ អាយុប្បមាណំ. មនុស្សានំ គណនាយ កិត្តកំ ហោតិ? នវ ច វស្សកោដិសតានិ ឯកវីសញ្ច វស្សកោដិយោ សដ្ឋិ ច វស្សសតសហស្សានីតិ.

ឆ ឯតេ [ឆបិ តេ (ស្យា.)] កាមាវចរា, សព្ពកាមសមិទ្ធិនោ;

សព្ពេសំ ឯកសង្ខាតោ, អាយុ ភវតិ កិត្តកោ.

ទ្វាទស កោដិសតំ តេសំ, អដ្ឋវីសញ្ច កោដិយោ;

បញ្ញាស សតសហស្សានិ, វស្សគ្គេន បកាសិតាតិ.

១០២៤. បឋមំ ឈានំ បរិត្តំ ភាវេត្វា កត្ថ ឧបបជ្ជន្តិ? បឋមំ ឈានំ បរិត្តំ ភាវេត្វា ព្រហ្មបារិសជ្ជានំ ទេវានំ សហព្យតំ ឧបបជ្ជន្តិ. តេសំ កិត្តកំ អាយុប្បមាណំ? កប្បស្ស តតិយោ ភាគោ.

បឋមំ ឈានំ មជ្ឈិមំ ភាវេត្វា កត្ថ ឧបបជ្ជន្តិ? បឋមំ ឈានំ មជ្ឈិមំ ភាវេត្វា ព្រហ្មបុរោហិតានំ ទេវានំ សហព្យតំ ឧបបជ្ជន្តិ. តេសំ កិត្តកំ អាយុប្បមាណំ? ឧបឌ្ឍកប្បោ.

បឋមំ ឈានំ បណីតំ ភាវេត្វា កត្ថ ឧបបជ្ជន្តិ? បឋមំ ឈានំ បណីតំ ភាវេត្វា មហាព្រហ្មានំ ទេវានំ សហព្យតំ ឧបបជ្ជន្តិ. តេសំ កិត្តកំ អាយុប្បមាណំ? កប្បោ [ឯកោ កប្បោ (ស្យា.)].

១០២៥. ទុតិយំ ឈានំ បរិត្តំ ភាវេត្វា កត្ថ ឧបបជ្ជន្តិ? ទុតិយំ ឈានំ បរិត្តំ ភាវេត្វា បរិត្តាភានំ ទេវានំ សហព្យតំ ឧបបជ្ជន្តិ. តេសំ កិត្តកំ អាយុប្បមាណំ? ទ្វេ កប្បា.

ទុតិយំ ឈានំ មជ្ឈិមំ ភាវេត្វា កត្ថ ឧបបជ្ជន្តិ? ទុតិយំ ឈានំ មជ្ឈិមំ ភាវេត្វា អប្បមាណាភានំ ទេវានំ សហព្យតំ ឧបបជ្ជន្តិ. តេសំ កិត្តកំ អាយុប្បមាណំ? ចត្តារោ កប្បា.

ទុតិយំ ឈានំ បណីតំ ភាវេត្វា កត្ថ ឧបបជ្ជន្តិ? ទុតិយំ ឈានំ បណីតំ ភាវេត្វា អាភស្សរានំ ទេវានំ សហព្យតំ ឧបបជ្ជន្តិ. តេសំ កិត្តកំ អាយុប្បមាណំ? អដ្ឋ កប្បា.

១០២៦. តតិយំ ឈានំ បរិត្តំ ភាវេត្វា កត្ថ ឧបបជ្ជន្តិ? តតិយំ ឈានំ បរិត្តំ ភាវេត្វា បរិត្តសុភានំ ទេវានំ សហព្យតំ ឧបបជ្ជន្តិ. តេសំ កិត្តកំ អាយុប្បមាណំ? សោឡស កប្បា.

តតិយំ ឈានំ មជ្ឈិមំ ភាវេត្វា កត្ថ ឧបបជ្ជន្តិ? តតិយំ ឈានំ មជ្ឈិមំ ភាវេត្វា អប្បមាណសុភានំ ទេវានំ សហព្យតំ ឧបបជ្ជន្តិ. តេសំ កិត្តកំ អាយុប្បមាណំ? ពាត្តិំស កប្បា.

តតិយំ ឈានំ បណីតំ ភាវេត្វា កត្ថ ឧបបជ្ជន្តិ? តតិយំ ឈានំ បណីតំ ភាវេត្វា សុភកិណ្ហានំ ទេវានំ សហព្យតំ ឧបបជ្ជន្តិ. តេសំ កិត្តកំ អាយុប្បមាណំ? ចតុសដ្ឋិ កប្បា.

១០២៧. ចតុត្ថំ ឈានំ ភាវេត្វា អារម្មណនានត្តតា មនសិការនានត្តតា ឆន្ទនានត្តតា បណិធិនានត្តតា អធិមោក្ខនានត្តតា អភិនីហារនានត្តតា បញ្ញានានត្តតា អប្បេកច្ចេ អសញ្ញសត្តានំ ទេវានំ សហព្យតំ ឧបបជ្ជន្តិ, អប្បេកច្ចេ វេហប្ផលានំ ទេវានំ សហព្យតំ ឧបបជ្ជន្តិ, អប្បេកច្ចេ អវិហានំ ទេវានំ សហព្យតំ ឧបបជ្ជន្តិ, អប្បេកច្ចេ អតប្បានំ ទេវានំ សហព្យតំ ឧបបជ្ជន្តិ, អប្បេកច្ចេ សុទស្សានំ ទេវានំ សហព្យតំ ឧបបជ្ជន្តិ, អប្បេកច្ចេ សុទស្សីនំ ទេវានំ សហព្យតំ ឧបបជ្ជន្តិ, អប្បេកច្ចេ អកនិដ្ឋានំ ទេវានំ សហព្យតំ ឧបបជ្ជន្តិ, អប្បេកច្ចេ អាកាសានញ្ចាយតនូបគានំ ទេវានំ សហព្យតំ ឧបបជ្ជន្តិ, អប្បេកច្ចេ វិញ្ញាណញ្ចាយតនូបគានំ ទេវានំ សហព្យតំ ឧបបជ្ជន្តិ, អប្បេកច្ចេ អាកិញ្ចញ្ញាយតនូបគានំ ទេវានំ សហព្យតំ ឧបបជ្ជន្តិ, អប្បេកច្ចេ នេវសញ្ញានាសញ្ញាយតនូបគានំ ទេវានំ សហព្យតំ ឧបបជ្ជន្តិ.

អសញ្ញសត្តានញ្ច វេហប្ផលានញ្ច ទេវានំ កិត្តកំ អាយុប្បមាណំ? បញ្ចកប្បសតានិ.

អវិហានំ ទេវានំ កិត្តកំ អាយុប្បមាណំ? កប្បសហស្សំ.

អតប្បានំ ទេវានំ កិត្តកំ អាយុប្បមាណំ? ទ្វេ កប្បសហស្សានិ.

សុទស្សានំ ទេវានំ កិត្តកំ អាយុប្បមាណំ? ចត្តារិ កប្បសហស្សានិ.

សុទស្សីនំ ទេវានំ កិត្តកំ អាយុប្បមាណំ? អដ្ឋ កប្បសហស្សានិ.

អកនិដ្ឋានំ ទេវានំ កិត្តកំ អាយុប្បមាណំ? សោឡស កប្បសហស្សានិ.

១០២៨. អាកាសានញ្ចាយតនូបគានំ ទេវានំ កិត្តកំ អាយុប្បមាណំ? វីសតិ កប្បសហស្សានិ.

វិញ្ញាណញ្ចាយតនូបគានំ ទេវានំ កិត្តកំ អាយុប្បមាណំ? ចត្តារីស កប្បសហស្សានិ.

អាកិញ្ចញ្ញាយតនូបគានំ ទេវានំ កិត្តកំ អាយុប្បមាណំ? សដ្ឋិ កប្បសហស្សានិ.

នេវសញ្ញានាសញ្ញាយតនូបគានំ ទេវានំ កិត្តកំ អាយុប្បមាណំ? ចតុរាសីតិ កប្បសហស្សានីតិ.

១០២៩. ឧក្ខិត្តា បុញ្ញតេជេន, កាមរូបគតិំ គតា.

ភវគ្គតម្បិ [ភវគ្គំ វាបិ (ស្យា.)] សម្បត្តា, បុនាគច្ឆន្តិ [បុន គច្ឆន្តិ (ស្យា.)] ទុគ្គតិំ.

តាវ ទីឃាយុកា សត្តា, ចវន្តិ អាយុសង្ខយា;

នត្ថិ កោចិ ភវោ និច្ចោ, ឥតិ វុត្តំ មហេសិនា.

តស្មា ហិ ធីរា និបកា, និបុណា អត្ថចិន្តកា;

ជរាមរណមោក្ខាយ, ភាវេន្តិ មគ្គមុត្តមំ.

ភាវយិត្វា សុចិំ មគ្គំ, និព្ពានោគធគាមិនំ;

សព្ពាសវេ បរិញ្ញាយ, បរិនិព្ពន្តិ អនាសវាតិ.