១. ឧប្បាទកកម្មំ

១០២១. ទេវាតិ. តយោ ទេវា – សម្មុតិទេវា [សម្មតិទេវា (ស្យា.)], ឧបបត្តិទេវា, វិសុទ្ធិទេវា.

សម្មុតិទេវា នាម – រាជានោ, ទេវិយោ, កុមារា.

ឧបបត្តិទេវា នាម – ចាតុមហារាជិកេ [ចាតុម្មហារាជិកេ (សី. ស្យា.)] ទេវេ ឧបាទាយ តទុបរិ ទេវា.

វិសុទ្ធិទេវា នាម – អរហន្តោ វុច្ចន្តិ.

ទានំ ទត្វា, សីលំ សមាទិយិត្វា, ឧបោសថកម្មំ កត្វា កត្ថ ឧបបជ្ជន្តិ? ទានំ ទត្វា, សីលំ សមាទិយិត្វា, ឧបោសថកម្មំ កត្វា អប្បេកច្ចេ ខត្តិយមហាសាលានំ សហព្យតំ ឧបបជ្ជន្តិ, អប្បេកច្ចេ ព្រាហ្មណមហាសាលានំ សហព្យតំ ឧបបជ្ជន្តិ, អប្បេកច្ចេ គហបតិមហាសាលានំ សហព្យតំ ឧបបជ្ជន្តិ, អប្បេកច្ចេ ចាតុមហារាជិកានំ ទេវានំ សហព្យតំ ឧបបជ្ជន្តិ, អប្បេកច្ចេ តាវតិំសានំ ទេវានំ សហព្យតំ ឧបបជ្ជន្តិ, អប្បេកច្ចេ យាមានំ ទេវានំ សហព្យតំ ឧបបជ្ជន្តិ, អប្បេកច្ចេ តុសិតានំ ទេវានំ សហព្យតំ ឧបបជ្ជន្តិ, អប្បេកច្ចេ និម្មានរតីនំ ទេវានំ សហព្យតំ ឧបបជ្ជន្តិ, អប្បេកច្ចេ បរនិម្មិតវសវត្តីនំ ទេវានំ សហព្យតំ ឧបបជ្ជន្តិ.