៣. អសញ្ញសត្តា

១០១៧. អសញ្ញសត្តានំ ទេវានំ ឧបបត្តិក្ខណេ កតិ ខន្ធា បាតុភវន្តិ…បេ… កតិ ចិត្តានិ បាតុភវន្តិ?

អសញ្ញសត្តានំ ទេវានំ ឧបបត្តិក្ខណេ ឯកោ ខន្ធោ បាតុភវតិ – រូបក្ខន្ធោ; ទ្វេ អាយតនានិ បាតុភវន្តិ – រូបាយតនំ, ធម្មាយតនំ; ទ្វេ ធាតុយោ បាតុភវន្តិ – រូបធាតុ, ធម្មធាតុ; ឯកំ សច្ចំ បាតុភវតិ – ទុក្ខសច្ចំ; ឯកិន្ទ្រិយំ បាតុភវតិ – រូបជីវិតិន្ទ្រិយំ. អសញ្ញសត្តា ទេវា អហេតុកា អនាហារា អផស្សកា អវេទនកា អសញ្ញកា អចេតនកា អចិត្តកា បាតុភវន្តិ.