៤. បរិយាបន្នាបរិយាបន្នំ

១០០៥. បញ្ចន្នំ ខន្ធានំ កតិ បរិយាបន្នា, កតិ អបរិយាបន្នា…បេ… សត្តន្នំ ចិត្តានំ កតិ បរិយាបន្នា, កតិ អបរិយាបន្នា?

១០០៦. រូបក្ខន្ធោ បរិយាបន្នោ; ចត្តារោ ខន្ធា សិយា បរិយាបន្នា, សិយា អបរិយាបន្នា.

ទសាយតនា បរិយាបន្នា; ទ្វេ អាយតនា សិយា បរិយាបន្នា, សិយា អបរិយាបន្នា.

សោឡស ធាតុយោ បរិយាបន្នា; ទ្វេ ធាតុយោ សិយា បរិយាបន្នា, សិយា អបរិយាបន្នា.

ទ្វេ សច្ចា បរិយាបន្នា; ទ្វេ សច្ចា អបរិយាបន្នា.

ទសិន្ទ្រិយា បរិយាបន្នា, តីណិន្ទ្រិយា អបរិយាបន្នា; នវិន្ទ្រិយា សិយា បរិយាបន្នា, សិយា អបរិយាបន្នា.

តយោ អកុសលហេតូ បរិយាបន្នា; ឆ ហេតូ សិយា បរិយាបន្នា, សិយា អបរិយាបន្នា.

កពឡីការោ អាហារោ បរិយាបន្នោ; តយោ អាហារា សិយា បរិយាបន្នា, សិយា អបរិយាបន្នា.

ឆ ផស្សា បរិយាបន្នា; មនោវិញ្ញាណធាតុសម្ផស្សោ សិយា បរិយាបន្នោ, សិយា អបរិយាបន្នោ.

ឆ វេទនា…បេ… ឆ សញ្ញា… ឆ ចេតនា… ឆ ចិត្តា បរិយាបន្នា; មនោវិញ្ញាណធាតុ សិយា បរិយាបន្នា, សិយា អបរិយាបន្នា.