(២) លោកិយទុកំ

១០៤៤. បញ្ចន្នំ ខន្ធានំ កតិ លោកិយា, កតិ លោកុត្តរា? ទ្វាទសន្នំ អាយតនានំ កតិ លោកិយា, កតិ លោកុត្តរា? អដ្ឋារសន្នំ ធាតូនំ កតិ លោកិយា, កតិ លោកុត្តរា? ចតុន្នំ សច្ចានំ កតិ លោកិយា, កតិ លោកុត្តរា…បេ… សត្តន្នំ ចិត្តានំ កតិ លោកិយា, កតិ លោកុត្តរា?

រូបក្ខន្ធោ លោកិយោ. ចត្តារោ ខន្ធា សិយា លោកិយា, សិយា លោកុត្តរា. ទសាយតនា លោកិយា. ទ្វេ អាយតនា សិយា លោកិយា, សិយា លោកុត្តរា. សោឡស ធាតុយោ លោកិយា. ទ្វេ ធាតុយោ សិយា លោកិយា, សិយា លោកុត្តរា. ទ្វេ សច្ចា លោកិយា. ទ្វេ សច្ចា លោកុត្តរា.

ទសិន្ទ្រិយា លោកិយា. តីណិន្ទ្រិយា លោកុត្តរា. នវិន្ទ្រិយា សិយា លោកិយា, សិយា លោកុត្តរា. តយោ អកុសលហេតូ លោកិយា. ឆ ហេតូ សិយា លោកិយា, សិយា លោកុត្តរា. កពឡីការោ អាហារោ លោកិយោ. តយោ អាហារា សិយា លោកិយា, សិយា លោកុត្តរា. ឆ ផស្សា លោកិយា. មនោវិញ្ញាណធាតុសម្ផស្សោ សិយា លោកិយោ, សិយា លោកុត្តរោ. ឆ វេទនា លោកិយា. មនោវិញ្ញាណធាតុសម្ផស្សជា វេទនា សិយា លោកិយា, សិយា លោកុត្តរា. ឆ សញ្ញា លោកិយា. មនោវិញ្ញាណធាតុសម្ផស្សជា សញ្ញា សិយា លោកិយា, សិយា លោកុត្តរា. ឆ ចេតនា លោកិយា. មនោវិញ្ញាណធាតុសម្ផស្សជា ចេតនា សិយា លោកិយា, សិយា លោកុត្តរា. ឆ ចិត្តា លោកិយា. មនោវិញ្ញាណធាតុ សិយា លោកិយា, សិយា លោកុត្តរាតិ.

អភិញ្ញា ទ្វេ សារម្មណា, ទិដ្ឋា កុសលវេទនា;

វិបាកា ច ឧបាទិន្នា, វិតក្កំ រូបលោកិយាតិ.

ធម្មហទយវិភង្គោ និដ្ឋិតោ.

វិភង្គបករណំ និដ្ឋិតំ.