១. កុសលត្តិកំ

១០៣៨. បញ្ចន្នំ ខន្ធានំ កតិ កុសលា, កតិ អកុសលា, កតិ អព្យាកតា…បេ… សត្តន្នំ ចិត្តានំ កតិ កុសលា, កតិ អកុសលា, កតិ អព្យាកតា?

រូបក្ខន្ធោ អព្យាកតោ. ចត្តារោ ខន្ធា សិយា កុសលា, សិយា អកុសលា, សិយា អព្យាកតា. ទសាយតនា អព្យាកតា. ទ្វាយតនា សិយា កុសលា, សិយា អកុសលា, សិយា អព្យាកតា. សោឡស ធាតុយោ អព្យាកតា. ទ្វេ ធាតុយោ សិយា កុសលា, សិយា អកុសលា, សិយា អព្យាកតា. សមុទយសច្ចំ អកុសលំ. មគ្គសច្ចំ កុសលំ. និរោធសច្ចំ អព្យាកតំ. ទុក្ខសច្ចំ សិយា កុសលំ, សិយា អកុសលំ, សិយា អព្យាកតំ.

ទសិន្ទ្រិយា អព្យាកតា. ទោមនស្សិន្ទ្រិយំ អកុសលំ. អនញ្ញាតញ្ញស្សាមីតិន្ទ្រិយំ កុសលំ. ចត្តារិន្ទ្រិយា សិយា កុសលា, សិយា អព្យាកតា. ឆ ឥន្ទ្រិយា សិយា កុសលា, សិយា អកុសលា, សិយា អព្យាកតា.

តយោ កុសលហេតូ កុសលា. តយោ អកុសលហេតូ អកុសលា. តយោ អព្យាកតហេតូ អព្យាកតា. កពឡីការោ អាហារោ អព្យាកតោ. តយោ អាហារា សិយា កុសលា, សិយា អកុសលា, សិយា អព្យាកតា. ឆ ផស្សា អព្យាកតា. មនោវិញ្ញាណធាតុសម្ផស្សោ សិយា កុសលោ, សិយា អកុសលោ, សិយា អព្យាកតោ. ឆ វេទនា… ឆ សញ្ញា… ឆ ចេតនា… ឆ ចិត្តា អព្យាកតា. មនោវិញ្ញាណធាតុ សិយា កុសលា, សិយា អកុសលា, សិយា អព្យាកតា.