(៤) តិស្សោ អកុសលធាតុយោ

៩១២. តត្ថ កតមា តិស្សោ អកុសលធាតុយោ? កាមធាតុ, ព្យាបាទធាតុ, វិហិំសាធាតុ.

តត្ថ កតមា កាមធាតុ? កាមវិតក្កោ កាមធាតុ. ព្យាបាទវិតក្កោ ព្យាបាទធាតុ. វិហិំសាវិតក្កោ វិហិំសាធាតុ.

(ក) តត្ថ កតមោ កាមវិតក្កោ? កាមបដិសំយុត្តោ តក្កោ វិតក្កោ មិច្ឆាសង្កប្បោ – អយំ វុច្ចតិ ‘‘កាមវិតក្កោ’’.

(ខ) តត្ថ កតមោ ព្យាបាទវិតក្កោ? ព្យាបាទបដិសំយុត្តោ តក្កោ វិតក្កោ មិច្ឆាសង្កប្បោ – អយំ វុច្ចតិ ‘‘ព្យាបាទវិតក្កោ’’.

(គ) តត្ថ កតមោ វិហិំសាវិតក្កោ? វិហិំសាបដិសំយុត្តោ តក្កោ វិតក្កោ មិច្ឆាសង្កប្បោ – អយំ វុច្ចតិ ‘‘វិហិំសាវិតក្កោ’’. ឥមា តិស្សោ អកុសលធាតុយោ.