(៤) នវ តណ្ហាមូលកា ធម្មា

៩៦៣. តត្ថ កតមេ នវ តណ្ហាមូលកា ធម្មា? តណ្ហំ បដិច្ច បរិយេសនា, បរិយេសនំ បដិច្ច លាភោ, លាភំ បដិច្ច វិនិច្ឆយោ, វិនិច្ឆយំ បដិច្ច ឆន្ទរាគោ, ឆន្ទរាគំ បដិច្ច អជ្ឈោសានំ, អជ្ឈោសានំ បដិច្ច បរិគ្គហោ, បរិគ្គហំ បដិច្ច មច្ឆរិយំ, មច្ឆរិយំ បដិច្ច អារក្ខោ, អារក្ខាធិករណំ ទណ្ឌាទាន-សត្ថាទាន-កលហ-វិគ្គហវិវាទ-តុវំតុវំ-បេសុញ្ញ-មុសាវាទា អនេកេ បាបកា អកុសលា ធម្មា សម្ភវន្តិ – ឥមេ នវ តណ្ហាមូលកា ធម្មា.