៦. ឆក្កបុគ្គលបញ្ញត្តិ

២០២. តត្រ យ្វាយំ បុគ្គលោ បុព្ពេ អននុស្សុតេសុ ធម្មេសុ សាមំ សច្ចានិ អភិសម្ពុជ្ឈតិ, តត្ថ ច សព្ពញ្ញុតំ បាបុណាតិ ពលេសុ ច វសីភាវំ, សម្មាសម្ពុទ្ធោ តេន ទដ្ឋព្ពោ.

តត្រ យ្វាយំ បុគ្គលោ បុព្ពេ អននុស្សុតេសុ ធម្មេសុ សាមំ សច្ចានិ អភិសម្ពុជ្ឈតិ, ន ច តត្ថ សព្ពញ្ញុតំ បាបុណាតិ ន ច ពលេសុ វសីភាវំ, បច្ចេកសម្ពុទ្ធោ តេន ទដ្ឋព្ពោ.

តត្រ យ្វាយំ បុគ្គលោ បុព្ពេ អននុស្សុតេសុ ធម្មេសុ សាមំ សច្ចានិ អនភិសម្ពុជ្ឈតិ, ទិដ្ឋេវ ធម្មេ ទុក្ខស្សន្តករោ ហោតិ [ទុក្ខស្សន្តំ ករោតិ (សី.) ឯវមុបរិបិ], សាវកបារមិញ្ច បាបុណាតិ, សារិបុត្តមោគ្គល្លានា តេន ទដ្ឋព្ពា.

តត្រ យ្វាយំ បុគ្គលោ បុព្ពេ អននុស្សុតេសុ ធម្មេសុ សាមំ សច្ចានិ អនភិសម្ពុជ្ឈតិ, ទិដ្ឋេវ ធម្មេ ទុក្ខស្សន្តករោ ហោតិ, ន ច សាវកបារមិំ បាបុណាតិ, អវសេសា អរហន្តា តេន ទដ្ឋព្ពា.

តត្រ យ្វាយំ បុគ្គលោ បុព្ពេ អននុស្សុតេសុ ធម្មេសុ សាមំ សច្ចានិ អនភិសម្ពុជ្ឈតិ, ន ច ទិដ្ឋេវ ធម្មេ ទុក្ខស្សន្តករោ ហោតិ, អនាគាមី ហោតិ អនាគន្តា ឥត្ថត្តំ, អនាគាមី តេន ទដ្ឋព្ពោ.

តត្រ យ្វាយំ បុគ្គលោ បុព្ពេ អននុស្សុតេសុ ធម្មេសុ សាមំ សច្ចានិ អនភិសម្ពុជ្ឈតិ, ន ច ទិដ្ឋេវ ធម្មេ ទុក្ខស្សន្តករោ ហោតិ, អាគន្តា ឥត្ថត្តំ, សោតាបន្នសកទាគាមិនោ តេន ទដ្ឋព្ពា.

ឆក្កនិទ្ទេសោ.