វុដ្ឋានគាមិនីវិបស្សនាកថាវណ្ណនា

៨០៥. កិញ្ចិ អសង្ខតារម្មណម្បិ ញាណំ វុដ្ឋានគាមិនិយា ឯកសង្គហន្តិ កត្វា ‘‘សង្ខារារម្មណាយា’’តិ វិសេសនំ កតំ. តញ្ហិ វិសេសតោ វុដ្ឋានំ អរិយមគ្គំ គច្ឆតិ ឧបេតីតិ វុដ្ឋានគាមិនីតិ វត្តព្ពតំ លភតិ. តេនាហ ‘‘សព្ពេន សព្ព’’ន្តិអាទិ. អសម្មោហត្ថន្តិ តត្ថ តត្ថ សុត្តេ បរិយាយន្តរេហិ អាគតាយ សម្មោហាភាវត្ថំ. សុត្តសំសន្ទនាតិ សុត្តានំ តេសំ តេសំ សុត្តបទានំ អនុសន្ទានំ.

យេ លោកិយេ សង្ខារេ អារព្ភ អនុលោមបរិយោសានា វុដ្ឋានគាមិនិវិបស្សនា បវត្តតិ, តំសន្និស្សិតា តប្បដិពទ្ធា តណ្ហា តេហិ វិនា អប្បវត្តនតោ តម្មយា នាម, តម្មយាវ តម្មយតា, តម្មយា វា តណ្ហាសម្បយុត្តា ខន្ធា, តេសំ ភាវោ តម្មយតា, សា ឯវ តណ្ហា. តប្បដិបក្ខា វុដ្ឋានគាមិនិវិបស្សនា អតម្មយតា. តេន វុត្តំ អដ្ឋកថាយំ ‘‘តម្មយតា នាម តណ្ហា, តស្សា បរិយាទិយនតោ វុដ្ឋានគាមិនិវិបស្សនា អតម្មយតាតិ វុច្ចតី’’តិ (ម. និ. អដ្ឋ. ៣.៣១០). និស្សាយាតិ តំ អតម្មយតំ និស្សយំ កត្វា, ភាវេត្វាតិ អត្ថោ. ឯកត្តាតិ ឯត្ថ អយំ បាឡិ ‘‘អត្ថិ, ភិក្ខវេ, ឧបេក្ខា រូបេសុ…បេ… ផោដ្ឋព្ពេសុ, អយំ, ភិក្ខវេ, ឧបេក្ខា នានត្តា នានត្តសិតា’’តិ (ម. និ. ៣.៣១០), សយម្បិ នានាសភាវា, នានារម្មណនិស្សិតា ចាតិ អត្ថោ. សា បន សមាធិសម្បយុត្តា វិបស្សនុបេក្ខា វេទិតព្ពា. ‘‘អត្ថិ, ភិក្ខវេ, ឧបេក្ខា អាកាសានញ្ចាយតននិស្សិតា…បេ… នេវសញ្ញានាសញ្ញាយតននិស្សិតា, អយំ, ភិក្ខវេ, ឧបេក្ខា ឯកត្តា ឯកត្តសិតា’’តិ (ម. និ. ៣.៣១០). យា ហិ តំតំអរូបចិត្តុប្បាទបរិយាបន្នា ឧបេក្ខា, សា ឯកសភាវត្តា, ឯការម្មណត្តា ច ឯកត្តា, ឯកត្តសិតា ចាតិ វុច្ចតិ, សា បន តំតំឈានសហគតវេទនុបេក្ខា ច តទារម្មណវិបស្សនុបេក្ខា ចាតិ វទន្តិ. តំ បជហថាតិ តទារម្មណកិលេសបហានេន បជហថ. តេនាហ ‘‘តំ សមតិក្កមថា’’តិ.

និព្ពិទាតិ វុដ្ឋានគាមិនី. តត្ថ ហិ សុត្តេ វិរជ្ជតីតិ មគ្គកិច្ចមាហ, វិមុច្ចតីតិ ផលកិច្ចំ.

សុសិមសុត្តំ និទានវគ្គេ. តត្ថ ធម្មដ្ឋិតិញាណំ វុដ្ឋានគាមិនីតិ វុត្តា ធម្មដ្ឋិតិយំ បដិច្ចសមុប្បាទេ អសម្មុយ្ហនវសេន បវត្តនតោ. និព្ពានេ ញាណន្តិ មគ្គញាណមាហ.

សញ្ញា ខោ, បោដ្ឋបាទាតិ ឯត្ថ កាមំ ‘‘សញ្ញា’’ឥច្ចេវ វុច្ចតិ, បុព្ពេ បន ‘‘សញ្ញគ្គំ ផុសតី’’តិ វុត្តត្តា អាហ ‘‘សញ្ញគ្គន្តិ វុត្តា’’តិ.

បដិបទាញាណទស្សនវិសុទ្ធីតិ តទេកទេសភូតា វុដ្ឋានគាមិនី វុត្តា. សមុទាយេសុ ហិ បវត្តា វោហារា អវយវេសុបិ បវត្តន្តីតិ. បារិសុទ្ធិបធានិយង្គន្តិ បារិសុទ្ធិយា បធានការណំ.

តីហិ នាមេហីតិ អនុលោមគោត្រភុវោទានសង្ខាតេហិ តីហិ នាមេហិ.

កិត្តិតាតិ ថោមិតា អរិយមគ្គាធិដ្ឋានតាយ. មហន្តានំ សីលក្ខន្ធាទីនំ ឯសនដ្ឋេន មហេសិនា សម្មាសម្ពុទ្ធេន. សន្តកិលេសតាយ សន្តា. យោគន្តិ ភាវនំ, ភាវនាភិយោគំ វា.

បដិបទាញាណទស្សនវិសុទ្ធិនិទ្ទេសវណ្ណនា និដ្ឋិតា.

ឥតិ ឯកវីសតិមបរិច្ឆេទវណ្ណនា.