ផស្សបច្ចយាវេទនាបទវិត្ថារកថាវណ្ណនា
៦៤៣. ទ្វារតោ សឡេវាតិ បភវសាមញ្ញតោ ឯកវិធាបិ ឧប្បត្តិទ្វារតោ ឆ ឯវ ហោន្តីតិ ឆឡេវ វេទនា វុត្តា.
ចិត្តភេទេន ឯកូននវុតិវិធាបិ ឥធាធិប្បេតា ឯវ ទស្សេតុំ ‘‘វេទនាសុ បនា’’តិអាទិ វុត្តំ. ‘‘សេសាន’’ន្តិ ឯត្ថ សម្បដិច្ឆនសម្បយុត្តាយ ចក្ខុសម្ផស្សាទយោ បញ្ច យទិបិ អនន្តរាទីហិ បច្ចយា ហោន្តិ, អនន្តរាទីនំ បន ឧបនិស្សយេ អន្តោគធត្តា សន្តីរណតទារម្មណានញ្ច សាធារណស្ស តស្ស វសេន ‘‘ឯកធា’’តិ វុត្តំ. ឯកេកស្មិំ ទ្វារេ ហិ ចក្ខុទ្វារាទីសុ ឧប្បន្នចក្ខុវិញ្ញាណាទីហិ សហជាតា ផស្សា សកសកវីថីសុ សម្បដិច្ឆនាទីហិ សម្បយុត្តវេទនានំ, មនោទ្វារេ តទារម្មណវសេនេវ បវត្តានំ តេភូមកវិបាកវេទនានម្បិ សហជាតមនោសម្ផស្សសង្ខាតោ សោ ផស្សោ អដ្ឋធា បច្ចយោ ហោតីតិ យោជេតព្ពំ.
រូបារូបាវចរវិបាកវេទនា បដិសន្ធិអាទិវសេនេវ បវត្តន្តិ, កាមាវចរាបិ ឯកច្ចាតិ ‘‘តេភូមកវិបាកវេទនានម្បី’’តិ វុត្តំ. តាសម្បិ ហិ សហជាតមនោសម្ផស្សោ អដ្ឋធាវ បច្ចយោ ហោតិ. បច្ចយំ អនុបាទិន្នម្បិ កេចិ ឥច្ឆន្តីតិ ‘‘យា បនា’’តិអាទិនា មនោទ្វារាវជ្ជនសម្បយុត្តផស្សស្ស បច្ចយភាវោ វុត្តោ. តញ្ច មុខមត្តទស្សនំ ទដ្ឋព្ពំ. ឯតេន នយេន សព្ពស្ស អនន្តរស្ស, អនានន្តរស្ស ច ផស្សស្ស តស្សា តស្សា វិបាកវេទនាយ ឧបនិស្សយតា យោជេតព្ពាតិ.