ឡការន្តធាតុ

តឡ តាឡនេ. តាឡេតិ, តាឡយតិ. បតាឡេតិ, បតាឡយតិ. តាឡំ. តាឡន្តិ កំសតាឡាទិ.

តឡ អាឃាតេ. បុព្ពេ វិយ រូបានិ.

ខឡ ភេទេ. ខឡេតិ, ខឡយតិ.

ឥឡ ថវនេ. ឥឡេតិ, ឥឡយតិ.

ជុឡ បេរណេ. ជោឡេតិ, ជោឡយតិ.

បីឡ អវគាហនេ. បីឡេតិ, បីឡយតិ. និប្បីឡេតិ, និប្បីឡយតិ. បីឡនកោ, បីឡិតោ, បីឡា, បីឡនំ, និប្បីឡនកោ.

លឡ ឧបសេវាយំ. លាឡេតិ, លាឡយតិ. ឧបលាឡេតិ, ឧបលាឡយតិ. ភូវាទិគណដ្ឋាយ បន វិលាសនត្ថេ វត្តមានាយ ឯតិស្សា ‘‘លឡតី’’តិ រូបំ.

សិឡ សេឡនេ. សេឡេតិ, សេឡយតិ. សេឡេន្តោ. ឯត្ថ សេឡេតីតិ សេឡិតសទ្ទំ ករោតិ.

អវគ្គន្តធាតុរូបានិ.

ចុរាទី ឯត្តកា ទិដ្ឋា, ធាតវោ មេ យថាពលំ;

សុត្តេស្វញ្ញេបិ បេក្ខិត្វា, គណ្ហវ្ហោ អត្ថយុត្តិតោ.

ចុរបមុខគណោ មេ សាសនត្ថំ បវុត្តោ,

សុបចុរហិតកាមោ តម្បិ សិក្ខេយ្យ ធីរោ;

សុបចុរនយបាឋេ សត្ថុនោ តញ្ហិ សិក្ខំ,

បិយុសមិវ មនុញ្ញំ អត្ថសារំ លភេថ.

ឥតិ នវង្គេ សាដ្ឋកថេ បិដកត្តយេ ព្យប្បថគតីសុ វិញ្ញូនំ

កោសល្លត្ថាយ កតេ សទ្ទនីតិប្បករណេ

ចុរាទិគណបរិទីបនោ អដ្ឋារសមោ បរិច្ឆេទោ.