៣៩. ពោធិរាជធីតុយា [ពោធិរាជធីតាយ ឥតិសព្ពត្ថ] វត្ថុម្ហិ អយមានុបុព្ពីកថា

ភគវតិ បរិនិព្ពុតេ លង្កាយំ សាសនេ សុប្បតិដ្ឋិតេ តត្ថ ហកុរេឡីតិ ឯកោ គាមោ អហោសិ, តត្ថេកា ទារិកា គាមាទារិកាហិ សទ្ធិំ តត្ថ តត្ថ កីឡន្តី វិហរតិ, តទា គាមសមីបេ មហាសោព្ភំ ហោតិ. តត្ថេកោ មរុត្ថរុក្ខោ សព្ពទា បាឡិផុល្លោវ តិដ្ឋតិ. មនុស្សា ពុទ្ធបូជនត្ថំ បុប្ផានិ វិចិណន្តា ឧទកំ ឱគហេត្វា រុក្ខមភិរុយ្ហ បុប្ផានិ ឱចិណន្តិ, កុមារិកា តេ ទិស្វា មនុស្សា សុខេន គន្ត្វា បុប្ផានិ ឱចិណន្តូតិ ឯកំ សុក្ខបាលិភទ្ទទណ្ឌកំ អាហរិត្វា សេតុំ កត្វា ឋបេសិ, តតោ បដ្ឋាយ មនុស្សា តេនគន្ត្វា បុប្ផានិ ឱចិណន្តិ. អថ សា តតោ ចុតា តេនេវ កុសលកម្មេន ជម្ពុទីបេ បាដលិបុត្តនគរេ សោមទត្តរញ្ញោ ធីតា ហុត្វា និព្ពត្តិ, ឧត្តមរូបធរា ទេវច្ឆរបដិភាគា អហោសិ. មាតាបិតរោ បនស្សា ពោធិរាជកុមារិកាតិ វោហរិំសុ. បុព្ពេ កតសេតុអានុភាវេន តស្សា សុវីរកោ នាមេកោ អាកាសគាមី សិន្ធវបោតកោ និព្ពត្តិ. រាជធីតុយា បន បិតា ពុទ្ធមាមកោ ធម្មមាមកោ សង្ឃមាមកោ ហុត្វា មហន្តំ បុញ្ញំ បសវន្តោ សិន្ធវបោតកំ ទិស្វា បុញ្ញករណស្ស មេ សហាយោ លទ្ធោតិ តុដ្ឋមានសោ អស្សំ អភិរុហិត្វា ទិវសស្ស តិក្ខត្តុំ គន្ត្វា មហាពោធិំ វន្ទតិ. រាជធីតា នំ ទិស្វា បិតុសន្តិកំ គន្ត្វា អភិណ្ហំ តាត កុហិំ គច្ឆសីតិ បុច្ឆិ. រាជា ន កិញ្ចិ កថេសិ, អថ សា បុនប្បុនំ បិតរំ និពន្ធន្តី បុច្ឆិ. តតោ រាជា តស្សាវិ ករោន្តោ ឯវមាហ.

១. អម្ហាកំ ភគវា បុព្ពេ, បូរេន្តោ ទសបារមី;

អទាសិ សីសរត្តក្ខិ, មំសំ ជីវិតមេវ ច.

២. បុត្តទារេ ច រជ្ជេ ច, បត្វា [ទត្វា ឥតិបិកត្ថចិ] បារមិមត្ថកំ;

អនប្បកប្បកោដីនំ, ខេបេត្វា កបិលវុយេ.

៣. សក្ករាជកុលេ ជាតោ, លោកេ អប្បដិបុគ្គលោ;

សម្បត្តចក្កវត្តិត្តំ, បហន្ត្វាន នរាធិបោ.

៤. ទិស្វា និមិត្តេ ចតុរោ, និក្ខម្ម អភិនិក្ខមំ;

ពោធិមូលមុបាគម្ម, និសិន្នោ វជិរាសនេ.

៥. សហស្សពាហុំ មាបេត្វា, នានាយុធសមាកុលំ [នានាវុធសមាកុលំ-ឥតិសព្ពត្ថ];

មហាភីតិករំ វេសំ, កាឡបព្ពតសាទិសំ.

៦. មាបេត្វាន សមារុយ្ហ, គិរិមេខលវារណំ;

មារសេនំ សមានេត្វា, អាគតំ មករទ្ធជំ.

៧. បារមិតាពលេន តំ, មារសេនំ បលាបិយ;

យត្ថាសីនោ កិលេសារិ, សហស្សំ ឃាតយី ជិនោ.

៨. នយនំ សុជលសេកេហិ, សត្តាហំ ជិនសេវិតំ;

បូជិតំ ទេវព្រហ្មេហិ, សិទ្ធោរគនរាទិហិ;

វន្ទិតុំ ជយពោធិំតំ, គច្ឆាមិ សតតំ អហំ.

៩. ឧបាសតិ សទា គន្ត្វា, យោ នរោ ពោធិបាទបំ;

គន្ធោទទីបធូបាទិ, នានាបូជាហិ សាធុកំ.

១០. ស នរោ និរាមយោ ហោតិ, បច្ចត្តេ ច បរត្ថ ច;

បូជិតោ មានិតោ ហោតិ, ទីឃាយុ ពលវា សុខី.

១១. តទត្ថំ បត្ថយន្តេន, អត្ថកាមេន ជន្តុនា;

ឧបាសនីយំ សទ្ធាយ, និច្ចំ តំ ពោធិបាទបំតិ.

តំ សុត្វា កុមារិកា បីតិយា ផុដសរីរា បិតរំ វន្ទិត្វា អហម្បិ តាត គច្ឆាមីតិ អាហ. រាជា បនស្សា ឧបទ្ទវភយេន គមនំ ន ឥច្ឆិ. តតោ សា យាវតតិយំ បិតរំ យាចិត្វា រញ្ញា អនុញ្ញាតា. តតោ បដ្ឋាយ បិតរា សទ្ធិំ សិន្ធវមារុយ្ហ ពោធិំ វន្ទិតុំ សតតំ គច្ឆតិ. អថាបរភាគេ រាជា មរណមញ្ចេ និបន្នោ ចិន្តេសិ. ធីតា មេ និរន្តរំ ពោធិឧបដ្ឋានំគច្ឆតិ, ឯតិស្សា អនាគតេ យំកិញ្ចិ ភយំ ឧប្បជ្ជមានំ តតោ ឧប្បជ្ជតិ. តត្ថ មេ កិំ កាតព្ពន្តិ. តតោ សិន្ធវំ បក្កោសាបេត្វា តស្ស កណ្ណមូលេ មន្តេន្តោ ឯវមាហ, តាត មម ធីតា អភិណ្ហំ តវ សហាយំ កត្វា ពោធិំ វន្ទិតុំ គច្ឆតិ. តត្ថស្សា យំកិញ្ចិ ភយំ ភវេយ្យ. តំ នប្បតិរូបំ. តត្ថ គមនាគមនេ មម ធីតរំ រក្ខេយ្យាសីតិ តស្ស ធីតរំ បដិបាទេត្វា កាលមកាសិ. តតោ រាជធីតា បិតុសរីរកិច្ចំ ការេត្វា ទិវសស្ស តិក្ខត្តុំ អស្សមភិរុយ្ហ ពោធិឧបដ្ឋានំ គច្ឆតិ. មនុស្សា បនស្សា រូបសម្បត្តិំ ទិស្វា វិម្ហិតមានសា រាជារហំ វត នោ ឥទំ បណ្ណាការំ ទិដ្ឋំ. គន្ត្វា រញ្ញោ អាចិក្ខិស្សាម. អប្បេវ នាម រាជា សោ កិញ្ចិ នោ ទទេយ្យាតិ ចិន្តេត្វា រញ្ញោ សន្តិកំ គន្ត្វា វន្ទិត្វា ឋិតា ឯវមាហំសុ.

១២. ពោធិមណ្ឌំ សមាគម្ម, អភិណ្ហំ តុដ្ឋមានសា;

វន្ទន្តី យាតិ កញ្ញេកា, វិជ្ជូវ សិរិយា ជលំ.

១៣. នីលធម្បិល្លភារា សា, វិសាលាយតលោចនា;

សោណ្ណទោលាភសវណា, សាមា សុភបយោធរា.

១៤. សតរំសីហិ សម្មិស្ស, សញ្ច្យាម្ពុទសមាធរា;

តុង្គនាសា នីលភមុ, ហាសភាសា មនោរមា.

១៥. ឦទិសំ នោ មហារាជា [មហារាជទិដ្ឋបុព្ព ឥតិបិកត្ថចិ], ទិដ្ឋបុព្ពំ កុទាចនំ;

ឯហិ តស្សា សិរិំទេវ, ពោធិមណ្ឌម្ហិ ទក្ខសីតិ.

តំ សុត្វា រាជា សវណសំសគ្គេនេវ តាយ បដិពទ្ធចិត្តោ ចតុរង្គិនិំសេនំ គហេត្វា រាជធីតរំ ពោធិវន្ទនត្ថាយ អាគតកាលេ ពហិបាការេ សេនំ បរិក្ខិបាបេត្វា គណ្ហថេតន្តិ មនុស្សេ និយោជេសិ. តតោ សេនាបិ តំ គហណសជ្ជា អដ្ឋាសិ. រាជធីតា តេ ទិស្វា សីឃំ សិន្ធវំ ឧបសង្កមិត្វា តស្ស បិដ្ឋិយំ និសិន្នា បណ្ហិយា សញ្ញំ អទាសិ. សោ តំ គហេត្វា វេគេន អាកាសំ បក្ខន្ទិ. សា បន ទុន្និសិន្នភាវេន អស្សស្ស វេគំ សន្ធារេតុមសក្កោន្តី អស្សបិដ្ឋិតោ បរិគលិ. សិន្ធវោ រាជធីតរំ បតមានំ ទិស្វា រាជោវាទំ សរមានោ វេគេនាគន្ត្វា តស្សា កេសេ ឌំសិត្វា ឧក្ខិបិត្វា បតមានាយ តស្សា បិដ្ឋិំទត្វា និសីទាបេត្វា អាកាសេន តំ នេត្វា បាដលិបុត្តនគរេយេវ បតិដ្ឋាបេសិ [បាតលិបុត្តនគរេយេវតំ បវិឋាបេសិឥតិបិកត្ថចិ].

១៦. តិរច្ឆានគតាបេវំ, សរន្តា ឧបការកំ;

ន ជហន្តីតិ មន្ត្វាន, កតញ្ញូ ហោន្តុ [ហោន្តិបាណិនោ-ឥតិបិកត្ថចិ] បាណិនោតិ.

តតោ បដ្ឋាយ សា បុញ្ញកម្មំ កត្វា សគ្គបរាយនា អហោសីតិ.

១៧. យោ យំ ទុមិន្ទំយតិនន្ទនេន;

សម្បូជិតំ បូជយតេ ស បញ្ញោ;

ស ភោគវា ហោតិ អនីតិកោ ច,

សព្ពត្ថ សោ ហោតិ បសត្ថរូបោ.

ពោធិរាជធីតុយា វត្ថុំ នវមំ.