៤០. កុណ្ឌលិយា វត្ថុម្ហិ អយមានុបុព្ពីកថា

លង្កាទីបេ រោហណជបទេ មហាគាមោ នាម អហោសិ, តត្ថ តិស្សវិហារំ នាម អនេកសតភិក្ខូហិ សមាកិណ្ណំ អនេកបរិវេណបតិមណ្ឌិតំ វិហារំ អហោសិ. តត្ថេកោ តិស្សោ នាម សាមណេរោ បដិវសតិ. សោ ឯកស្មិំសមយេ ជនបទចារិកំ ចរន្តោ បាសាណវាបិគាមេ ភិក្ខំ ចរិត្វា យាបនមត្តំ ភត្តំ សប្បិនា សទ្ធិំ លភិត្វា និក្ខម្ម គាមទ្វារំ បត្វា មហាគាមាភិមុខោ គច្ឆន្តោ មនុស្សេ ឧទកផាសុកដ្ឋានំ បុច្ឆិ. តេហិ ភន្តេ តុម្ហាកំ អភិមុខេ អវិទូរដ្ឋានេ កកុពន្ទកន្ទរំ នាម សន្ទមានសីតលោទកំ ធវលវាលុកាតលំ តត្ថ តុម្ហេ គន្ត្វា នហាត្វា សីតលច្ឆាយាយ វាលុកាតលេ និសិន្នោ ភត្តកិច្ចំ កត្វា គច្ឆថាតិ វុត្តេ សាមណេរោ សាធូតិ វត្វា តត្ថ គន្ត្វា ផាសុកដ្ឋានេ និសិន្នោ ភត្តំ ភុញ្ជិតុមារភិ. តទា ឯកេន វនកម្មិកេន សទ្ធិំអរញ្ញំ គតា ឯកា សុនខី តស្មិំ កន្ទរេ ឯកស្មិំ បព្ភារដ្ឋានេ ទារកេ វិជាយិត្វា ឆាតជ្ឈត្តា បវេធមានគត្តា ទារកានំ សមីបេនិបន្នា សាមណេរស្ស បត្តេ អាហារគន្ធំ ឃាយិត្វា និបន្នដ្ឋានតោ វុដ្ឋាយ បវេធមានា តស្ស សមីបំ អាគម្ម នង្គុដ្ឋំ ចាលេន្តី អដ្ឋាសិ, សាមណេរោ តំ ទិស្វា កម្បិតមានសោ អត្តនោ ភោជនត្ថាយ វដ្ដិតំ បថមាលោបំ តស្សា បុរតោ ឋបេសិ, តតោ សា សោមនស្សា តំ ភុញ្ជិ. តំ ទិស្វា តុដ្ឋោ បុនប្បុនំ អាលោបំ ករោន្តោ តស្សា ភត្តំ ទត្វា បត្តំ ធោវិត្វា ថវិកាយ បក្ខិបិត្វា អគមាសិ. តតោ សា សុនខី សាមណេរគតេន បសាទេន តតោ ចុតា ជម្ពុទីបេ ទេវបុត្តនគរេ រាជានំ បដិច្ច តស្ស មហេសិយា កុច្ឆិម្ហិ បដិសន្ធិំ គណ្ហិត្វា ទសមាសច្ចយេន មាតុកុច្ឆិតោ និក្ខមិ, អថស្សា សិខាមង្គលទិវសេ សម្បត្តេ មាតាបិតរោ បនស្សា កុណ្ឌលាវដ្ដកេសត្តា កុណ្ឌលាតិ នាម មកំសុ. សា អនុក្កមេន សោឡសវស្សុទ្ទេសិកា អហោសិ, តស្មិំ កិរ សមយេ តិស្សោ សាមណេរោ មហាពោធិំ វន្ទិស្សាមីតិ នាវំ អភិរុយ្ហ ជម្ពុទីបំ គន្ត្វា អនុបុព្ពេន ទេវបុត្តនគរំ បត្វា សុនិវត្ថោ សុបារុតោ យុគមត្តទសោ ភិក្ខាយ ចរន្តោ មហាវីថិំ សម្បាបុណិ. រាជធីតា សីហបញ្ជរំ ឧគ្ឃាដេត្វា អន្តរវីថិំ ឱលោកេន្តី ភិក្ខន្តំ សាមណេរំ ទិស្វា បុព្ពសិនេហំ បដិលភិ, តស្មិំខណេ តស្សា ជាតិស្សរញាណំ អហោសិ. សា កិរ បុព្ពេ ភិក្ខុណី ហុត្វា បណ្ណសូចិយា សទ្ធិំ បោត្ថកញ្ច បទីបិយតេលញ្ច ទត្វា ជាតិស្សរា ភវេយ្យំតិ បត្ថនំ ឋបេសិ, តតោ សាជាតិំ អនុស្សរន្តី សាមណេរេន អត្តនោ កតូបការំ ទិត្វា សោមនស្សា នំ បក្កោសាបេត្វា រាជគេហេ អាសនំ បញ្ញាបេត្វា តត្ថ និសិន្នំ នានគ្គរស ភោជនេន បរិវិសិត្វា ឱនីតបត្តបាណិំ សាមណេរំ ឧបសង្កមិត្វា វន្ទិត្វា ឯកមន្តំ និសិន្នា តេន សទ្ធិំ សល្លបន្តី ឯវមាហ.

១. ន សញ្ជានាសិ មំ ធីរ, បុព្ពេហំ តវ ទាសិកា;

តេនាហំ សុខិតា អាសិំ, តស្មា ត្វមសិ ឥស្សរោតិ.

តំ សុត្វា សាមណេរោ អាហ.

២. នត្ថិ មេ តាទិសី ទាសី, ន សញ្ជានាមិ តំ អហំ;

កាសិ ត្វំ កស្ស វា ធីតា, តំ មេ អក្ខាហិ បុច្ឆិតាតិ.

តតោ សា តំ សារាបេន្តី អាហ.

៣. សារាបេមិ តុវំ អជ្ជ, យថា ជានាសិមំ ឥសេ;

ពុជ្ឈស្សុ ពោធិតោ ទានិ, មយា ជាតិំសរន្តិយា.

៤. បាសាណវាបិគាមម្ហិ, តម្ពបណ្ណិម្ហិ រោហណេ;

ភិក្ខិត្វាន តុវំ ភន្តេ, យទា កកុពន្ទកន្ទរេ.

៥. និសីទិត្វាន ត្វំ ភត្តំ, ភុត្តកាលំ សរិស្សសិ;

តទាហំ សុនខី អាសិំ, វិជាតា លទ្ធគោចរា.

៦. ទារកេ ខាទិតុំ មយ្ហ, មាសន្នា ខុទបីឡិតា;

បវេធមានសព្ពង្គា, អដ្ឋាសិំ តវ សន្តិកេ.

៧. ទិស្វា តំ មំ តទា ភន្តេ, វេធមានំ ពុភុក្ខិតំ;

ឆិន្នភត្តោ តុវំ ហុត្វា, មមំ ភត្តេន តោសយី.

៨. តទាហំ មុទុចិត្តេន, ចិត្តំ តយិ បសាទយិំ;

តេនាហំ បុញ្ញកម្មេន, ទុតិយេ អត្តសម្ភវេ.

៩. ឥធ រាជកុលេ ជាតា, សព្ពកាមសមិទ្ធិនី;

ចិត្តប្បសាទមត្តេន, លោកនាថស្ស សាសនេ.

១០. តទហុបព្ពជិតស្សាបិ, ឦទិសា ហោន្តិ សម្បទា;

កីទិសំ ហោតិ សម្ពុទ្ធេ, បសាទេន ផលំ អហោ.

១១. អញ្ញានិ បន កិច្ចានិ, បហាយាត្តហិតេ រតោ;

អតន្ទិតោ ទិវារត្តិំ, សរាតុ រតនត្តយំតិ.

ឯវំ សាមណេរេន កតូបការំ សារាបេត្វា ភន្តេ តវ ទាសិយា អនុគ្គហំ បដិច្ច ឥធេវ វសថាតិ និមន្តិត្វា តេន សម្បដិច្ឆិតេ មហន្តំ វិហារំ ការាបេត្វា សាមណេរំ អាទិំ កត្វា អនេកភិក្ខុសតេ និមន្តេត្វា វិហារេ វសាបេត្វា សុលភំ កត្វា ចតុបច្ចយេហិ ឧបដ្ឋាសិ. សាមណេរោបិ សុនខិយា ទិន្នទានំ អនុស្សរិត្វា តុដ្ឋោ ពុទ្ធានុស្សតិំ មនសិករោន្តោ ន ចិរេនវ អរហត្តំ បត្វា តស្មិំយេវ វិហារេ វសន្តោ អាយុបរិយោសានេ តត្ថេវ បរិនិព្ពាយីតិ.

១២. តិយទ្ធេសុ តិលោកស្មិំ, នត្ថិ វត្ថុត្តយំ វិនា;

សត្តាន មញ្ញ មិច្ឆត្ថ, ទាយកំ សុរបាទបំ.

កុណ្ឌលិយា វត្ថុំ ទសមំ.

មហាសេនវគ្គោ ចតុត្ថោ.

ឯត្តាវតា ជម្ពុទីបុប្បត្តិកថា សមត្តា.