មហាសេនវគ្គោ

៣១. មហាសេនរញ្ញោ វត្ថុម្ហិ អយមានុបុព្ពីកថា

ភគវតិ បរិនិព្ពុតេ បាដលិបុត្តនគរេ មហាសេនោ នាម រាជា រជ្ជំ ការេសិ ធម្មិកោ ធម្មរាជា. សោ បន បិតុបិតាមហាទីនំ ធនរាសិំ ឱលោកេត្វា ឥមេ ឥមំ សាបតេយ្យំ បហាយ មច្ចុនោ មុខមុបគតា. អហោ សំសារិកានំ អញ្ញាណតា. ធនំ ឋបេត្វា អត្តនោ វិនាសញ្ច អត្តានំ ឋបេត្វា ធនវិនាសញ្ច ន ជានន្តីតិ សម្បត្តិយា អធិគមញ្ច វិនាសំ ចាតិ សព្ពំ ចិន្តេត្វា ធម្មញ្ច សុត្វា បដិលទ្ធសទ្ធោ ទិវសេ ទិវសេ ទសសហស្សានំ ភិក្ខូនំ មធុរេន អន្នបានេន សន្តប្បេន្តោ អនេកានិ បុញ្ញានិ ឧបចិនន្តោ ឯកទិវសំ រហោ បដិសល្លិនោ ឯវំ ចិន្តេសិ. ឯវំ រាជនិយោគេន ជនស្ស បីឡនំ កត្វា ទិន្នទានតោ សហត្ថេន កម្មំ កត្វា លទ្ធេន ទិន្នទានំ មហប្ផលំ មហានិសំសំ ភវិស្សតិ, ឯវំ មយា កាតព្ពន្តិ សោ សុហទា មច្ចស្ស រជ្ជំ នីយ្យាតេត្វា អត្តនោ កណិដ្ឋិកំ អាទាយ កិញ្ចិ អជានាបេត្វា អញ្ញតរវេសេន នគរា និក្ខម្ម ឧត្តរមធុរំ នាម នគរំ អគមាសិ, តត្ថ មហាវិភវោ ឯកោ សេដ្ឋិ បដិវសតិ, តេ សេដ្ឋិនោ សមីប មុបគម្ម ឋិតា. តេន កិមត្ថាយាគតាតិ វុត្តេ រាជា តវ គេហេ ភតិយា កម្មំ ករិស្សាមីតិ វត្វា តេនានុញ្ញាតោ តីណិ វស្សានិ កម្ម មកាសិ, តតោ ឯកទិវសំ សេដ្ឋិ តេ ទិស្វា បក្កោសិត្វា អតីវ តុម្ហេ សុខុមាលតរា. តថាបិ ឥមស្មិំ គេហេ កម្មករណេន ចិរំ វសិត្ថ, ឯត្តកំ កាលំ កិស្មិញ្ចិ កម្មេបិ កុសីតត្តំ ន បញ្ញាយតិ. បគេវ អនាចារម្បិ, យាគុភត្តំ ឋបេត្វា អញ្ញំ ឧបការម្បិ មម សន្តិកា នត្ថិ, កេនត្ថេន កម្មំ ករោថាតិ បុច្ឆិ. រាជា តស្ស វចនំ សុត្វា ឥមស្មិំ ជនបទេ សាលិនោ មនាបភាវោ ពហុសោ សូយតិ. តស្មា សាលីនមត្ថាយ ឥធា គតម្ហាតិ អាហ, តំ សុត្វា តេសំ តុដ្ឋោ សេដ្ឋិ សាលីនំ សកដសហស្សំ អទាសិ, រាជា សាលិំលភិត្វា សេដ្ឋិនោ ឯវមាហ, ភោ ឥមំ អម្ហាកំ នគរំ បាបេថាតិ, តំ សុត្វា សេដ្ឋិ សាធូតិ វត្វា សាលិបរិបុណ្ណសកដសហស្សំ រញ្ញោ នគរំ បាបេសិ, រាជា នគរំ គន្ត្វា សេដ្ឋិស្ស នានាវណ្ណវត្ថហិរញ្ញសុវណ្ណាទីហិ សកដេ បូរេត្វា បដិបេសេត្វា មេត្តិំ ថិរំ កត្វា អាភតវីហយោ រាជគេហេ សន្និចយមកាសិ, អថ រាជា កតិបាហច្ចយេន មុសលំ បគ្គយ្ហ សហត្ថេនេវ វីហិំ កោដ្ដេតិ, កោដ្ដិតកោដ្ដិតំ កណិដ្ឋិកា បប្ផោដេតិ. ឯវំ ឧភោបិ តណ្ឌុលានំ មហន្តំ រាសិំ កត្វា ទារូទកាទយោ អាហរិត្វា អម្ពិលភត្តំ បចិត្វា រាជគេហេ បញ្ចសតអាសនានិ បញ្ញាបេត្វា កាលំ ឧគ្ឃោសេសុំ, អាគច្ឆន្តុ អយ្យា អនុកម្បំ ឧបាទាយ មម គេហេ ភុញ្ជន្តូតិ. តំ សុត្វា បញ្ចសតា ភិក្ខូ អាកាសេន អាគមិំសុ, រាជា តេ យាវទត្ថំ បរិវិសិ, តតោ តេសំ អន្តរេ បិយំគុទីបវាសី ឯកោ មហាសិវត្ថេរោ នាម ភត្តំ គហេត្វា ឯតេ មំ បស្សន្តូតិ អធិដ្ឋហិត្វា អាកាសេន បិយំគុទីបំ គន្ត្វា ភត្តំ បញ្ចសតានំ ភិក្ខូនំ ទត្វា បរិភុញ្ចិ. តំ តស្សានុភាវេន សព្ពេសំ យាវទត្ថំ អហោសិ. ឯវំ អប្បកេនាបិ ទេយ្យធម្មេន សប្បុរិសា ទាយកានំ មនំ បសាទេត្វា បតិដ្ឋំ ករោន្តីតិ. វុត្តញ្ហិ.

១. អប្បកេនបិ មេធាវី, ទាយកានំ មនំ បតិ;

សទ្ធំ វឌ្ឍេន្តិ ចន្ទោវ, រំសិនា ខីរសាគរំ.

២. អដ្ឋានេ ន និយោជេន្តា, ករោន្តា នេវ សន្និធិំ;

បរិភោគ មកត្វាន, នេវ នាសេន្តិ បច្ចយំ.

៣. ន បាបេន្តាច ថេយ្យស្ស, ន ករោន្តា តថេវិណំ;

វិភជន្តិ សុសីលេសុ, សយំ ភុត្វាន សីលវាតិ.

អថ រាជា កណិដ្ឋិកាយ សទ្ធិំ ថត្ថេវ ឋិតោ បិយំគុទីបេ បរិភុញ្ជន្តេ បញ្ចសតភិក្ខូ ទិស្វា ហដ្ឋោ ឧទគ្គោ អហោសិ. អថ តេ អបរភាគេ អត្តនា កតំ ទានវរំ អនុស្សរន្តា ន ចិរេនេវ ឧភោបិ សោតាបន្នា អហេសុំតិ.

៤. ន គណេន្តាត្តនោ ទុក្ខំ, វិហាយ មហតិំ សិរិំ;

អាយតិំភវមិច្ឆន្តា, សុជនេវំ សុភេ រតា.

៥. អាយាសេន កតំ បុញ្ញំ, មហន្តផលទាយកំ;

ឥតិ មន្ត្វាន មេធាវី, សហត្ថេនេវ តំ ករេតិ.

មហាសេនរញ្ញោ វត្ថុំ បថមំ.

៣២. សុវណ្ណតិលកាយ វត្ថុម្ហិ អយមានុបុព្ពីកថា

លង្កាទីបេ កិរ អនុរាធបុរនគរេ ឯកោ មាតុគាមោ [ឯកាមាតុគាមាតិវា ឯកាមាតុគាមោតិវា កត្ថចិ] សទ្ធាសម្បន្នា និច្ចំ អភយុត្តរចេតិយេ បុប្ផបូជំ ករោតិ, អថេកទិវសំ សា អត្តនោ ធីតុយា សទ្ធិំ តស្មិំ ចេតិយេ បុប្ផបូជនត្ថាយ [បុប្ផបូជត្ថាយ ឥតិកត្ថចិ] គន្ត្វា បុប្ផាសនសាលាយ ឧទកំ អបស្សន្តី ធីតុ ហត្ថេ បុប្ផចង្គោដកំ ឋបេត្វា ឃដ មាទាយ បោក្ខរណិំ អគមាសិ, តតោ សា ទារិកា មាតរិ អនាគតាយយេវ [អនាគតេយេវ ឥតិសព្ពត្ថ] អធោតាសនេ បុប្ផមុដ្ឋិំគហេត្វា មណ្ឌលំ កត្វា បូជេត្វា ឯវំ បត្ថនមកាសិ. តថា ហិ.

១. មហាវីរស្ស ធីរស្ស, សយម្ភុស្ស មហេសិនោ;

តិលោកគ្គស្ស នាថស្ស, ភគវន្តស្ស សត្ថុនោ.

២. យ មហំ បូជយិំ បុប្ផំ, តស្ស កម្មស្ស វាហសា;

រូបីនំ បវរា ហេស្សំ, អារោហបរិណាហវា.

៣. មំ ទិស្វា បុរិសា សព្ពេ, មុច្ឆន្តុ កាមមុច្ឆិតា;

និច្ឆរន្តុ សរីរា មេ, រំសិមាលីវ រំសិយោ.

៤. ហទយង្គមា កណ្ណសុខា, មញ្ជុភាណី សុភា មម;

កិន្នរានំ យថា វាណី, ឯវមេវ បវត្តតូតិ.

អថស្សា មាតា អាគម្ម អធោតាសនេ បូជិតានិ បុប្ផានិ ទិស្វា កស្មា ចណ្ឌាលី អធោតាសនេ ភគវតោ បុប្ផានិ បូជេសិ, អយុត្តំ តយា កតន្តិ អាហ, តំ សុត្វា សា មាតុយា កុជ្ឈិត្វា ត្វំ ចណ្ឌាលីតិ អក្កោសិ, សា ឯត្តកំ បុញ្ញាបុញ្ញំ កត្វា អបរភាគេ តតោ ចុតា ជម្ពុទីបេ ឧត្តរមធុរាយំ ឯកស្ស ចណ្ឌាលគន្ធព្ពព្រាហ្មណស្ស ធីតា ហុត្វា និព្ពត្តិ, ឧត្តមរូបធរា អហោសិ, តស្សា សរីរតោ មេឃមុខតោ វិជ្ជុល្លតាវិយ រំសិយោ និច្ឆរន្តិ. សមន្តា ចតុហត្ថដ្ឋានេ សរីរប្បភាយ អន្ធការេ វិធមតិ. មុខតោ ឧប្បលគន្ធោ វាយតិ, កាយតោ ចន្ទនគន្ធោ, តស្សា ទ្វិន្នំ ថនាន មន្តរេ សុវណ្ណវណ្ណំ ឯកំ តិលកំ អហោសិ, តេន ពាលសុរិយស្ស វិយ បភា និច្ឆរតិ. ទិដ្ឋទិដ្ឋា យេភុយ្យេន ឧម្មត្តា វិយ កាមមទេន វិសញ្ញិនោ ហោន្តិ, អហោ កុសលាកុសលានំ អានុភាវោ. តថា ហិ.

៥. យេន សា កោធសាមាតុ, ចណ្ឌាលី ឥតិ ភាសិតា;

តេន សា អាសិ ចណ្ឌាលី, ជេគុច្ឆា ហីនជាតិកា.

៦. សល្លក្ខេត្វាន សម្ពុទ្ធ, គុណំ បូជេសិ យំ តទា;

តេន បុញ្ញានុភាវេន, សា ភិរូបី មនោរមា.

៧. យេន យេន បការេន, បុញ្ញបាបានិ យោ ករេ;

តស្ស តស្សានុរូបេន, មោរោវ លភតេ ផលំ.

៨. បាបេន ច តិរច្ឆានេ, ជាយន្តិ កុសលេន តេ;

វណ្ណបោក្ខរតា ហោតិ, មោរានំ កម្ម មីទិសន្តិ.

តតោ តស្សា មាតាបិតរោ សុវណ្ណតិលកាតិ នាម មកំសុ. តស្មិំកិរ នគរេ មនុស្សា តស្សា រុបទស្សនេនច សវណេនច សម្បត្តាបិ ចណ្ឌាលធីតា អយន្តិ បរិភវភយេន អាវាហំ ន ករោន្តិ. អថ តស្មិំ នគរេ ជេដ្ឋចណ្ឌាលព្រាហ្មណស្ស បុត្តោ ឯតមត្ថាយ តស្សា មាតាបិតុន្នំ សន្តិកំ វត្ថាភរណគន្ធមាលាទយោ បេសេសិ សុវណ្ណតិលកំ អម្ហាកំ ទទន្តូតិ, តេ តំ បវត្តិំ តស្សា អារោចេសុំ. សាស្ស ជិគុច្ឆន្តី បរិហាស មកាសិ. តតោ ព្រាហ្មណស្ស បុត្តោ លជ្ជិតោ រញ្ញោ សន្តិកំ គន្ត្វា វីណំ មុញ្ចេត្វា គាយមានោ ឯវមាហ.

៩. លលនា ននានី ចលលោចនានី,

តរុណា រុណានី ចលិតាធរាណី;

មនុជោ ហិ យោ នេត្តបិយំ ករោតិ,

ស តុ នីចជាតិំ អបិ នោ ជហាតិ.

កិមិទន្តិ រញ្ញា បុដ្ឋោ អាហ.

១០. សមេតិ កិំ ទេវ ឆមាយ មត្តិកា,

កទាចិ ចាមីករជាតិកាយ;

សិគាលធេនុ អបិ នីចជាតិកា,

សមេតិ កិំសីហវរេន ទេវាតិ.

ឯវញ្ច បន វត្វា ទេវ ឥមស្មិំនគរេ សុវណ្ណតិលកា នាមេកា ចណ្ឌាលធីតា អត្ថិ, សា សមានជាតិកេហិ បេសិតបណ្ណាការំ ន គណ្ហាតិ, កុលវន្តេយេវ បត្ថេតិ, កទា នាម កាកី សុវណ្ណហំសេន សមាគច្ឆតិ ទេវាតិ. រាជា តំ សុត្វា តស្សា បិតរំ បក្កោសាបេត្វា តមត្ថំ វត្វា សច្ចំ ភណេតិ បុច្ឆិ, សោបិ សច្ចំ ទេវ, សា ជាតិសម្បន្នមេវ កាមេតីតិ អាហ. រាជា ឯវំ សតិ ភណេ បញ្ចមធុរនគរេ ឧទ្ទាឡព្រាហ្មណោ នាម អត្ថិ, សោ ជាតិសម្បន្នោ មាតិតោច បិតិតោច អនុបក្កុដ្ឋោ, ជេគុច្ឆា បដិក្កូលា ឯតាតិ មាតុគាមេន សទ្ធិំ ន សំវសតិ. អត្តនោ គេហតោ រាជគេហំ គច្ឆន្តោច អាគច្ឆន្តោ ច សោឡសខីរោទកឃដេហិ មគ្គេ សិញ្ចាបេសិ. មាតុគាមេ ទិស្វា កាលកណ្ណី មយា ទិដ្ឋាតិ ខីរោទកេន មុខំ ធោវតិ. តវ ធីតា សក្កោន្តី តេន សទ្ធិំ សំវសតុ, ឯតមត្ថំ តវ ធីតរំ កថេហីតិ អាហ, សោបិ តំ សុត្វា គេហំ គន្ត្វា ធីតរំ បក្កោសិត្វា រញ្ញា វុត្តនិយាមេនេវ តស្សា កថេសិ. តាយ តំ សុត្វា សក្កោន្តី អហំ ឧទ្ទាឡព្រាហ្មណេន សទ្ធិំ វសិស្សាមិ, មា តុម្ហេ ចិន្តេថ, បបញ្ចម្បិ មា ករោថ, បាតោវ គមិស្សាមីតិ វុត្តេ បិតា បនស្សា សាធូតិ សហស្សគ្ឃនកចិត្តកម្ពលកញ្ចុកេន ធីតុ សរីរំ បារុបាបេត្វា វីណាទិតុរិយភណ្ឌានិ គាហាបេត្វា ធីតុយា សទ្ធិំ អទ្ធានមគ្គំ បដិបជ្ជិ. គច្ឆន្តោ អន្តរាមគ្គេ អញ្ញតរស្មិំ នគរេ រញ្ញោ គន្ធព្ពំ ករោន្តោ ធីតរំ បិដ្ឋិបស្សេ និសីទាបេត្វា គន្ធព្ពមកាសិ. អថស្ស បិដ្ឋិបស្សនិសិន្នា សុវណ្ណតិលកា នយនកោដិយា ទិដ្ឋិំ បាបេន្តី សរសេន តំ ឱលោកេត្វា បារុតកញ្ចុកំ កិញ្ចិ អបនេត្វា សរីរប្បភំ បញ្ញាបេសិ, រាជា បនស្សា សរីរប្បភំច រូបសម្បទំច ទិស្វា កាមាតុរោ វិគតសញ្ញោ សម្មូឡ្ហោ ហុត្វា មុហុត្តេន បដិលទ្ធស្សាសោ តស្សា សស្សាមិកាស្សាមិកភាវំ បុច្ឆិត្វា ចណ្ឌាលធីតាតិ សុត្វា បរិភវភយេន តំ អានេតុ មសក្កោន្តោ ឯវរូបំ វណ្ណបោក្ខរសម្បន្នំ ឥត្ថិរតនំ អលភន្តស្ស មេ កោ អត្ថោ ជីវិតេនាតិ សោចន្តោ បរិទេវន្តោ កាមមុច្ឆិតោ កត្តព្ពា កត្តព្ពំ អជានន្តោ អសិំ គហេត្វា អត្តនោ សីសំ សយមេវ ឆិន្ទិត្វា កាល មកាសិ. ឯវមេវ អន្តរាមគ្គេ បញ្ចរាជានោ តស្សា រូបសម្បត្តិមទមត្តា អសិនា ឆិន្នសីសា ជីវិតក្ខយំ បាបុណិំសុ. តថា ហិ សត្តា ហិរញ្ញសុវណ្ណទាសិទាស បុត្តទារាទីសុ [បុត្តទារាទីហិ ឥតិសព្ពត្ថ] បិយំ និស្សាយ កាមេន មុច្ឆិតា អនយព្យសនំ បាបុណន្តីតិ. វុត្តញ្ហេតំ ភគវតា.

១១. បិយតោ ជាយតេ សោកោ,

បិយតោ ជាយតេ ភយំ;

បិយតោ វិប្បមុត្តស្ស,

នត្ថិ សោកោ កុតោ ភយំ.

១២. បេមតោ ជាយតេ សោកោ,

បេមតោ ជាយតេ ភយំ;

បេមតោ វិប្បមុត្តស្ស,

នត្ថិ សោកោ កុតោ ភយំ.

១៣. រតិយា ជាយតេ សោកោ,

រតិយា ជាយតេ ភយំ;

រតិយា វិប្បមុត្តស្ស,

នត្ថិ សោកោ កុតោ ភយំ.

១៤. កាមតោ ជាយតេ សោកោ,

កាមតោ ជាយតេ ភយំ;

កាមតោ វិប្បមុត្តស្ស,

នត្ថិ សោកោ កុតោ ភយំ.

១៥. តណ្ហាយ ជាយតេ សោកោ,

តណ្ហាយ ជាយតេ ភយំ;

តណ្ហាយ វិប្បមុត្តស្ស,

នត្ថិ សោកោ កុតោ ភយំ.

តតោ សោ អនុក្កមេន បញ្ចមធុរនគរំ គន្ត្វា អត្តនោ អាគតភាវំ រញ្ញា កថាបេត្វា តេន អនុញ្ញាតោ គន្ត្វា រាជានំ អទ្ទស. តទា ឧទ្ទាឡព្រាហ្មណោ រញ្ញោ អវិទូរេ កម្ពលភទ្ទបីឋេ និសិន្នោ ហោតិ, គន្ធព្ពព្រាហ្មណោបិ ធីតុយា សទ្ធិំ គន្ធព្ពំ កុរុមានោ និសីទិ. តស្មិំខណេ បិតុ បិដ្ឋិបស្សេ និសិន្នា សុវណ្ណតិលកា ឧទ្ទាឡព្រាហ្មណោ កតមោតិ បុច្ឆិត្វា ឯតស្មិំ ភទ្ទបីឋេ និសិន្នោំ ឯសោតិ សុត្វា និលាមលលោចនេហិ តំ ឱលោកន្តិ ទសនរំសិនា សម្ភិន្នសុរត្តាធរេន មន្ទហសិតំ ករោន្តី តំ ឱលោកេត្វា បារុតកញ្ចុកំ អបនេត្វា សរីរប្បភំ វិស្សជ្ជេសិ. តំ ទិស្វា ព្រាហ្មណោ ឧម្មត្តោ សោកេន បរិទឌ្ឍគត្តោ ឧណ្ហវាតេន បូរិតមុខនាសោ អស្សុនា កិលិន្ននេត្តោ វិសញ្ញី អហោសិ. តតោ សោ មុហុត្តេន លទ្ធស្សាសោ រោគីវិយ រញ្ញោ សកាសា អបសរន្តោ អត្តនោ គេហំ គន្ត្វា សុហទេ បក្កោសិត្វា តេសំ ឯវមាហ. ភវន្តេត្ថ.

១៦. យោ អាបទេ សមុប្បន្នេ,

ឧបតិដ្ឋតិ សន្តិកេ;

សុខទុក្ខេ សមោ ហោតិ,

សោ មិត្តោ សោច ញាតកោ.

១៧. យោ គុណំ ភាសតេ យស្ស, អគុណញ្ច និគូហតិ;

បដិសេធេត្យ [បដិសេធេតិកត្តព្ពា ឥតិសព្ពត្ថ] កត្តព្ពា, សោ មិត្តោ សោច ញាតកោ.

១៨. សុវណ្ណតិលកានាម, លលនា កាមលាលយា;

នីលក្ខិចណ្ឌកណ្ឌេហិ, វិខណ្ឌេសិ មនោ មម.

១៩. តស្សា មុខម្ពុជេ សត្តា, មម នេត្តមធុព្ពតា,

អប្បម្បិន សរន្តាមំ, តត្ថេវា ភិរមន្តិ តេ.

២០. សហេវ តេហិ មេ ចិត្តំ, គតំ ឧល្លំឃិយុទ្ធតោ;

លជ្ជាគម្ភីរបរិខំ, ធិតិបាការមុគ្គតំ.

២១. សម្មុយ្ហាមិ បមុយ្ហាមិ, សព្ពា មុយ្ហន្តិ មេ ទិសា;

តស្ស មេ សរណំ ហោថ, ករោថ មម សង្គហន្តិ.

តំ សុត្វា តេ ឯវមាហំសុ.

២២. យំ ត្វមាចរិយ បត្ថេសិ, ចណ្ឌាលី សា អសង្គមា;

កិន្នុ មីឡ្ហេន សំយោគោ, ចន្ទនស្ស កទា សិយា.

២៣. អគម្មគមនា យាតិ, នរានំ ទូរតោ សិរី;

កិត្តិចាយុ ពលំ ពុទ្ធិ, អយសំច ស គច្ឆតីតិ.

អថ តេសំ ព្រហ្មណោ អាហ.

២៤. ន បរិច្ចជតិ លោកោយំ, អមេជ្ឈេ មណិមុត្តមំ;

ថីរតនំ យុវាណី ច, ទុក្កុលា អបិ គាហិយាតិ.

ឯវញ្ច បន វត្វា តស្សា សស្សាមិកាស្សាមិកភាវំ ញត្វា អានេថាតិ អាហ, តេ តថា អកំសុ. តតោ ព្រាហ្មណោ តាយ គេហំ អាគតកាលតោ បដ្ឋាយ ចត្តារោ មាសេ រញ្ញោ ឧបដ្ឋានំ នេវ អគមាសិ. តស្ស បន ព្រហ្មណស្ស សន្តិកេ បញ្ចសតរាជកុមារា នានាវិធានិ សិប្បានិ ឧគ្គណ្ហន្តិ. តេ តំ ការណំ ញត្វា សុវណ្ណតិលកាយ វិជ្ជមានាយ អម្ហាកំ សិប្បុគ្គហណស្ស អន្តរាយោ ភវិស្សតិ, យេន កេនចិ ឧបាយេន ឯតំ មារេតុំ វដ្ដតីតិ, ចិន្តេត្វា តេ ហត្ថា ចរិយំ បក្កោសិត្វា លញ្ជំ ទត្វា ឯវមាហំសុ, ហត្ថិំ សុរាយ មត្តំ កត្វា សុវណ្ណតិលកំ មារេហីតិ. តតោ តេ សព្ពេ រាជង្គណេ សន្និបតិត្វា ទូតំ បាហេសុំ, អាចរិយំ ទដ្ឋុកាមម្ហាតិ. តតោ ព្រាហ្មណេន អាគន្ត្វា និសិន្នេន បដិសន្ថារំ កត្វា អាចរិយ អាចរិយានិំ បស្សិតុកាមម្ហាតិ អាហំសុ. អថ សោ សុវណ្ណតិលកំ គហេត្វា អាគច្ឆថាតិ មនុស្សេ បេសេសិ. តេ តថា ករិំសុ, អថ តស្សា វីថិមជ្ឈំ សម្បត្តកាលេ ហត្ថិំ វិស្សជ្ជាបេសុំ. សោ សោណ្ឌាយ ភូមិយំ បហរន្តោ [បហរន្តោឧបធាវិត្វា ឥតិកត្ថចិ] គច្ឆន្តោ ឧបធាវិត្វា សោណ្ឌេន តំ ឧក្ខិបិត្វា កុម្ភេ និសីទាបេសិ. តតោ រាជានោ តថា តំ មារាបេតុ មសក្កោន្តា បុន ទិវសេ មនុស្សេ បយោជេត្វា រត្តិយំ មារាបេសុំ. ព្រាហ្មណោបិ ឯវរូបំ ឥត្ថិំ អលសិត្វា ជីវនតោ មតមេវ [មតំមេសេយ្យោ ឥតិកត្ថចិ] សេយ្យោតិ សោចន្តោ បរិទេវន្តោ រាជង្គណេ ទារុចិតកំ ការាបេត្វា អគ្គិំបវិសិត្វា មតោតិ. ឯវំ មាតុគាមវសង្គតា មហន្តំ អនយព្យសនញ្ច មរណញ្ច បាបុណន្តីតិ. វុត្តញ្ហេតំ ភគវតា.

២៥. មាយាវេសា [មាយាចេសា ឥតិកត្ថចិ] មរីចីវ,

សោកោ រោគោ ចុបទ្ទវោ;

ខរាវ ពន្ធនា ចេសា,

មច្ចុបាសោ គុហាសយោ;

តាសុ យោ វិស្សសេ បោសោ,

សោ នរេសុ នរាធមោតិ.

២៦. អយោនិសោ សា បុរិមាយ ជាតិយា,

បុញ្ញំ ករិត្វា អលភីទិសំ គតិំ;

ធីសម្បយុត្តំ [ធិតិសម្បយុត្តំ ឥតិកត្ថចិ] កុសលំ ករោន្តា,

និព្ពាណមេវាភិមុខំ ករោថាតិ.

សុវណ្ណតិលកាយ វត្ថុំ ទុតិយំ.

៣៣. កបណាយ វត្ថុម្ហិ អយមានុបុព្ពីកថា

ភគវតិ បរិនិព្ពុតេ ជម្ពុទីបេ តត្ថ តត្ថ ភិក្ខុភិក្ខុណិយោ ច ឧបាសកឧបាសិកាយោ ច ជយមហាពោធិំ វន្ទិស្សាមីតិ យេភុយ្យេន គន្ត្វា វន្ទន្តិ. អថា បរភាគេ ពហូ ភិក្ខូ សង្គម្ម មហាពោធិំ វន្ទនត្ថាយ គច្ឆន្តា អញ្ញតរស្មិំ គាមកេ ភិក្ខាយ ចរិត្វា អាសនសាលំ គន្ត្វា កតភត្តកិច្ចា ថោកំ វិស្សមិំសុ, តទា តត្ថ ឯកា កបណា ទុគ្គតិត្ថី តថា និសិន្នភិក្ខូ ទិស្វា ឧបសង្កមិត្វា បញ្ចបតិដ្ឋិតេន វន្ទិត្វា ឯកមន្តេ ឋិតា អយ្យា កុហិំ គច្ឆន្តីតិ បុច្ឆិ. ភិក្ខូ តំ សុត្វា ជយមហាពោធិស្ស អានុភាវញ្ច តំ វន្ទនត្ថាយ អត្តានំ គមនញ្ច កថេន្តា ឯវមាហំសុ.

១. យត្ថាសីនោ ជិនោ ជេសិ, សសេនំ មករទ្ធជំ;

ហន្ត្វា កិលេសសេនញ្ច, ពុទ្ធោ អាសិ និរុត្តរោ.

២. យំ បូជេសិ មហាវីរោ, ឋិតោ បទ មកោបយំ;

សត្តរត្តិន្ទិវំ នេត្ត, នីលនីរជរំសិនា.

៣. សុរាសុរនរាទីនំ, នេត្តាលិ បាឡិបាតនា;

មេចកាការបត្តេហិ, សិខណ្ឌីវិយ ភាតិ យោ.

៤. សុរបាទបោវ សត្តានំ, យំ តិដ្ឋតិ មហីតលេ;

ឥហ លោកេ បរត្តេ ច, ទទន្តោ ឥច្ឆិតិច្ឆិតំ.

៥. យស្ស បុរាណបណ្ណម្បិ, បតិតំ យោ នរោ ឥធ;

បូជេតិ តស្ស សោ ទេតិ, ភវភោគំ មហីរុហោ.

៦. គន្ធមាលេហិ សលិលេហិ, យមុបាសតិ សទា នរោ;

អជ្ឈត្តញ្ច ពហិទ្ធា ច, ទុរិតំ សោ និហញ្ញតិ.

៧. យោ ទេតិ ឥហលោកត្ថំ,

យោ ទេតិ បារលោកិកំ,

សម្បទំ ជយពោធិំតំ,

ភោតិ គច្ឆាម វន្ទិតុំ.

តំ សុត្វា ឧទគ្គា សោមនស្សជាតា ភិក្ខូនំ ឯវមាហ. អហំ ភន្តេ បរកុលេ ភតិយា កម្មំ ករោន្តី ទុក្ខេន កសិរេន ជីវិកំ កប្បេមិ. ស្វាតនាយ មេ តណ្ឌុលនាលិបិ [ភណ្ឌុលនាម្ប ឥតិសព្ពត្ថ] នត្ថិ, បគេវ អញ្ញំ ធនំ, ឥមំ វិនា អញ្ញំ សាដកម្បិ នត្ថិ, កស្មា បុព្ពេ អកតបុញ្ញត្តា, តស្មា ឥមំ ភន្តេ សាដកំ មមានុគ្គហាយ ពោធិម្ហិ ធជំ ពន្ធថាតិ យាចិត្វា សាដកំ ធោវិត្វា តេសំ អទាសិ. ភិក្ខូបិ តស្សានុគ្គហាយ តំ គហេត្វា អគមំសុ. សា សាដកំ ទត្វា បីតិបាមោជ្ជមានសា គេហំ គន្ត្វា តទហេវ រត្តិយា មជ្ឈិមយាមេ សត្ថកវាតេន ឧបហតា កាលំ កត្វា តេសំ ភិក្ខូនំ គមនមគ្គេ ឯកស្មិំ រមណីយេ វនសណ្ឌេ ភុម្មទេវតា ហុត្វា និព្ពត្តី, អថស្សា បុញ្ញានុភាវេន តិយោជនិកេ ឋានេ ទិព្ពកប្បរុក្ខា បាតុរហំសុ, តត្ត តត្ត នានាវិរាគធជបតាកា ឱលម្ពន្តិ. ទេវបុត្តា ច ទេវធីតរោ ច សព្ពាភរណវិភូសិតា តថេវ ធជបតាកាទយោ គហេត្វា កីឡន្តិ. នច្ចគីតាទិនេកានិ អច្ឆរិយានិ បយោជេន្តិ. អថ ទុតិយទិវសេ តេបិ ភិក្ខូ ពោធិមណ្ឌលំ គច្ឆន្តា សាយណ្ហេ តំ ឋានំ បត្វា អជ្ជ ឥមស្មិំ វនសណ្ឌេ វសិត្វា គមិស្សាមាតិ តត្ថ វាសំ ឧបគមិំសុ, តតោ តេ រត្តិភាគេ នានាវណ្ណធជេ ច ទេវតាហិ បយោជិយមានា គីតវាទិតាទយោ ច តិយោជនដ្ឋានេ កប្បរុក្ខានិ ច ឥទំ សព្ពំ ទេវិស្សរិយំ តស្សានុភាវេន និព្ពត្តភាវំ ទិស្វា វិម្ហិតមានសា ទេវធីតរំ អាមន្តេត្វា ត្វំ កេន កម្មេន ឥធ និព្ពត្តាតិ បុច្ឆិំសុ. សា ភិក្ខូ វន្ទិត្វា អញ្ជលិំ បគ្គយ្ហ ឋិតា ភន្តេ មំ ន សញ្ជានិត្ថាតិ អាហ. ភិក្ខូហិ ន មយំ សញ្ជានាម ភគិនីតិ វុត្តេ សា អត្តនោ សភាវំ កថេន្តី ឯវមាហ.

៨. ហីយ្យោ អាសនសាលាយ, និសីទិត្ថ សមាគតា;

តុម្ហកំ សន្តិកំ គម្ម, យា វរាកីភិវាទយិ.

៩. យា ពោធិំ បូជនត្ថាយ, វត្ថកំ បដិបាទយិ;

សាហំ ហីយ្យោ ចុតា អាសិំ, រត្តិយំ ព្យាធិបីឡិតា.

១០. នានាសម្បត្តិសំយុត្តា, នានាភូសនភូសិតា;

វិមានេ រតនា កិណ្ណេ, ជាតាហំ ឯត្ថ កាននេ.

១១. ហីយ្យោ បស្សិត្ថ មេ គត្តំ, រជោជល្លេហិ សំកុលំ;

អជ្ជ បស្សថ មេ គត្តំ, វណ្ណវន្តំ បភស្សរំ.

១២. ហីយ្យោ បស្សិត្ថ មេ ភន្តេ, និវត្ថំ មលិនម្ពរំ;

អជ្ជ បស្សថ មេ ភន្តេ, ទិព្ពមម្ពរមុត្តមំ.

១៣. វិកិណ្ណផលិតគ្គេហិ, កេសេហិ វិរលា កុលំ;

ឩកាគូថបដិក្កូលំ, ហីយ្យោ អាសិសិរំ មម.

១៤. អជ្ជ តំ បរិវត្តិត្វា, មម បុញ្ញានុភាវតោ;

សុនីលមុទុធម្មិល្លំ, កុសុមា ភរណភូសិតំ.

១៥. បុរា មេ សកសីសេន, វហិតំ ទារូ ទកាទិកំ;

បុញ្ញេនាហំ អជ្ជ មាលា, ភារំ សីសេ សមុព្ពហេ.

១៦. ធជត្ថាយ មយា ហីយ្យោ, បទិន្នំ ថូលសាដកំ;

អជ្ជ និព្ពត្តិ មេ ភោន្តោ, មហន្តំ ទិព្ពសម្បទំ.

១៧. ជានមានេន កត្តព្ពំ, ទានាទីសុ មហប្ផលំ;

ទេវលោកេ មនុស្សេសុ, សុខទំ ទាន មុត្តមន្តិ.

តំ សុត្វា សព្ពេ ភិក្ខូ អច្ឆរិយព្ភុតចិត្តា អហេសុំ. សា ទេវតា តស្សា រត្តិយា អច្ចយេន ភិក្ខូ និមន្តេត្វា ទិព្ពេហិ ខជ្ជភោជ្ជេហិ សហត្ថា សន្តប្បេត្វា តេហិ សទ្ធិំ អាគច្ឆន្តី អន្តរាមគ្គេ ទានំ ទទមានា មហាពោធិំ គន្ត្វា សព្ពេហិ ធជបតាកា ទីហិ ច នានាវិធវណ្ណគន្ធសម្បន្នបុប្ផេហិ ច ទីបធូបេហិ ច ពោធិំ បូជេត្វា ភិក្ខូនំ ចីវរត្ថាយ ទិព្ពវត្ថានិ ទត្វា អាគម្ម តស្មិំយេវ វនសណ្ឌេ វសន្តី នានាវិធានិ បុញ្ញានិ កត្វា តាវតិំសភវនេ និព្ពត្តិ. ភិក្ខូបិ តំ អច្ឆរិយំ តត្ថ តត្ថ បកាសេន្តា ពហូជនេ បុញ្ញកម្មេ និយោជេសុំតិ.

១៨. ឯវំ វិធាបិ កបណា ជិនសាសនម្ហិ,

កត្វា បសាទ មថ ថូលកុចេលកេន;

បូជេត្វ ទិព្ពវិភវំ អលភីតិ ញត្វា,

បូជាបរា ភវថ វត្ថុសុ តីសុ សម្មាតិ.

កបណាយ វត្ថុំ តតិយំ.

៣៤. ឥន្ទគុត្តត្ថេរស្ស វត្ថុម្ហិ អយមានុបុព្ពីកថា

អម្ហាកំ ភគវតោ បរិនិព្ពាណតោ ឱរភាគេ ជម្ពុទីបេ កិរ បាដលិបុត្តំ នាម នគរំ អហោសិ. តត្ថ ធម្មាសោកោ នាម មហិទ្ធិកោ មហានុភាវោ អាណាចក្កវត្តិ រាជា រជ្ជំ ការេតិ. ឧទ្ធំ អាកាសតោ ហេដ្ឋា បថវិយា យោជនប្បមាណេ សកលជម្ពូទីបេ តស្ស អាណា បវត្តតិ, តទា សកលជម្ពុទីបវាសិនោ ច ចតុរាសីតិ នគរសហស្សេ រាជានោ ច អត្តនោ អត្តនោ ពលវាហនេ គហេត្វា អាគម្ម ធម្មាសោកមហារញ្ញោ ឧបដ្ឋានំ ករោន្តិ. តស្មិំ សមយេ ទេវបុត្តនគរេ ទេវបុត្តោ នាម មហារាជា អត្តនោ ពលវាហនំ គហេត្វា រញ្ញោ ឧបដ្ឋានំ អគមាសិ. ធម្មាសោកោ ទេវបុត្តមហារាជានំ ទិស្វា មធុរបដិសន្ថារំ កត្វា តុម្ហាកំ រដ្ឋេ ពហុស្សុតា អាគតាគមា មហាគុណវន្តា អយ្យា អត្ថីតិ បុច្ឆិ. តំ សុត្វា ទេវបុត្តរាជា អត្ថិ ទេវ តស្មិំ នគរេ សីហកុម្ភកំ នាម មហាវិហារំ. តត្ថ អនេកសហស្សភិក្ខូ វិហរន្តិ សីលវន្តា អប្បិច្ឆា សន្តុដ្ឋា វិវេកកាមិនោ. តេសុ សាដ្ឋកថាតិបិដកធរោ ឥន្ទគុត្តត្ថេរោ នាម តេសំ បាមោក្ខោ អហោសិ. សោ អនេកបរិយាយេន សនរាមរានំ ភិក្ខូនំ ធម្មំវណ្ណេតិ. គុណវា អត្តនោ គុណំ និស្សាយ លោកេ បាកដោតិ. តំ សុត្វា រាជា តុដ្ឋមានសោ ថេរំ បស្សិតុកាមោ ហុត្វា សម្ម ត្វមេវ គន្ត្វា ថេរំ យាចិត្វា ឥធា នេហីតិ អាហ. តំ សុត្វា ទេវបុត្តរាជា អត្តនោ ហត្ថស្សពលវាហនា ទិមហា សេនង្គបរិវុតោ ឥន្ទគុត្តត្ថេរស្ស សន្តិកំ គន្ត្វា វន្ទិត្វា អយ្យ អយ្យំ ធម្មាសោកមហារាជា ទដ្ឋុកាមោតិ អាហ. ថេរេន សាធូតិ សម្បដិច្ឆិតេ រាជា ថេរេន សម្បដិច្ឆិតភាវំ ធម្មាសោកមហារាជិនោ បេសេសិ. តតោ ធម្មាសោកមហារាជា សោមនស្សប្បត្តោ អត្តនោ អាណាបវត្តិតដ្ឋានេ រាជូនំ សាសនំ បេសេសិ. សព្ពេវ ថេរាគមនមគ្គំ អលង្ករោន្តូតិ. អថ តេ រាជានោ តុដ្ឋបហដ្ឋា អត្តនោ អត្តនោ នគរេ ភេរិំ ចរាបេត្វា ទេវបុត្តនគរតោ យាវ បាដលិបុត្តនគរំ ឯត្ថន្តរេ បញ្ចបណ្ណាសយោជនិកំ មគ្គំ វិសមំ សមំ ករោន្តោ ទេវតានំ ទិព្ពវីថិមិវ អលង្ករិត្វា ធម្មាសោកមហានរិន្ទស្ស ឯវំ សាសនំ បេសេសុំ. ភវន្តេត្ថ.

១. ឥន្ទគុត្តមហាថេរ, សាមិនោ គមនាយ នោ;

មគ្គំ អលង្ករោន្តូតិ, មហារាជេន បេសិតំ.

២. តតោ តេ អបនេត្វាន, បាសាណកណ្ដកាទិកំ;