១១. ភេទានុវត្តក សិក្ខាបុច្ឆា

បុច្ឆា – យំ តេន អាវុសោ ភគវតា…បេ… សម្មាសម្ពុទ្ធេន ភេទានុវត្តកានំ ភិក្ខូនំ យាវតតិយំ សមនុភាសនាយ អប្បដិនិស្សជ្ជន្តានំ សង្ឃាទិសេសោ កត្ថ បញ្ញត្តោ.

វិស្សជ្ជនា – រាជគហេ ភន្តេ បញ្ញត្តោ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តោ.

វិស្សជ្ជនា – សម្ពហុលេ ភន្តេ ភិក្ខូ អារព្ភ បញ្ញត្តោ, សម្ពហុលា ភន្តេ ភិក្ខូ ទេវទត្តស្ស សង្ឃាភេទាយ បរក្កមន្តស្ស អនុវត្តកា អហេសុំ វគ្គវាទកា, តស្មិំ ភន្តេ វត្ថុស្មិំ បញ្ញត្តោ.