សង្ឃាទិសេស សិក្ខាបុច្ឆា

១. សុក្កវិស្សដ្ឋិសង្ឃាទិសេស សិក្ខាបុច្ឆា

បុច្ឆា – យំ តេន អាវុសោ ភគវតា ជានតា បស្សតា អរហតា សម្មាសម្ពុទ្ធេន ឧបក្កមិត្វា អសុចិំ មោចេន្តស្ស សង្ឃាទិសេសោ កត្ថ បញ្ញត្តោ.

វិស្សជ្ជនា – សាវត្ថិយំ ភន្តេ បញ្ញត្តោ.

បុច្ឆា – កំ អាវុសោ អារព្ភ បញ្ញត្តោ.

វិស្សជ្ជនា – អាយស្មន្តំ ភន្តេ សេយ្យសកំ អារព្ភ បញ្ញត្តោ.

បុច្ឆា – កិស្មិំ អាវុសោ វត្ថុស្មិំ បញ្ញត្តោ.

វិស្សជ្ជនា – អាយស្មា ភន្តេ សេយ្យសកោ ហត្ថេន ឧបក្កមិត្វា អសុចិំ មោចេសិ, តស្មិំ ភន្តេ វត្ថុស្មិំ បញ្ញត្តោ.

បុច្ឆា – អត្ថិ អាវុសោ តត្ថ បញ្ញត្តិ អនុបញ្ញត្តិ អនុប្បន្នបញ្ញត្តិ.

វិស្សជ្ជនា – ឯកា ភន្តេ បញ្ញត្តិ, ឯកា អនុបញ្ញត្តិ, អនុប្បន្នបញ្ញត្តិ តស្មិំ នត្ថិ.

បុច្ឆា – កតមា អាវុសោ តត្ថ មូលបញ្ញត្តិ.

វិស្សជ្ជនា – សញ្ចេតនិកា សុក្កវិស្សដ្ឋិ សង្ឃាទិសេសោតិ អយំ ភន្តេ តត្ថ មូលបញ្ញត្តិ.

បុច្ឆា – កតមា បនាវុសោ តត្ថ អនុបញ្ញត្តិ.

វិស្សជ្ជនា – អញ្ញត្រ សុបិនន្តាតិ អយំ ភន្តេ តត្ថ អនុបញ្ញត្តិ.

បុច្ឆា – កតមា បនាវុសោ តត្ថ បរិបុណ្ណបញ្ញត្តិ.

វិស្សជ្ជនា – សញ្ចេតនិកា សុក្កវិស្សដ្ឋិ អញ្ញត្រសុបិនន្តា សង្ឃាទិសោតិ អយំ ភន្តេ តត្ថ បរិបុណ្ណបញ្ញត្តិ.

បុច្ឆា – សាធារណ បញ្ញត្តិនុខោ អាវុសោ អសាធារណ បញ្ញត្តិនុខោ.

វិស្សជ្ជនា – អសាធារណបញ្ញត្តិ ភន្តេ.

បុច្ឆា – តត្ថ អាវុសោ ឧបក្កមិត្វា អសុចិំ មោចេន្តោ កតិ អាបត្តិយោ អាបជ្ជតិ.

វិស្សជ្ជនា – ឧបក្កមិត្វា ភន្តេ អសុចិំ មោចេន្តោ តិស្សោ អាបត្តិយោ អាបជ្ជតិ, ចេតេតិ ឧបក្កមតិ មុច្ចតិ អាបត្តិ

សង្ឃាទិសេសស្ស, ចេតេតិ ឧបក្កមតិ ន មុច្ចតិ អាបត្តិ ថុល្លច្ចយស្ស, បយោគេ ទុក្កដំ.

បុច្ឆា – កេសំ អាវុសោ អនាបត្តិ.

វិស្សជ្ជនា – ឆន្នំ ភន្តេ អនាបត្តិ សុបិនន្តេន មោចេន្តស្ស ន មោចនាធិប្បាយស្ស ឧម្មត្តកស្ស ខិត្តចិត្តស្ស វេទនាដ្ដស្ស អាទិកម្មិកស្ស ឥមេសំ ខោ ភន្តេ ឆន្នំ អនាបត្តិ.

បុច្ឆា – បញ្ចន្នំ អាវុសោ បាតិមោក្ខុទ្ទេសានំ កតមេន ឧទ្ទេសេន ឧទ្ទេសំ អាគច្ឆតិ.

វិស្សជ្ជនា – បញ្ចន្នំ ភន្តេ បាតិមោក្ខុទ្ទេសានំ តតិយេន ឧទ្ទេសេន ឧទ្ទេសំ អាគច្ឆតិ.

បុច្ឆា – ចតុន្នំ អាវុសោ វិបត្តីនំ កតមា វិបត្តិ.

វិស្សជ្ជនា – ចតុន្នំ ភន្តេ វិបត្តីនំ សីលវិបត្តិ.

បុច្ឆា – កា អាវុសោ វិបត្តិ.

វិស្សជ្ជនា – អសំវរោ ភន្តេ វិបត្តិ.

បុច្ឆា – កា អាវុសោ សម្បត្តិ.

វិស្សជ្ជនា – សំវរោ ភន្តេ សម្បត្តិ.

បុច្ឆា – កា អាវុសោ បដិបត្តិ.

វិស្សជ្ជនា – ន ឯវ រូបំ ករិស្សាមីតិ យាវជីវំ អាបាណកោដិកំ សមាទាយ សិក្ខតិ សិក្ខាបទេសុ អយំ ភន្តេ បដិបត្តិ.

បុច្ឆា – កតិ អាវុសោ អត្ថវសេ បដិច្ច ភគវតា ឧបក្កមិត្វា អសុចិំ មោចេន្តស្ស សង្ឃាទិសេសោ បញ្ញត្តោ.

វិស្សជ្ជនា – ទស ភន្តេ អត្ថវសេ បដិច្ច ភគវតា ឧបក្កមិត្វា អសុចិំ មោចេន្តស្ស សង្ឃាទិសេសោ បញ្ញត្តោ សង្ឃសុដ្ឋុតាយ…បេ… វិនយានុគ្គហាយ.

បុច្ឆា – កត្ថ អាវុសោ ឋិតំ.

វិស្សជ្ជនា – សិក្ខាកាមេសុ ភន្តេ ឋិតំ.

បុច្ឆា – កេ អាវុសោ ធារេន្តិ.

វិស្សជ្ជនា – យេសំ ភន្តេ វត្តតិ តេ ធារេន្តិ.

បុច្ឆា – កស្ស អាវុសោ វចនំ.

វិស្សជ្ជនា – ភគវតោ ភន្តេ វចនំ អរហតោ សម្មាសម្ពុទ្ធស្ស.

បុច្ឆា – កេនាវុសោ អាភតំ.

វិស្សជ្ជនា – បរម្បរាយ ភន្តេ អាភតំ.

បុច្ឆា – អត្ថិ នុខោ អាវុសោ តត្ថ សនិទានេ សបទភាជនីយេ សវិនីតវត្ថុកេ ឧបនេតព្ពំ វា អបនេតព្ពំ វា អក្ខរបទបច្ចាភដ្ឋំ វា វិរទ្ធបទព្យញ្ជនំ វា.

សំគាយនត្ថាយ សង្ឃស្ស ញាបនំ

សុណាតុ មេ ភន្តេ សង្ឃោ អាយស្មន្តំ វិចិត្តសារាភិវំសំ តិបិដកធរ ធម្មភណ្ឌាគារិកំ បឋមស្ស សង្ឃាទិសេស សិក្ខាបទស្ស និទានម្បិ បុច្ឆិំ, បុគ្គលម្បិ បុច្ឆិំ, វត្ថុម្បិ បុច្ឆិំ, បញ្ញត្តិម្បិ បុច្ឆិំ, អនុបញ្ញត្តិម្បិ បុច្ឆិ, អាបត្តិម្បិ បុច្ឆិំ, អនាបត្តិម្បិ បុច្ឆិំ, អញ្ញានិបិ ឯវរូបានិ អនេកានិ បុច្ឆិតព្ពដ្ឋានានិ បុច្ឆិំ, បុដ្ឋោ បុដ្ឋោ ច សោ អាយស្មា វិចិត្តសារាភិវំសោ វិស្សជ្ជេសិ, ឥតិហិទំ ភន្តេ បឋម សង្ឃាទិសេស សិក្ខាបទំ សបរិវារំ និម្មលំ សុបរិសុទ្ធំ តស្សេវ ភគវតោ វចនំ អរហតោ សម្មាសម្ពុទ្ធស្ស. តស្មា យថាបុរេ មហាកស្សបាទយោ មហាថេរវរា បោរាណសំគីតិការា ព្រហ្មចរិយស្ស ចិរដ្ឋិតិយា ពហុជនហិតាយ ពហុជនសុខាយ លោកានុកម្បាយ អត្ថាយ ហិតាយ សុខាយ ទេវមនុស្សានំ ធម្មវិនយំ សំគាយិំសុចេវ អនុសំគាយិំសុច, ឯវមេវ មយម្បិ សព្ពេវ ឆដ្ឋសំគីតិមហាធម្មសភា បរិយាបន្នា ឥទំ បឋមំ សង្ឃាទិសេស សិក្ខាបទំ និទានតោ បដ្ឋាយ ឯកច្ចានំ វចសា សជ្ឈាយវសេន ឯកច្ចានំ មនសា មនសិករណវសេនច ឯកតោ គណសជ្ឈាយំ កត្វា សំគាយេយ្យាម.

បុច្ឆា – យំ តេន អាវុសោ ភគវតា…បេ… សម្មាសម្ពុទ្ធេន មាតុកាមេន សទ្ធិំ កាយសំសគ្គំ សមាបជ្ជន្តស្ស ច, មាតុគាមំ ទុដ្ឋុល្លាហិ វាចាហិ ឱភាសន្តស្ស ច, មាតុគាមស្ស សន្តិកេ អត្តកាម បារិចរិយាយ វណ្ណំ ភាសន្តស្ស ច, សញ្ចរិត្តំ សមាបជ្ជន្តស្ស ច សង្ឃាទិសេសោ កត្ថ បញ្ញត្តោ.

វិស្សជ្ជនា – សាវត្ថិយំ ភន្តេ បញ្ញត្តោ.

បុច្ឆា – កំ អាវុសោ អារព្ភ បញ្ញត្តោ.

វិស្សជ្ជនា – អាយស្មន្តំ ភន្តេ ឧទាយិត្ថេរំ អារព្ភ បញ្ញត្តោ.

បុច្ឆា – កិស្មិំ អាវុសោ វត្ថុស្មិំ បញ្ញត្តោ.

វិស្សជ្ជនា – អាយស្មា ភន្តេ ឧទាយិត្ថេរោ មាតុគាមេន សទ្ធិំ កាយសំសគ្គំ សមាបជ្ជិ, អាយស្មាយេវ ភន្តេ ឧទាយិត្ថេរោ មាតុគាមំ ទុដ្ឋុល្លាហិ វាចាហិ ឱភាសិ, អាយស្មាយេវ ភន្តេ ឧទាយិត្ថេរោ មាតុគាមស្ស សន្តិកេ អត្តកាម បារិចរិយាយ វណ្ណំ អភាសិ, អាយស្មាយេវ ភន្តេ ឧទាយិត្ថេរោ សញ្ចរិត្តំ សមាបជ្ជិំ, តស្មិំ ភន្តេ វត្ថុស្មិំ បញ្ញត្តោ.

៦. កុដិការ សង្ឃាទិសេស សិក្ខាបុច្ឆា

បុច្ឆា – យំ តេន អាវុសោ…បេ… សម្មាសម្ពុទ្ធេន សញ្ញាចិកាយ កុដិំ ការាបេន្តស្ស សង្ឃាទិសេសោ កត្ថ បញ្ញត្តោ.

វិស្សជ្ជនា – អាឡវិយំ ភន្តេ បញ្ញត្ថោ.

បុច្ឆា – កំ អាវុសោ អារព្ភ បញ្ញត្តោ.

វិស្សជ្ជនា – អាឡវិកេ ភន្តេ ភិក្ខូ អារព្ភ បញ្ញត្តោ.

បុច្ឆា – កិស្មិំ អាវុសោ វត្ថុស្មិំ បញ្ញត្តោ.

វិស្សជ្ជនា – អាឡវិកា ភន្តេ ភិក្ខូ សញ្ញាចិកាយោ កុដិយោ ការាបេសុំ, តស្មិំ ភន្តេ វត្ថុស្មិំ បញ្ញត្តោ.

៧. វិហារការ សង្ឃាទិសេស សិក្ខាបុច្ឆា

បុច្ឆា – យំ តេន អាវុសោ…បេ… សម្មាសម្ពុទ្ធេន មហល្លកំ វិហារំ ការាបេន្តស្ស សង្ឃាទិសេសោ កត្ថ បញ្ញត្តោ.

វិស្សជ្ជនា – កោសម្ពិយំ ភន្តេ.

បុច្ឆា – កំ អាវុសោ អារព្ភ បញ្ញត្តោ.

វិស្សជ្ជនា – អាយស្មន្តំ ភន្តេ ឆន្នត្ថេរំ អារព្ភ បញ្ញត្តោ.

បុច្ឆា – កិស្មិំ អាវុសោ វត្ថុស្មិំ បញ្ញត្តោ.

វិស្សជ្ជនា – អាយស្មា ភន្តេ ឆន្នោ វិហារវត្ថុំ សោធេន្តោ អញ្ញតរំ ចេតិយរុក្ខំ ឆេទាបេសិ គាមបូជិតំ និគមបូជិតំ នគរ បូជិតំ ជនបទបូជិតំ រដ្ឋបូជិតំ, តស្មិំ ភន្តេ វត្ថុស្មិំ បញ្ញត្តោ.

៨-៩. ទុដ្ឋទោស សង្ឃាទិសេស សិក្ខាបុច្ឆា

បុច្ឆា – យំ តេន អាវុសោ ភគវតា…បេ… សម្មាសម្ពុទ្ធេន ភិក្ខុំ អមូលកេន បារាជិកេន ធម្មេន អនុទ្ធំសេន្តស្ស ច, ភិក្ខុំ អញ្ញភាគិយស្ស អធិករណស្ស កិញ្ចិទេសំ លេសមត្តំ ឧបាទាយ បារាជិកេន ធម្មេន អនុទ្ធំសេន្តស្ស ច សង្ឃាទិសេសោ កត្ថ បញ្ញត្តោ.

វិស្សជ្ជនា – រាជគហេ ភន្តេ បញ្ញត្តោ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តោ.

វិស្សជ្ជនា – មេត្តិយភូមជកា ភន្តេ ភិក្ខូ អារព្ភ បញ្ញត្តោ, មេត្តិយភូមជកា ភន្តេ ភិក្ខូ អាយស្មន្តំ ទព្ពំ មល្លបុត្តំ អមូលកេន បារាជិកេន ធម្មេន អនុទ្ធំសេសុំ, តេយេវ ភន្តេ មេត្តិយភូមជកា ភិក្ខូ អាយស្មន្តំ ទព្ពំ មល្លបុត្តំ អញ្ញភាគិយស្ស អធិករណស្ស កិញ្ចិទេសំ លេសមត្តំ ឧបាទាយ បារាជិកេន ធម្មេន អនុទ្ធំសេសុំ, តស្មិំ ភន្តេ វត្ថុស្មិំ, បញ្ញត្តោ.

១០. សង្ឃភេទក សង្ឃាទិសេស សិក្ខាបុច្ឆា

បុច្ឆា – យំ តេន អាវុសោ ភគវតា…បេ… សម្មាសម្ពុទ្ធេន សង្ឃភេទកស្ស ភិក្ខុនោ យាវតតិយំ សមនុភាសនាយ អប្បដិនិស្សជ្ជន្តស្ស សង្ឃាទិសេសោ កត្ថ បញ្ញត្តោ.

វិស្សជ្ជនា – រាជគហេ ភន្តេ បញ្ញត្តោ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្ថោ.

វិស្សជ្ជនា – ទេវទត្តំ ភន្តេ អារព្ភ បញ្ញត្តោ.

ទេវទត្តោ ភន្តេ សមគ្គស្ស សង្ឃស្ស ភេទាយ បរក្កមិ, តស្មិំ ភន្តេ វត្ថុស្មិំ បញ្ញត្តោ.

១១. ភេទានុវត្តក សិក្ខាបុច្ឆា

បុច្ឆា – យំ តេន អាវុសោ ភគវតា…បេ… សម្មាសម្ពុទ្ធេន ភេទានុវត្តកានំ ភិក្ខូនំ យាវតតិយំ សមនុភាសនាយ អប្បដិនិស្សជ្ជន្តានំ សង្ឃាទិសេសោ កត្ថ បញ្ញត្តោ.

វិស្សជ្ជនា – រាជគហេ ភន្តេ បញ្ញត្តោ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តោ.

វិស្សជ្ជនា – សម្ពហុលេ ភន្តេ ភិក្ខូ អារព្ភ បញ្ញត្តោ, សម្ពហុលា ភន្តេ ភិក្ខូ ទេវទត្តស្ស សង្ឃាភេទាយ បរក្កមន្តស្ស អនុវត្តកា អហេសុំ វគ្គវាទកា, តស្មិំ ភន្តេ វត្ថុស្មិំ បញ្ញត្តោ.

១២. ទុព្ពច, សង្ឃាទិសេស សិក្ខាបុច្ឆា

បុច្ឆា – យំ តេន អាវុសោ ភគវតា…បេ… សម្មាសម្ពុទ្ធេន ទុព្ពចស្ស ភិក្ខុនោ យាវតតិយំ សមនុភាសនាយ អប្បដិនិស្សជ្ជន្តស្ស សង្ឃាទិសេសោ កត្ថ បញ្ញត្តោ.

វិស្សជ្ជនា – កោសម្ពិយំ ភន្តេ បញ្ញត្តោ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តោ.

វិស្សជ្ជនា – អាយស្មន្តំ ភន្តេ ឆន្នំ អារព្ភ បញ្ញត្តោ, អាយស្មា ភន្តេ ឆន្នោ ភិក្ខូហិ សហធម្មិកំ វុច្ចមានោ អត្តានំ អវចនីយំ អកាសិ, តស្មិំ ភន្តេ វត្ថុស្មិំ បញ្ញត្តោ.

១៣. កុលទូសក សង្ឃាទិសេស សិក្ខាបុច្ឆា

បុច្ឆា – យំ តេន អាវុសោ ភគវតា…បេ… សម្មាសម្ពុទ្ធេន កុលទូសកស្ស ភិក្ខុនោ យាវតតិយំ សមនុភាសនាយ អប្បដិនិស្សជ្ជន្តស្ស សង្ឃាទិសេសោ កត្ថ បញ្ញត្តោ.

វិស្សជ្ជនា – សាវត្ថិយំ ភន្តេ បញ្ញត្តោ.

បុច្ឆា – កំ អារព្ភ អាវុសោ កិស្មិំ វត្ថុស្មិំ បញ្ញត្តោ.

វិស្សជ្ជនា – អស្សជិ បុនព្ពសុកេ ភន្តេ ភិក្ខូ អារព្ភ បញ្ញត្តោ, អស្សជិបុនព្ពសុកា ភន្តេ ភិក្ខូ សង្ឃេន បព្ពាជនីយកម្មកតា ឆន្ទគាមិតា ទោសគាមិតា មោហគាមិតា ភយគាមិតា បាបេសុំ, តស្មិំ ភន្តេ វត្ថុស្មិំ បញ្ញត្តោ.

អនិយត សិក្ខាបុច្ឆា

បុច្ឆា – យំ តេន អាវុសោ ភគវតា…បេ… សម្មាសម្ពុទ្ធេន បឋមោ ច អនិយតោ ទុតិយោ ច អនិយតោ កត្ថ បញ្ញត្តោ.

វិស្សជ្ជនា – សាវត្ថិយំ ភន្តេ បញ្ញត្តោ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តោ.

វិស្សជ្ជនា – អាយស្មន្តំ ភន្តេ ឧទាយិំ អារព្ភ បញ្ញត្តោ, អាយស្មា ភន្តេ ឧទាយី មាតុគាមេន សទ្ធិំ ឯកោឯកាយ រហោ បដិច្ឆន្នេ អាសនេ អលំកម្មនិយេ និសជ្ជំ កប្បេសិ, តស្មិញ្ច វត្ថុស្មិំ, អាយស្មាយេវ ភន្តេ ឧទាយី មាតុគាមេន សទ្ធិំ រហោ និសជ្ជំ អកាសិ, តស្មិញ្ច ភន្តេ វត្ថុស្មិំ បញ្ញត្តោ.

បុច្ឆា – កស្ស អាវុសោ វចនំ.

វិស្សជ្ជនា – ភគវតោ ភន្តេ វចនំ អរហតោ សម្មាសម្ពុទ្ធស្ស.

បុច្ឆា – កេនាវុសោ អាភតំ.

វិស្សជ្ជនា – បរម្បរាយ ភន្តេ អាភតំ.

បុច្ឆា – អត្ថិ នុខោ អាវុសោ ឯត្ថ កោចិបិ វិរទ្ធទោសោ.

វិស្សជ្ជនា – នត្ថិ ភន្តេ.

សំគាយនត្ថាយ សង្ឃស្សញាបនំ

សុណាតុ មេ ភន្តេ សង្ឃោ, អហំ ភន្តេ អាយស្មន្តំ វិចិត្តសារាភិវំសំ តិបិដកធរ ធម្មភណ្ឌាគារិកំ បឋម ទុដ្ឋទោស សិក្ខាបទតោ បដ្ឋាយ បុច្ឆិតព្ពានិ អនេកានិ ឋានានិ បុច្ឆិំ, សោ ច អាយស្មា បុដ្ឋោ បុដ្ឋោ វិស្សជ្ជេតិ, ឥតិហិទំ ភន្តេ សព្ពំ សិក្ខាបទំ និម្មលំ សុបរិសុទ្ធំ តស្សេវ ភគវតោ វចនំ អរហតោ សម្មាសម្ពុទ្ធស្ស, តស្មា យថាបុរេ មហាកស្សបាទយោ មហាថេរវរា បោរាណសំគីតិការា ព្រហ្មចរិយស្ស ចិរដ្ឋិតិយា ពហុជនហិតាយ ពហុជនសុខាយ លោកានុកម្បាយ អត្ថាយ ហិតាយ សុខាយ ទេវមនុស្សានំ សំគាយិំសុចេវ អនុសំគាយិំសុច, ឯវមេវ មយម្បិ ទានិ សព្ពេវ ឆដ្ឋសំគីតិ មហាធម្មសភាបរិយាបន្នា ឥមានិ សិក្ខាបទានិ ឯកតោ គណសជ្ឈាយំ កត្វា សំគាយេយ្យាម.