នមោ តស្ស ភគវតោ អរហតោ សម្មាសម្ពុទ្ធស្ស
វិនយបិដក
សំគាយនស្ស បុច្ឆា វិស្សជ្ជនា
ឱកាស ទានកថា
សុណាតុ មេ ភន្តេ សង្ឃោ, មហតី អយំ បរិសា, ឯវរូបាយ បរិសាយ ន សុករា សព្ពសោ កថំ សាវេតុំ, តស្មា អាយស្មតោ ច ជវនត្ថេរស្ស បខុក្កូនគរវាសិនោ អាយស្មតោ ច វិចិត្តសារាភិវំសស្ស តិបិដកធរ ធម្មភណ្ឌាគារិកស្ស វិនយបុច្ឆនភារញ្ច វិនយវិស្សជ្ជន ភារញ្ច អាវហិតុំ ឱកាសំ ទម្មិ, ករោថ តុម្ហេ អាវុសោ ឆដ្ឋសំគីតិបុព្ពង្គមានិ វិនយបុច្ឆន វិនយវិស្សជ្ជន កិច្ចានិ យថាធម្មំ យថាវិនយំ.
អគ្គមហាបណ្ឌិត ភទន្តជវន មហាថេរេន
ឋបិតា
បុច្ឆក សម្មុតិ ញាត្តិ
សុណាតុ មេ ភន្តេ សង្ឃោ, យទិ សង្ឃស្ស បត្តកល្លំ, អហំ អាយស្មន្តំ វិចិត្តសារាភិវំសំ តិបិដកធរ ធម្មភណ្ឌាគារិកំ វិនយំ បុច្ឆេយ្យំ.
តិបិដកធរ ធម្មភណ្ឌាគារិក
ភទន្តវិចិត្តសារាភិវំសេន
ឋបិតា វិស្សជ្ជក សម្មុតិ ញាត្តិ
សុណាតុ មេ ភន្តេ សង្ឃោ, យទិ សង្ឃស្ស បត្តកល្លំ, អហំ អាយស្មតា ជវនត្ថេរេន សង្ឃនាយក មហាថេរស្ស បដិនិធិភូតេន វិនយំ បុដ្ឋោ វិស្សជ្ជេយ្យំ.
បឋម បារាជិក សិក្ខាបុច្ឆា
បុច្ឆា – យំ តេន អាវុសោ ភគវតា ជានតា បស្សតា អរហតា សម្មាសម្ពុទ្ធេន បឋមំ បារាជិកំ កត្ថ បញ្ញត្តំ.
វិស្សជ្ជនា – វេសាលិយំ ភន្តេ បញ្ញត្តំ.
បុច្ឆា – កំ អាវុសោ អារព្ភ បញ្ញត្តំ.
វិស្សជ្ជនា – សុទិន្នំ ភន្តេ កលន្ទបុត្តំ អារព្ភ បញ្ញត្តំ.
បុច្ឆា – កិស្មិំ អាវុសោ វត្ថុស្មិំ បញ្ញត្តំ.
វិស្សជ្ជនា – សុទិន្ទោ ភន្តេ កលន្ទបុត្តោ បុរាណទុតិយិកាយ មេថុនំ ធម្មំ បដិសេវិ, តស្មិំ ភន្តេ វត្ថុស្មិំ បញ្ញត្តំ.
បុច្ឆា – អត្ថិ អាវុសោ តត្ថ បញ្ញត្តិ អនុបញ្ញត្តិ អនុប្បន្នបញ្ញត្តិ.
វិស្សជ្ជនា – ឯកា ភន្តេ បញ្ញត្តិ ទ្វេ អនុបញ្ញត្តិយោ, អនុប្បន្នបញ្ញត្តិ តស្មិំ នត្ថិ.
បុច្ឆា – សព្ពត្ថបញ្ញត្តិនុខោ អាវុសោ បទេសបញ្ញត្តិនុខោ.
វិស្សជ្ជនា – សព្ពត្ថបញ្ញត្តិ ភន្តេ.
បុច្ឆា – សាធារណបញ្ញត្តិនុខោ អាវុសោ អសាធារណបញ្ញត្តិនុខោ.
វិស្សជ្ជនា – សាធារណបញ្ញត្តិ ភន្តេ.
បុច្ឆា – ឯកតោបញ្ញត្តិនុខោ អាវុសោ ឧភតោបញ្ញត្តិនុខោ.
វិស្សជ្ជនា – ឧភតោបញ្ញត្តិ ភន្តេ.
បុច្ឆា – បញ្ចន្នំ អាវុសោ បាតិមោក្ខុទ្ទេសានំ កត្ថោគធំ កត្ថ បរិយាបន្នំ.
វិស្សជ្ជនា – និទានោគធំ ភន្តេ និទានបរិយាបន្នំ.
បុច្ឆា – កតមេន អាវុសោ ឧទ្ទេសេន ឧទ្ទេសំ អាគច្ឆតិ.
វិស្សជ្ជនា – ទុតិយេន ភន្តេ ឧទ្ទេសេន ឧទ្ទេសំ អាគច្ឆតិ.
បុច្ឆា – ចតុន្នំ អាវុសោ វិបត្តីនំ កតមា វិបត្តិ.
វិស្សជ្ជនា – សីលវិបត្តិ ភន្តេ.
បុច្ឆា – កា អាវុសោ វិបត្តិ.
វិស្សជ្ជនា – អសំវរោ ភន្តេ វិបត្តិ.
បុច្ឆា – កា អាវុសោ សម្បត្តិ.
វិស្សជ្ជនា – សំវរោ ភន្តេ សម្មត្តិ.
បុច្ឆា – កា អាវុសោ បដិបត្តិ.
វិស្សជ្ជនា – ន ឯវរូបំ ករិស្សាមីតិ យាវជីវំ អាបាណកោដិកំ សមាទាយ សិក្ខតិ សិក្ខាបទេសុ, អយំ ភន្តេ បដិបត្តិ.
បុច្ឆា – កតិ អាវុសោ អត្ថវសេ បដិច្ច ភគវតា បឋមំ បារាជិកំ បញ្ញត្តំ.
វិស្សជ្ជនា – ទស ភន្តេ អត្ថវសេ បដិច្ច ភគវតា បឋមំ បារាជិកំ បញ្ញត្តំ, ១ - សង្ឃសុដ្ឋុតាយ, ២ - សង្ឃផាសុតាយ, ៣ - ទុម្មង្កូនំ បុគ្គលានំ និគ្គហាយ, ៤ - បេសលានំ ភិក្ខូនំ ផាសុវិហារាយ, ៥ - ទិដ្ឋធម្មិកានំ អាសវានំ សំវរាយ, ៦ - សម្បរាយិកានំ អាសវានំ បដិឃាតាយ, ៧ - អប្បសន្នានំ បសាទាយ, ៨ - បសន្នានំ ភិយ្យោភាវាយ, ៩ - សទ្ធម្មដ្ឋិតិយា, ១០ - វិនយានុគ្គហាយ.
បុច្ឆា – កេ អាវុសោ សិក្ខន្តិ.
វិស្សជ្ជនា – សេក្ខាច ភន្តេ បុថុជ្ជនកល្យាណកាច សិក្ខន្តិ.
បុច្ឆា – កេ អាវុសោ សិក្ខិតសិក្ខា.
វិស្សជ្ជនា – អរហន្តោ ភន្តេ សិក្ខិតសិក្ខា.
បុច្ឆា – កត្ថ អាវុសោ ឋិតំ.
វិស្សជ្ជនា – សិក្ខាកាមេសុ ភន្តេ ឋិតំ.
បុច្ឆា – កេ អាវុសោ ធារេន្តិ.
វិស្សជ្ជនា – យេសំ ភន្តេ វត្តតិ តេ ធារេន្តិ.
បុច្ឆា – កស្ស អាវុសោ វចនំ.
វិស្សជ្ជនា – ភគវតោ ភន្តេ វចនំ អរហតោ សម្មាសម្ពុទ្ធស្ស.
បុច្ឆា – កេនាវុសោ អាភតំ.
វិស្សជ្ជនា – បរម្បរាយ ភន្តេ អាភតំ.
សំគាយនត្ថាយ សង្ឃស្ស ញាបនំ
សុណាតុ មេ ភន្តេ សង្ឃោ អហំ ភន្តេ អាយស្មន្តំ វិចិត្ថសារាភិវំសំ តិបិដកធរ ធម្មភណ្ឌាគារិកំ បឋមស្ស បារាជិកស្ស និទានម្បិ បុច្ឆិំ, បុគ្គលម្បិ បុច្ឆិំ, វត្ថុម្បិ បុច្ឆិំ, បញ្ញត្តិ អនុបញ្ញត្តិអាទីនិបិ បុច្ឆិំ, បុដ្ឋោ បុដ្ឋោច សោ អាយស្មាវិចិត្តសារាភិវំសោ វិស្សជ្ជេសិ, ឥតិហិទំ ភន្តេ បឋមំ បារាជិក សិក្ខាបទំ និម្មលំ សុបរិសុទ្ធំ តស្សេវ ភគវតោ វចនំ អរហតោ សម្មាសម្ពុទ្ធស្ស, តស្មា យថាបុរេ មហាកស្សបាទយោ មហាថេរវរា បោរាណសំគីតិការា ព្រហ្មចរិយ សង្ខាតស្ស ពុទ្ធសាសនស្ស ចិរដ្ឋិតិយា ពហុជនហិតាយ ពហុជនសុខាយ លោកានុកម្បាយ អត្ថាយ ហិតាយ សុខាយ ទេវមនុស្សានំ ធម្មវិនយំ សង្គាយិំសុចេវ អនុសង្គាយិំសុច, ឯវមេវ មយម្បិ ទានិ សព្ពេវ ឆដ្ឋសំគីតិមហាធម្មសភាបរិយាបន្នា ឥទំ បឋម បារាជិក សិក្ខាបទំ ឯកតោសជ្ឈាយនវសេន សំគាយេយ្យាម.
រេវតាភិ បណ្ឌិតធជ សាសនវំស មហាធម្មរាជគុរុនោ
អភិធជមហារដ្ឋគុរុនោច សង្ឃនាយក មហាថេរស្ស
ឱកាស ទានកថា
សុណាតុ មេ ភន្តេ សង្ឃោ, មហតី អយំ បរិសា, ឯវរូបាយ បរិសាយ ន សុករា សព្ពសោ កថំ សាវេតុំ, តស្មា អាយស្មតោច សោភនស្ស សាសនរិ សារាមាធិវាសិនោ អាយស្មតោច វិចិត្តសារាភិវំសស្ស តិបិដកធរ ធម្មភណ្ឌាគារិកស្ស វិនយបុច្ឆនភារញ្ច វិនយវិស្សជ្ជនភារញ្ច អាវហិតុំ ឱកាសំ ទម្មិ, ករោថ តុម្ហេ អាវុសោ ឆដ្ឋសំគីតិបុព្ពង្គមានិ វិនយបុច្ឆន វិនយវិស្សជ្ជន កិច្ចានិ យថាធម្មំ យថាវិនយំ.
អគ្គមហាបណ្ឌិត ភទន្ត សោភនត្ថេរេន
ឋបិតា បុច្ឆក សម្មុតិ ញាត្តិ
សុណាតុ មេ ភន្តេ សង្ឃោ, យទិ សង្ឃស្ស បត្តកល្លំ, អហំ អាយស្មន្តំ វិចិត្តសារាភិវំសំ តិបិដកធរ ធម្មភណ្ឌាគារិកំ វិនយំ បុច្ឆេយ្យំ.
តិបិដកធរ ធម្មភណ្ឌាគារិក
ភទន្តវិចិត្តសារាភិវំសេន
ឋបិតា វិស្សជ្ជក សម្មុតិ ញាត្តិ
សុណាតុ មេ ភន្តេ សង្ឃោ, យទិសង្ឃស្ស បត្តកល្លំ, អហំ អាយស្មតា សោភនត្ថេរេន សង្ឃនាយក មហាថេរស្ស បដិនិធិភូតេន វិនយំ បុដ្ឋោ វិស្សជ្ជេយ្យំ.
ទុតិយ បារាជិក សិក្ខាបុច្ឆា
បុច្ឆា – យំ តេន អាវុសោ ភគវតា ជានតា បស្សតា អរហតា សម្មាសម្ពុទ្ធេន ទុតិយំ បារាជិកំ កត្ថ បញ្ញត្តំ.
វិស្សជ្ជនា – រាជគហេ ភន្តេ បញ្ញត្តំ.
បុច្ឆា – កំ អាវុសោ អារព្ភ បញ្ញត្តំ.
វិស្សជ្ជនា – ធនិយំ ភន្តេ កុម្ភការបុត្តំ អារព្ភ បញ្ញត្តំ.
បុច្ឆា – កិស្មិំ អាវុសោ វត្ថុស្មិំ បញ្ញត្តំ.
វិស្សជ្ជនា – ធនិយោ ភន្តេ កុម្ភការបុត្តោ រញ្ញោ ទារូនិ អទិន្នំ អាទិយិ, តស្មិំ វត្ថុស្មិំ បញ្ញត្តំ.
បុច្ឆា – អត្ថិ អាវុសោ តត្ថ បញ្ញត្តិ អនុបញ្ញត្តិ អនុប្បន្នបញ្ញត្តិ.
វិស្សជ្ជនា – ឯកា ភន្តេ បញ្ញត្តិ ឯកា អនុបញ្ញត្តិ អនុប្បន្នបញ្ញត្តិ តស្មិំ នត្ថិ.
បុច្ឆា – កា អាវុសោ តត្ថ មូលបញ្ញត្តិ.
វិស្សជ្ជនា – យោ បន ភិក្ខុ អទិន្នំ ថេយ្យសង្ខាតំ អាទិយេយ្យ, យថារូបេ អទិន្នាទានេ រាជានោ ចោរំ គហេត្វា ហនេយ្យុំវា ពន្ធេយ្យុំវា បព្ពាជេយ្យុំវា ចោរោសិ ពាលោសិ មុឡ្ហោសិ ថេនោសីតិ តថារូបំ ភិក្ខុ អទិន្នំ អាទិយមានោ អយម្បិ បារាជិកោ ហោតិ អសំវាសោតិ អយំ ភន្តេ តត្ថ មូលបញ្ញត្តិ.
បុច្ឆា – កា អាវុសោ តត្ថ អនុបញ្ញត្តិ.
វិស្សជ្ជនា – គាមាវា អរញ្ញាវាតិ អយំ ភន្តេ តត្ថ អនុបញ្ញត្តិ.
បុច្ឆា – កា អាវុសោ តត្ថ បរិបុណ្ណបញ្ញត្តិ.
វិស្សជ្ជនា – យោ បន ភិក្ខុ គាមាវា អរញ្ញាវា អទិន្នំ ថេយ្យសង្ខាតំ អាទិយេយ្យ, កថារូបេ អទិន្នាទានេ រាជានោ ចោរំ គហេត្វា ហនេយ្យុំវា ពន្ធេយ្យុំវា បព្ពាជេយ្យុំវា ចោរោសិ ពាលោសិ មូឡ្ហោសិ ថេនោសីតិ តថារូបំ ភិក្ខុ អទិន្នំ អាទិយមានោ អយម្បិ បារាជិកោ ហោតិ អសំវាសោតិ អយំ ភន្តេ តត្ថ បរិបុណ្ណបញ្ញត្តិ.
បុច្ឆា – សព្ពត្ថបញ្ញត្តិ នុខោ អាវុសោ បទេសបញ្ញត្តិនុខោ.
វិស្សជ្ជនា – សព្ពត្ថបញ្ញត្តិ ភន្តេ.
បុច្ឆា – សាធារណបញ្ញត្តិនុខោ អាវុសោ អសាធារណបញ្ញត្តិ នុខោ.
វិស្សជ្ជនា – សាធារណបញ្ញត្តិ ភន្តេ.
បុច្ឆា – ឯកតោបញ្ញត្តិនុខោ អាវុសោ ឧភតោបញ្ញត្តិនុខោ.
វិស្សជ្ជនា – ឧភតោបញ្ញត្តិ ភន្តេ.
បុច្ឆា – តស្មិំ អាវុសោ ទុតិយ បារាជិកេ អទិន្នំ អាទិយន្តោ កតិ អាបត្តិយោ អាបជ្ជតិ វិភជិត្វា វិស្សជ្ជេហិ.
វិស្សជ្ជនា – អទិន្នំ ភន្តេ អាទិយន្តោ តិស្សោ អាបត្តិយោ អាបជ្ជតិ, បញ្ច មាសកំវា អតិរេក បញ្ច មាសកំវា អគ្ឃនកំ អទិន្នំ ថេយ្យសង្ខាតំ អាទិយតិ អាបត្តិ បារាជិកស្ស, ឩនបញ្ចមាសកំវា អតិរេកមាសកំវា អទិន្នំ ថេយ្យសង្ខាតំ អាទិយតិ អាបត្តិ ថុល្លច្ចយស្ស, មាសកំវា ឩនមាសកវា អគ្ឃនកំ អទិន្នំ ថេយ្យសង្ខាតំ អាទិយតិ អាបត្តិ ទុក្កដស្ស, អទិន្នំ ភន្តេ អាទិយន្តោ ឥមា តិស្សោ អាបត្តិយោ អាបជ្ជតិ.
បុច្ឆា – កេសំ អាវុសោ អនាបត្តិ.
វិស្សជ្ជនា – ទសន្នំ ភន្តេ បុគ្គលានំ អនាបត្តិ, សកសញ្ញិស្ស, វិស្សាសគ្គាហេន គណ្ហន្តស្ស, តាវកាលិកំ គណ្ហន្តស្ស, បេតបរិគ្គហំ គណ្ហន្តស្ស, តិរច្ឆានគតបរិគ្គហំ គណ្ហន្តស្ស, បំសុកូលសញ្ញិស្ស, ឧម្មត្តកស្ស, ខិត្តចិត្តស្ស, វេទនាដ្ដស្ស, អាទិកម្មិកស្សាតិ.
បុច្ឆា – បញ្ចន្នំ អាវុសោ បាតិមោក្ខុទ្ទេសានំ កត្ថោគធំ កត្ថបរិយាបន្នំ.
វិស្សជ្ជនា – និទានោគធំ ភន្តេ និទានបរិយាបន្នំ.
បុច្ឆា – កតមេន អាវុសោ ឧទ្ទេសេន ឧទ្ទេសំ អាគច្ឆតិ.
វិស្សជ្ជនា – ទុតិយេន ភន្តេ ឧទ្ទេសេន ឧទ្ទេសំ អាគច្ឆតិ.
បុច្ឆា – ចតុន្នំ អាវុសោ វិបត្តីនំ កតមា វិបត្តិ.
វិស្សជ្ជនា – សីលវិបត្តិ ភន្តេ.
បុច្ឆា – សត្តន្នំ អាវុសោ អាបត្តិក្ខន្ធានំ កតមោ អាបត្តិក្ខន្ធោ.
វិស្សជ្ជនា – បារាជិកាបត្តិក្ខន្ធោ ភន្តេ.
បុច្ឆា – ឆន្នំ អាវុសោ អាបត្តិសមុដ្ឋានានំ កតិហិ សមុដ្ឋានេហិ សមុដ្ឋាតិ.
វិស្សជ្ជនា – តីហិ ភន្តេ សមុដ្ឋានេហិ សមុដ្ឋាតិ, សិយា កាយតោច ចិត្តតោច សមុដ្ឋាតិ, ន វាចាតោ, សិយា វាចាតោច
ចិត្តតោច សមុដ្ឋាតិ, ន កាយតោ, សិយា កាយតោច វាចាតោច ចិត្តតោច សមុដ្ឋាតិ.
បុច្ឆា – ចតុន្នំ អាវុសោ អធិករណានំ កតមំ អធិករណំ.
វិស្សជ្ជនា – អាបត្តាធិករណំ ភន្តេ.
បុច្ឆា – សត្តន្នំ អាវុសោ សមថានំ កតិហិ សមថេហិ សម្មតិ.
វិស្សជ្ជនា – ទ្វិហិ ភន្តេ សមថេហិ សម្មតិ សម្មុខាវិនយេនច បដិញ្ញាត ករណេនច.
បុច្ឆា – កោ អាវុសោ តត្ថ វិនយោ, កោ តត្ថ អភិវិនយោ.
វិស្សជ្ជនា – បញ្ញត្តិ ភន្តេ វិនយោ វិភត្តិ អភិវិនយោ.
បុច្ឆា – កិំអាវុសោ តត្ថ បាតិមោក្ខំ កិំ តត្ថ អធិបាតិមោក្ខំ.
វិស្សជ្ជនា – បញ្ញត្តិ ភន្តេ បាតិមោក្ខំ, វិភត្តិ អធិបាតិមោក្ខំ.
បុច្ឆា – កា អាវុសោ វិបត្តិ.
វិស្សជ្ជនា – អសំវរោ ភន្តេ វិបត្តិ.
បុច្ឆា – កា អាវុសោ សម្បត្តិ.
វិស្សជ្ជនា – សំវរោ ភន្តេ សម្បត្តិ.
បុច្ឆា – កា អាវុសោ បដិបត្តិ.
វិស្សជ្ជនា – ន ឯវរូបំ ករិស្សាមីតិ យាវជីវំ អាបាណកោដិកំ សមាទាយ សិក្ខតិ សិក្ខាបទេសុ អយំ ភន្តេ តត្ថ បដិបត្តិ.
បុច្ឆា – កតិ អាវុសោ អត្ថវសេ បដិច្ច ភគវតា ទុតិយំ បារាជិកំ បញ្ញត្តំ.
វិស្សជ្ជនា – ទស ភន្តេ អត្ថវសេ បដិច្ច ភគវតា ទុតិយំ បារាជិកំ បញ្ញត្តំ. សង្ឃសុដ្ឋុតាយ សង្ឃផាសុតាយ ទុម្មង្កូនំ បុគ្គលានំ និគ្គហាយ បេសលានំ ភិក្ខូនំ ផាសុវិហារាយ ទិដ្ឋធម្មិកានំ អាសវានំ សំវរាយ សម្បរាយិកានំ អាសវានំ បដិឃាតាយ អប្បសន្នានំ បសាទាយ បសន្នានំ ភិយ្យោភាវាយ សទ្ធម្មដ្ឋិតិយា វិនយានុគ្គហាយ.
បុច្ឆា – កោ អាវុសោ សិក្ខន្តិ.
វិស្សជ្ជនា – សេក្ខាច ភន្តេ បុថុជ្ជនកល្យាណកាច សិក្ខន្តិ.
បុច្ឆា – កេ អាវុសោ សិក្ខិតសិក្ខា.
វិស្សជ្ជនា – អរហន្តោ ភន្តេ សិក្ខិតសិក្ខា.
បុច្ឆា – កត្ថ អាវុសោ ឋិតំ.
វិស្សជ្ជនា – សិក្ខាកាមេសុ ភន្តេ ឋិតំ.
បុច្ឆា – កេ អាវុសោ ធារេន្តិ.
វិស្សជ្ជនា – យេសំ ភន្តេ វត្តតិ តេ ធារេន្តិ.
បុច្ឆា – កស្ស អាវុសោ វចនំ.
វិស្សជ្ជនា – ភគវតា ភន្តេ វចនំ អរហតោ សម្មាសម្មុទ្ធស្ស.
បុច្ឆា – កេនាវុសោ អាភតំ.
វិស្សជ្ជនា – បរម្បរាយ ភន្តេ អាភតំ.
បុច្ឆា – អត្ថិ នុ ខោ អាវុសោ តត្ថ ឧបនេតព្ពំ វា អបនេតព្ពំ វា អក្ខរបទបច្ចាភដ្ឋំ វា វិរទ្ធបទព្យញ្ជនំ វា.
វិស្សជ្ជនា – នត្ថិ ភន្តេ.
‘‘សំគាយនត្ថាយ សង្ឃស្ស ញាបនំ’’
សុណាតុ មេ ភន្តេ សង្ឃោ អហំ ភន្តេ អាយស្មន្តំ វិចិត្តសារាភិវំស តិបិដកធរធម្មភណ្ឌាគារិកំ ទុតិយស្ស បារាជិកស្ស និទានម្បិ បុច្ឆិំ, បុគ្គលម្បិ បុច្ឆិំ, វត្ថុម្បិ បុច្ឆិំ, បញ្ញត្តិម្បិ បុច្ឆិំ, អនុបញ្ញត្តិម្បិ បុច្ឆិំ, អាបត្តិម្បិ បុច្ឆិំ, អនាបត្តិម្បិ បុច្ឆិំ, អញ្ញានិបិ ឦទិសានិ បុច្ឆិតព្ពដ្ឋានានិ អនេកានិ បុច្ឆិំ, បុដ្ឋោ បុដ្ឋោច សោ អាយស្មា វិចិត្តសារាភិវំសោ វិស្សជ្ជេសិ. ឥតិ ហិទំ ភន្តេ ឥទំ ទុតិយំ បារាជិក សិក្ខាបទំ និម្មលំ, សុបរិសុទ្ធំ, តស្សេវ ភគវតោ វចនំ អរហតោ សម្មាសម្ពុទ្ធស្ស, តស្មា យថា បុរេ មហាកស្ស បាទយោ មហាថេរវរា បោរាណសំគីតិការា ព្រហ្មចរិយសង្ខាតស្ស ពុទ្ធសាសនស្ស ចិរដ្ឋិតិយា, ពហុជនហិតាយ, ពហុជនសុខាយ លោកានុកម្បាយ អត្ថាយ, ហិតាយ, សុខាយ, ទេវមនុស្សានំ ធម្មវិនយំ សង្គាយិំសុចេវ អនុសង្គាយិំសុច, ឯវមេវ មយម្បិ ទានិ សព្ពេវ ឆដ្ឋសំគីតិមហាធម្មសភាបរិយាបន្នា ឥទំ ទុតិយ បារាជិក សិក្ខាបទំ ឯកតោ គណសជ្ឈាយំ កត្វា សមគ្គា សម្មោទមានា ហុត្វា សង្គាយេយ្យាម.
តតិយ បារាជិក សិក្ខាបុច្ឆា
បុច្ឆា – យំ តេន អាវុសោ ភគវតា (ប) សម្មាសម្ពុទ្ធេន តតិយំ បារាជិកំ កត្ថ បញ្ញត្តំ.
វិស្សជ្ជនា – វេសាលិយំ ភន្តេ បញ្ញត្តំ.
បុច្ឆា – កំ អាវុសោ អារព្ភ បញ្ញត្តំ.
វិស្សជ្ជនា – សម្ពហុលេ ភន្តេ ភិក្ខូ អារព្ភ បញ្ញត្តំ.
បុច្ឆា – កិស្មិំ អាវុសោ វត្ថុស្មិំ បញ្ញត្តំ.
វិស្សជ្ជនា – សម្ពហុលា ភន្តេ ភិក្ខុ អញ្ញមញ្ញំ ជីវិតា វោរោបេសុំ, តស្មិំ ភន្តេ វត្ថុស្មិំ បញ្ញត្តំ.
បុច្ឆា – អត្ថិ នុខោ អាវុសោ តត្ថ បញ្ញត្តិ អនុបញ្ញត្តិ អនុប្បន្នបញ្ញត្តិ.
វិស្សជ្ជនា – ឯកា ភន្តេ បញ្ញត្តិ, ឯកា អនុបញ្ញត្តិ, អនុប្បន្នបញ្ញត្តិ តស្មិំ នត្ថិ.
បុច្ឆា – កា អាវុសោ តត្ថ មូលបញ្ញត្តិ.
វិស្សជ្ជនា – យោបន ភិក្ខុ សញ្ចិច្ច មនុស្សវិគ្គហំ ជីវិតា វោរោបេយ្យ, សត្ថហារកំវាស្ស បរិយេសេយ្យ អយម្បិ បារាជិកោ ហោតិ អសំវាសោតិ អយំ ភន្តេ តត្ថ មូលបញ្ញត្តិ.
បុច្ឆា – កា អាវុសោ តត្ថ អនុបញ្ញត្តិ.
វិស្សជ្ជនា – មរណវណ្ណំ វា សំវណ្ណេយ្យ មរណាយ វា សមាទបេយ្យ អម្ភោបុរិស កិំ តុយ្ហិមិនា បាបកេន ទុជ្ជីវិតេន មតន្តេ ជីវិតា
សេយ្យាតិ ឥតិ ចិត្តមនោ ចិត្តសង្កប្បោ អនេកបរិយាយេន មរណវណ្ណំ វា សំវណ្ណេយ្យ មរណាយ វា សមាទបេយ្យាតិ អយំ ភន្តេ តត្ថ អនុបញ្ញត្តិ.
បុច្ឆា – កា អាវុសោ តត្ថ បរិបុណ្ណបញ្ញត្តិ.