៩. បាតិមោក្ខដ្ឋបនក្ខន្ធក

បុច្ឆា – សាបត្តិកេន អាវុសោ បាតិមោក្ខំ សុណន្តស្ស បាតិមោក្ខំ ឋបេតុំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អញ្ញតរំ បុគ្គលំ ទុស្សីលំ បាបធម្មំ អារព្ភ បញ្ញត្តំ, អញ្ញតរោ ភន្តេ បុគ្គលោ ទុស្សីលោ បាបធម្មោ តទហុបោសថេ សង្ឃមជ្ឈេ និសិន្នោ អហោសិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ឋបនំ អាវុសោ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – ឋបនំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ ឯកា អាបត្តិ.