១០. ភិក្ខុនិក្ខន្ធក

បុច្ឆា – អដ្ឋហិ អាវុសោ គរុធម្មេហិ ឧបសម្បទា ភគវតា កត្ថ អនុញ្ញាតា, កស្ស អនុញ្ញាតា, កិស្មិញ្ច វត្ថុស្មិំ អនុញ្ញាតា.

វិស្សជ្ជនា – វេសាលិយំ ភន្តេ មហាបជាបតិយា គោតមិយា អនុញ្ញាតា, មហាបជាបតិ ភន្តេ គោតមី សូនេហិ បាទេហិ រជោកិណ្ណេន គត្តេន ទុក្ខី ទុម្មនា អស្សុមុខី រុទមានា ពហិទ្វារកោដ្ឋកេ អដ្ឋាសិ, អថ ខោ ភន្តេ អាយស្មា អានន្ទោ មហាបជាបតិំ គោតមិំ តំ ការណំ បុច្ឆិត្វា ភគវន្តំ ចតុក្ខត្តុំ យាចិ មាតុគាមស្ស តថាគតប្បវេទិតេ ធម្មវិនយេ អាគារស្មា អនាគារិយំ បព្ពជ្ជំ, តស្មិំ ភន្តេ វត្ថុស្មិំ អនុញ្ញាតា.

បុច្ឆា – ភិក្ខូហិ អាវុសោ ភិក្ខុនិយោ ឧបសម្បាទេតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – វេសាលិយំ ភន្តេ មហាបជាបតិំ គោតមិំ អារព្ភ អនុញ្ញាតំ, មហាបជាបតិ ភន្តេ គោតមី ភគវន្តំ ឯតទវោច ‘‘កថាហំ ភន្តេ ឥមាសុ សាកិយានីសុ បដិបជ្ជាមី’’តិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – ឯកតោ ឧបសម្បន្នាយ អាវុសោ ភិក្ខុនិសង្ឃេ វិសុទ្ធាយ ភិក្ខុសង្ឃេ ឧបសម្បាទេតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ ភិក្ខុនីនំ អន្តរាយិកេ ធម្មេ បុច្ឆិំសុ, ឧបសម្បទាបេក្ខាយោ វិត្ថាយិំសុ, មង្កូ អហេសុំ, ន សក្ខិំសុ វិស្សជ្ជេតុំ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – ភិក្ខុនិក្ខន្ធកំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – ភិក្ខុនិក្ខន្ធកំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ ទ្វេ អាបត្តិយោ.