ចូឡវគ្គបាឡិ

១. កម្ពក្ខន្ធក

បុច្ឆា – ភណ្ឌនាទិការកស្ស អាវុសោ ភិក្ខុនោ តជ្ជនីយកម្មំ កាតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ បណ្ឌុកលោហិតកេ ភិក្ខូ អារព្ភ អនុញ្ញាតំ, បណ្ឌុកលោហិតកា ភន្តេ ភិក្ខូ អត្តនា ភណ្ឌនការកា កលហការកា វិវាទការកា ភស្សការកា សង្ឃេ អធិករណការកា, យេបិ ចញ្ញេ ភិក្ខូ ភណ្ឌនការកា កលហការកា វិវាទការកា ភស្សការកា សង្ឃេ អធិករណការកា តេ ឧបសង្កមិត្វា ឯវមាហំសុ ‘‘មា ខោ តុម្ហេ អាយស្មន្តោ ឯសោ អជេសិ, ពលវាពលវំ បដិមន្តេថ, តុម្ហេ តេន បណ្ឌិតតរា ច ព្យត្តតរា ច ពហុស្សុតតរា ច អលមត្តតរា ច, មា ចស្ស ភាយិត្ថ, មយម្បិ តុម្ហាកំ បក្ខា ភវិស្សាមា’’តិ, តេន អនុប្បន្នានិ ចេវ ភណ្ឌនានិ ឧប្បជ្ជន្តិ, ឧប្បន្នានិ ច ភណ្ឌនានិ ភិយ្យោភាវាយ វេបុល្លាយ សំវត្តន្តិ. តស្មិំ ភន្តេ វត្ថុស្មិំ អនុញ្ញាតំ.

បុច្ឆា – តជ្ជនីយកម្មកតស្ស អាវុសោ ភិក្ខុនោ កតិសុ វត្តេសុ សម្មា វត្តន្តស្ស តំ កម្មំ បដិប្បស្សម្ភេតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – អដ្ឋារសសុ ភន្តេ វត្តេសុ សម្មា វត្តន្តស្ស តជ្ជនីយកម្មកតស្ស ភិក្ខុនោ តំ កម្មំ បដិប្បស្សម្ភេតុំ ភគវតា សាវត្ថិយំ អនុញ្ញាតំ, តេយេវ បណ្ឌុកលោហិតកា ភិក្ខូ សង្ឃេន តជ្ជនីយកម្មកតា សម្មា វត្តិត្វា សង្ឃំ ឧបសង្កមិត្វា យាចិំសុ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – ពាលស្ស អាវុសោ អព្យត្តស្ស អាបត្តិពហុលស្ស អនបទានស្ស គិហិសំសដ្ឋស្ស អននុលោមិកេហិ គិហិសំសគ្គេហិ និយស្សកម្មំ កាតុំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អាយស្មន្តំ សេយ្យសកំ អារព្ភ បញ្ញត្តំ, អាយស្មា ភន្តេ សេយ្យសកោ ពាលោ អហោសិ អព្យត្តោ អាបត្តិពហុលោ អនបទានោ គិហិសំសដ្ឋោ វិហាសិ អននុលោមិកេហិ គិហិសំសគ្គេហិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – និយស្សកម្មកតស្ស អាវុសោ ភិក្ខុនោ កតិសុ វត្តេសុ សម្មា វត្តន្តស្ស តំ កម្មំ បដិប្បស្សម្ភេតុំ ភគវតា អនុញ្ញាតំ.

វិស្សជ្ជនា – អដ្ឋារសសុ ភន្តេ វត្តេសុ សម្មា វត្តន្តស្ស និយស្ស កម្មកតស្ស ភិក្ខុនោ តំ កម្មំ បដិប្បស្សម្ភេតុំ ភគវតា អនុញ្ញាតំ, ន ឧបសម្បាទេតព្ពំ, ន និស្សយោ ទាតព្ពោ, ន សាមណេរោ ឧបដ្ឋាបេតព្ពោ, ន ភិក្ខុនោវាទកសម្មុតិ សាទិតព្ពា, សម្មតេនបិ ភិក្ខុនិយោ ន ឱវទិតព្ពា, ឯវមាទីសុ ភន្តេ អដ្ឋារសសុ វត្តេសុ សម្មា វត្តន្តស្ស និយស្សកម្មកតស្ស ភិក្ខុនោ តំ កម្មំ បដិប្បស្សម្ភេតុំ ភគវតា អនុញ្ញាតំ.

បុច្ឆា – កុលទូសកស្ស អាវុសោ បាបសមាចារស្ស ភិក្ខុនោ បព្ពាជនីយកម្មំ កាតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ អស្សជិបុនព្ពសុកេ ភិក្ខូ អារព្ភ អនុញ្ញាតំ, អស្សជិបុនព្ពសុកា ភន្តេ ភិក្ខូ កីដាគិរិស្មិំ កុលទូសកា អហេសុំ បាបសមាចារា, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – បដិសារណីយកម្មំ អាវុសោ បុច្ឆាមិ, សទ្ធំ អាវុសោ បសន្នំ គហបតិំ ទាយកំ ការកំ សង្ឃុបដ្ឋាកំ ហីនេន ខុំសេន្តស្ស ភិក្ខុនោ បដិសារណីយកម្មំ កាតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ អាយស្មន្តំ សុធម្មំ អារព្ភ អនុញ្ញាតំ, ភគវតិ ភន្តេ សាវត្ថិយំ វិហរតិ អាយស្មា សុធម្មោ មច្ឆិកាសណ្ឌេ ចិត្តំ គហបតិំ សទ្ធំ បសន្នំ ទាយកំ ការកំ សង្ឃុបដ្ឋាកំ ហីនេន ខុំសេសិ ហីនេន វម្ភេសិ, តស្មិំ ភន្តេ វត្ថុស្មិំ អនុញ្ញាតំ.

តេនហិ ភិក្ខវេ សង្ឃោ សុធម្មស្ស ភិក្ខុនោ បដិសារណីយកម្មំ ករោតុ ‘‘ចិត្តោ តេ គហបតិ ខមាបេតព្ពោ’’តិ –

បុច្ឆា – បដិសារណីយកម្មកតស្ស អាវុសោ ភិក្ខុនោ អនុទូតំ ទាតុញ្ច តេន អនុទូតេន សទ្ធិំ គន្ត្វា យថាខុំសិតំ គហបតិំ ខមាបេតុំ ច ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ អាយស្មន្តំយេវ សុធម្មំ អារព្ភ អនុញ្ញាតំ, អាយស្មា ភន្តេ សុធម្មោ មច្ឆិកាសណ្ឌំ គន្ត្វា មង្កុភូតោ នាសក្ខិ ចិត្តំ គហបតិំ ខមាបេតុំ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – បដិសារណីយកម្មកតស្ស អាវុសោ ភិក្ខុនោ កតិសុ វត្តេសុ សម្មា វត្តន្តស្ស តំ កម្មំ បដិប្បស្សម្ភេតុំ ភគវតា អនុញ្ញាតំ.

វិស្សជ្ជនា – អដ្ឋារសសុ ភន្តេ វត្តេសុ សម្មា វត្តន្តស្ស បដិសារណីយ កម្មកតស្ស ភិក្ខុនោ តំ កម្មំ បដិប្បស្សម្ភេតុំ ភគវតា អនុញ្ញាតំ.

បុច្ឆា – អាបត្តិំ អាវុសោ អាបជ្ជិត្វា តំ អាបត្តិំ បស្សិតុំ វា បដិកាតុំ វា ន ឥច្ឆន្តស្ស ភិក្ខុនោ អាបត្តិយា អទស្សនេ វា អប្បដិកម្មេ វា ឧក្ខេបនីយកម្មំ កាតុំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – កោសម្ពិយំ ភន្តេ អាយស្មន្តំ ឆន្នត្ថេរំ អារព្ភ បញ្ញត្តំ, អាយស្មា ភន្តេ ឆន្នោ អាបត្តិំ អាបជ្ជិត្វា ន ឥច្ឆិ តំ អាបត្តិំ បស្សិតុំ វា បដិកាតុំ វា, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អាបត្តិយា អាវុសោ អទស្សនេន វា អប្បដិកម្មេ វា ឧក្ខេបនីយ កម្មកតេន ភិក្ខុនា កតិសុ វត្តេសុ សម្មា វត្តិតព្ពំ.

វិស្សជ្ជនា – តេចត្តាលីសាយ ភន្តេ វត្តេសុ សម្មា វត្តិតព្ពំ.

បុច្ឆា – ឧក្ខេបនីយកម្មកតស្ស អាវុសោ ភិក្ខុនោ សម្មា វត្តន្តស្ស តំ កម្មំ បដិប្បស្សម្ភេតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – កោសម្ពិយំ ភន្តេ អាយស្មន្តំយេវ ឆន្នំ អារព្ភ អនុញ្ញាតំ, អាយស្មា ភន្តេ ឆន្នោ សង្ឃេន អាបត្តិយា អទស្សនេ វា អប្បដិកម្មេ វា ឧក្ខេបនីយកម្មកតោ សម្មា វត្តេសិ លោមំបាតេសិ នេត្ថារំ វត្តេសិ សង្ឃំ ឧបសង្កមិត្វា តស្ស កម្មស្ស បដិប្បស្សទ្ធិយា យាចិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – បាបិកំ អាវុសោ ទិដ្ឋិំ គហេត្វា តំ ទិដ្ឋិំ ន បដិនិស្សជ្ជន្តស្ស បាបិកាយ ទិដ្ឋិយា អប្បដិនិស្សគ្គេ ឧក្ខេបនីយកម្មំ កាតុំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អរិដ្ឋំ ភិក្ខុំ គទ្ធពាធិបុព្ពំ អារព្ភ បញ្ញត្តំ, ភគវតិ ភន្តេ សាវត្ថិយំ វិហរតិ អរិដ្ឋស្ស នាម ភិក្ខុនោ គទ្ធពាធិបុព្ពស្ស ឯវរូបំ បាបកំ ទិដ្ឋិគតំ ឧប្បន្នំ អហោសិ ‘‘តថាហំ ភគវតា ធម្មំ ទេសិតំ អាជានាមិ, យថាយេមេ អន្តរាយិកា ធម្មា វុត្តា ភគវតា, តេ បដិសេវតោ នាលំ អន្តរាយាយា’’តិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – បាបិកាយ អាវុសោ ទិដ្ឋិយា អប្បដិនិស្សគ្គេ ឧក្ខេបនីយកម្មកតេន ភិក្ខុនា កតិសុ វត្តេសុ សម្មា វត្តិតព្ពំ.

វិស្សជ្ជនា – តេចត្តាលីសាយ ភន្តេ វត្តេសុ សម្មា វត្តិតព្ពំ.

បុច្ឆា – កម្មក្ខន្ធកំ បុច្ឆិស្សំ, សនិទានិ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – កម្មក្ខន្ធកំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ ឯកា អាបត្តិ.

២. បារិវាសិកក្ខន្ធក

បុច្ឆា – បារិវាសិកស្ស អាវុសោ បកតត្តានំ ភិក្ខូនំ អភិវាទនាទីនិ សាទិយន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ បារិវាសិកេ ភិក្ខូ អារព្ភ បញ្ញត្តំ, បារិវាសិកា ភន្តេ ភិក្ខូ សាទិយិំសុ បកតត្តានំ ភិក្ខូនំ អភិវាទនាទីនិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – បារិវាសិកេន អាវុសោ ភិក្ខុនា កតិសុ វត្តេសុ សម្មា វត្តិតព្ពំ.

វិស្សជ្ជនា – បារិវាសិកេន ភន្តេ ភិក្ខុនា ចតុនវុតិយា វត្តេសុ សម្មា វត្តិតព្ពំ.

បុច្ឆា – បារិវាសិកំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – បារិវាសិកំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ ឯកា អាបត្តិ.

៣. សមុច្ចយក្ខន្ធក

បុច្ឆា – សមុច្ចយំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – សមុច្ចយំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ ឯកា អាបត្តិ.

៤. សមថក្ខន្ធក

បុច្ឆា – អសម្មុខីភូតានំ អាវុសោ ភិក្ខូនំ តជ្ជនីយំ វា និយស្សំ វា បព្ពាជនីយំ វា បដិសារណីយំ វា ឧក្ខេបនីយំ វា កម្មំ ករោន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ អសម្មុខីភូតានំ ភិក្ខូនំ កម្មំ អកំសុ តជ្ជនីយម្បិ និយស្សម្បិ បព្ពាជនីយម្បិ បដិសារណីយម្បិ ឧក្ខេបនីយម្បិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – សតិវេបុល្លបត្តស្ស អាវុសោ ភិក្ខុនោ សតិវិនយំ ទានំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – រាជគហេ ភន្តេ មេត្តិយភូមជកេ ភិក្ខូ អារព្ភ អនុញ្ញាតំ មេត្តិយភូមជកា ភន្តេ ភិក្ខូ អាយស្មន្តំ ទព្ពំ មល្លបុត្តំ អមូលិកាយ សីលវិបត្តិយា អនុទ្ធំសេសុំ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – កតិបនាវុសោ ឯត្ថ ធម្មិកានិ សតិវិនយទានានិ.

វិស្សជ្ជនា – បញ្ចិមានិ ភន្តេ ធម្មិកានិ សតិវិនយស្ស ទានានិ, សុទ្ធោ ហោតិ ភិក្ខុ អនាបត្តិកោ, អនុវទន្តិ ច នំ, យាចតិ ច, តស្ស សង្ឃោ សតិវិនយំ ទេតិ ធម្មេន សមគ្គេន, ឥមានិ ខោ ភន្តេ បញ្ច ធម្មិកានិ សតិ វិនយស្ស ទានានិ.

បុច្ឆា – អមូឡ្ហស្ស អាវុសោ ភិក្ខុនោ អមូឡ្ហវិនយំ ទាតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ គគ្គំ ភិក្ខុំ ឧម្មត្តកេន ចិត្តវិបរិយាសកតេន អជ្ឈាចិណ្ណេន អាបត្តិយា ចោទេសុំ ‘‘សរតា យស្មា ឯវរូបិំ អាបត្តិំ អាបជ្ជិតា’’តិ, សោ ឯវំ វទេតិ ‘‘អហំ ខោ អាវុសោ ឧម្មត្តកោ អហោសិ ចិត្តវិបរិយាសកតោ, តេន មេ ឧម្មត្តកេន ចិត្តវិបរិយាសកតេន ពហុំ អស្សាមណកំ អជ្ឈាចិណ្ណំ ភាសិតបរិក្កន្តំ, នាហំ តំ សរាមិ, មូឡ្ហេន មេ ឯតំ កត’’ន្តិ. ឯវម្បិ នំ វុច្ចមានា ចោទេន្តេវ ‘‘សរតា យស្មា ឯវរូបិំ អាបត្តិំ អាបជ្ជិតា’’តិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – កតិ អាវុសោ អធម្មិកានិ អមូឡ្ហវិនយស្ស ទានានិ, វិភជិត្វា កថេហិ.

វិស្សជ្ជនា – តីណិ ភន្តេ អធម្មិកានិ អមូឡ្ហវិនយស្ស ទានានិ, ឥធ ភន្តេ ភិក្ខុ អាបត្តិំ អាបន្នោ ហោតិ, តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា ‘‘សរតាយស្មា ឯវរូបិំ អាបត្តិំ អាបជ្ជិតា’’តិ, សោ សរមានោវ ឯវំ វទេតិ ‘‘ន ខោ អហំ អាវុសោ សរាមិ ឯវរូបិំ អាបត្តិំ អាបជ្ជិតា’’តិ. អញ្ញោ សរមានោវ ឯវំ វទេតិ ‘‘សរាមិ ខោ អហំ អាវុសោ យថា សុបិនន្តេនា’’តិ. អញ្ញោ អនុម្មត្តកោវ ឧម្មត្តកាលយំ ករោតិ ‘‘អហម្បិ ខោ ឯវំ ករោមិ, តុម្ហេបិ ឯវំ ករោថ, មយ្ហម្បិ ឯតំ កប្បតិ, តុម្ហាកម្បេតំ កប្បតី’’តិ. ឯសំ សង្ឃោ អមូឡ្ហវិនយំ ទេតិ, អធម្មិកំ ភន្តេ អមូឡ្ហវិនយស្ស ទានំ. ឥមានិ ខោ ភន្តេ តីណិ អធម្មិកានិ អមូឡ្ហវិនយស្ស ទានានិ.

បុច្ឆា – កតិ អាវុសោ ធម្មិកានិ អមូឡ្ហវិនយស្ស ទានានិ, វិភជិត្វា កថេហិ.

វិស្សជ្ជនា – តីណិ ភន្តេ ធម្មិកានិ អមូឡ្ហវិនយស្ស ទានានិ, ឥធ ភន្តេ ភិក្ខុ ឧម្មត្តកោ ហោតិ ចិត្តវិបរិយាសកតោ តេន ឧម្មត្តកេន ចិត្តវិបរិយាសកតេន ពហុំ អស្សាមណកំ អជ្ឈាចិណ្ណំ ហោតិ ភាសិតបរិក្កន្តំ, តមេនំ ចោទេតិ សង្ឃោ វា សម្ពហុលា វា ឯកបុគ្គលោ វា ‘‘សរតាយស្មា ឯវរូបិំ អាបត្តិំ អាបជ្ជិតា’’តិ, សោ អស្សរមានោវ ឯវំ វទេតិ ‘‘ន ខោ អហំ អាវុសោ សរាមិ ឯវរូបិំ អាបត្តិំ អាបជ្ជិតា’’តិ. អញ្ញោបិ អស្សរមានោវ ឯវំ វទេតិ ‘‘សរាមិ ខោ អហំ អាវុសោ យថា សុបិនន្តេនា’’តិ. អញ្ញោបិ ឧម្មត្តកោវ ឧម្មត្តកាលយំ ករោតិ ‘‘អហម្បិ ឯវំ ករោមិ, តុម្ហេបិ ឯវំ ករោថ, មយ្ហម្បិ ឯតំ កប្បតិ, តុម្ហាកម្បេតំ កប្បតី’’តិ. ឯសំ ភន្តេ តិណ្ណំ ភិក្ខូនំ សង្ឃោ អមូឡ្ហវិនយំ ទេតិ, ធម្មិកំ ភន្តេ អមូឡ្ហវិនយស្ស ទានំ. ឥមានិ ខោ ភន្តេ តីណិ ធម្មិកានិ អមូឡ្ហវិនយស្ស ទានានិ.

បុច្ឆា – អប្បដិញ្ញាយ អាវុសោ ភិក្ខូនំ តជ្ជនីយាទីនិ កម្មានិ ករោន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ អប្បដិញ្ញាយ ភិក្ខូនំ កម្មានិ អកំសុ តជ្ជនីយាទីនិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កថំ អាវុសោ អធម្មិកំ ហោតិ បដិញ្ញាតករណំ.

វិស្សជ្ជនា – អញ្ញថា ភន្តេ អាបត្តិំ អាបជ្ជន្តស្ស អញ្ញថា បដិជានន្តស្ស យថា សោ បដិជានាតិ, តថា សង្ឃោ ការេតិ, ឯវំ ខោ ភន្តេ អធម្មិកំ ហោតិ បដិញ្ញាតករណំ.

បុច្ឆា – កថំ អាវុសោ ធម្មិកំ ហោតិ បដិញ្ញាតករណំ.

វិស្សជ្ជនា – យំ ភន្តេ អាបត្តិំ អាបជ្ជន្តស្ស តមេវ បដិជានន្តស្ស តេនេវ សង្ឃោ ការេតិ, ឯវំ ខោ ភន្តេ ធម្មិកំ បដិញ្ញាតករណំ.

បុច្ឆា – យេភុយ្យសិកាយ អាវុសោ អធិករណំ វូបសមេតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ ភណ្ឌនជាតា កលហជាតា វិវាទាបន្នា អញ្ញមញ្ញំ មុខសត្តីហិ វិតុទន្តា វិហរិំសុ, ន សក្កោន្តិ តំ អធិករណំ វូបសមេតុំ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – កថំ អាវុសោ អធិករណំ យេភុយ្យសិកាយ វូបសមេតព្ពំ.

វិស្សជ្ជនា – បញ្ចហិ ភន្តេ អង្គេហិ សមន្នាគតោ ភិក្ខុ សលាកគ្គាហាបកោ សម្មន្និតព្ពោ, តេន ភន្តេ សលាកគ្គាហាបកេន សលាកា គាហាតព្ពា យថា ពហុតរា ភិក្ខូ ធម្មវាទិនោ វទន្តិ តថា តំ អធិករណំ វូបសមេតព្ពំ, ឯវំ ខោ ភន្តេ យេភុយ្យសិកាយ អធិករណំ វូបសមេតព្ពំ.

បុច្ឆា – កតិ អាវុសោ អធម្មិកា សលាកគ្គាហា.

វិស្សជ្ជនា – ទស ភន្តេ អធម្មិកា សលាកគ្គាហា, ឱរមត្តកញ្ច អធិករណំ ហោតិ, ន ច គតិគតំ ហោតិ, ន ច សរិតសារិតំ ហោតិ, ជានាតិ ‘អធម្មវាទី ពហុតរា’តិ, អប្បេវ នាម អធម្មវាទី ពហុតរា អស្សូតិ, ជានាតិ ‘សង្ឃោ ភិជ្ជិស្សតី’តិ, អប្បេវ នាម សង្ឃោ ភិជ្ជេយ្យាតិ, អធម្មេន គណ្ហន្តិ, វគ្គា គណ្ហន្តិ, ន ច យថាទិដ្ឋិយា គណ្ហន្តិ, ឥមេ ខោ ភន្តេ ទស អធម្មិកា កលាកគ្គាហា.

បុច្ឆា – កតិ អាវុសោ ធម្មិកា សលាកគ្គាហា.

វិស្សជ្ជនា – ទស ភន្តេ ធម្មិកា សលាកគ្គាហា វុត្តវិបរិយាយេន.

បុច្ឆា – បាបុស្សន្នស្ស អាវុសោ ភិក្ខុស្ស តស្ស បាបិយសិកា កម្មំ កាតុំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឧបវាឡំ ភិក្ខុំ អារព្ភ បញ្ញត្តំ, ឧបវាឡោ ភន្តេ ភិក្ខុ សង្ឃមជ្ឈេ អាបត្តិយា អនុយុញ្ជិយមានោ អវជានិត្វា បដិជានាតិ, បដិជានិត្វា អវជានាតិ, អញ្ញេនញ្ញំ បដិចរតិ, សម្បជានមុសា ភាសតិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កតិ អាវុសោ ធម្មិកានិ តស្សបាបិយសិកា កម្មស្ស ករណានិ.

វិស្សជ្ជនា – បញ្ចិមានិ ភន្តេ ធម្មិកានិ តស្សបាបិយសិកា កម្មស្ស ករណានិ. អសុចិ ច ហោតិ, អលជ្ជី ច, សានុវាទោ ច, តស្ស សង្ឃោ តស្សបាបិយសិកា កម្មំ ករោតិ ធម្មេន សមគ្គេន, ឥមានិ ខោ ភន្តេ បញ្ច ធម្មិកានិ តស្ស បាបិយសិកា កម្មស្ស ករណានិ.

បុច្ឆា – តស្ស បាបិយសិកាកម្មកតេន អាវុសោ ភិក្ខុនា កតិសុ វត្តេសុ សម្មា វត្តិតព្ពំ.

វិស្សជ្ជនា – តស្ស បាបិយសិកាកម្មកតេន ភន្តេ ភិក្ខុនា អដ្ឋារសសុ វត្តេសុ សម្មា វត្តិតព្ពំ. ន ឧបសម្បាទេតព្ពំ, ន និស្សយោ ទាតព្ពោ, ន សាមណេរោ ឧបដ្ឋាបេតព្ពោ, ឯវមាទីសុ ភន្តេ អដ្ឋារសសុ វត្តេសុ សម្មា វត្តិតព្ពំ.

បុច្ឆា – កតិ អាវុសោ អធិករណានិ សមថេហិ វូបសមេតព្ពានិ.

វិស្សជ្ជនា – ចត្តារិមានិ ភន្តេ អធិករណានិ សមថេហិ វូបសមេតព្ពានិ, វិវាទាធិករណំ អនុវាទាធិករណំ អាបត្តាធិករណំ កិច្ចាធិករណំ, ឥមានិ ភន្តេ ចត្តារិ អធិករណានិ សមថេហិ វូបសមេតព្ពានិ.

បុច្ឆា – កិំ អាវុសោ វិវាទាធិករណស្ស មូលំ.

វិស្សជ្ជនា – ឆ ភន្តេ វិវាទមូលានិ វិវាទាធិករណស្ស មូលំ, តីណិបិ អកុសលមូលានិ វិវាទាធិករណស្ស មូលំ, តីណិបិ កុសលមូលានិ វិវាទាធិករណស្ស មូលំ, ឥទំ ភន្តេ វិវាទាធិករណស្ស មូលំ.

បុច្ឆា – កិំ បនាវុសោ អនុវាទាធិករណស្ស មូលំ.

វិស្សជ្ជនា – ឆ ភន្តេ អនុវាទមូលានិ អនុវាទាធិករណស្ស មូលំ, តីណិបិ អកុសលមូលានិ អនុវាទាធិករណស្ស មូលំ, តីណិបិ កុសលមូលានិ អនុវាទាធិករណស្ស មូលំ, កាយោបិ អនុវាទាធិករណស្ស មូលំ, វាចាបិ អនុវាទាធិករណស្ស មូលំ, ឥទំ ខោ ភន្តេ អនុវាទាធិករណស្ស មូលំ.

បុច្ឆា – កិំ បនាវុសោ អាបត្តាធិករណស្ស មូលំ.

វិស្សជ្ជនា – ឆ ភន្តេ អាបត្តិសមុដ្ឋានា អាបត្តាធិករណស្ស មូលំ, អត្តិ ភន្តេ អាបត្តិ កាយតោ សមុដ្ឋាតិ ន វាចតោ ន ចិត្តតោ, អត្ថិ ភន្តេ អាបត្តិ វាចតោ សមុដ្ឋាតិ ន កាយតោ ន ចិត្តតោ, អត្ថិ ភន្តេ អាបត្តិ កាយតោ ច វាចតោ ច សមុដ្ឋាតិ ន ចិត្តតោ, អត្ថិ ភន្តេ អាបត្តិ កាយតោ ច ចិត្តតោ ច សមុដ្ឋាតិ ន វាចតោ, អត្ថិ ភន្តេ អាបត្តិ វាចតោ ច ចិត្តតោ ច សមុដ្ឋាតិ ន កាយតោ, អត្ថិ ភន្តេ អាបត្តិ កាយតោ ច វាចតោ ច ចិត្តតោ ច សមុដ្ឋាតិ, ឥមានិ ភន្តេ ឆ អាបត្តិ សមុដ្ឋានានិ អាបត្តាធិករណស្ស មូលំ.

បុច្ឆា – កិំ បនាវុសោ កិច្ចាធិករណស្ស មូលំ.

វិស្សជ្ជនា – កិច្ចាធិករណស្ស ភន្តេ ឯកំ មូលំ សង្ឃោ.

បុច្ឆា – សមថំ អាវុសោ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – សមថំ ភន្តេ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ ទ្វេ អាបត្តិយោ.

៥. ខុទ្ទកវត្ថុក្ខន្ធក

បុច្ឆា – នហាយន្តេន អាវុសោ ភិក្ខុនា រុក្ខេ វា ថម្ភេ វា កុដ្ដេ វា កាយំ ឧគ្ឃំសេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ នហាយមានា រុក្ខេបិ ថម្ភេបិ កុដ្ដេបិ កាយំ ឧគ្ឃំសេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – គន្ធព្ពហត្ថកេន វា អាវុសោ កុរុវិន្ទកសុត្តិយា វា មល្លកេន វា នហាយន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេវ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ គន្ធព្ពហត្ថកេនបិ កុរុវិន្ទកសុត្តិយាបិ មល្លកេនបិ នហាយិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – បាណិនា អាវុសោ បរិកម្មំ កាតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ បិដ្ឋិបរិកម្មំ កាតុំ កុក្កុច្ចាយិំសុ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – វល្លិកំ វា អាវុសោ បាមង្គំ វា កណ្ឋសុត្តកំ វា កដិសុត្តកំ វា ឱវដ្ដិកំ វា កាយុរំ វា ហត្ថាភរណំ វា អង្គុលិមុទ្ទិកំ វា ធារេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ វល្លិកាទីនិ ធារេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ទីឃេ អាវុសោ កេសេ ធារេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ទីឃេ កេសេ ធារេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កោច្ឆេនវា អាវុសោ ផណកេនវា ហត្ថផណកេនវា កេសេ ឱសណ្ឋេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេវ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ កោច្ឆាទីហិ កេសេ ឱសណ្ឋេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អាទាសេ វា អាវុសោ ឧទកបត្តេ វា មុខនិមិត្តំ ឱលោកេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេវ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ អាទាសេបិ ឧទកបត្តេបិ មុខនិមិត្តំ ឱលោកេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អាពាធបច្ចយា បនាវុសោ អាទាសេ វា ឧទកបត្តេ វា មុខនិមិត្តំ ឱលោកេតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – រាជគហេ ភន្តេ អញ្ញតរំ ភិក្ខុំ អារព្ភ អនុញ្ញាតំ, ភគវតិ ភន្តេ រាជគហេ វិហរតិ អញ្ញតរស្ស ភិក្ខុនោ មុខេ វណោ អហោសិ, សោ ភិក្ខូ ឯតទវោច ‘‘កីទិសោ មេ អាវុសោ វណោ’’តិ, ភិក្ខូ ឯវមាហំសុ ‘‘ឯទិសោ តេ អាវុសោ វណោ’’តិ, សោ ន សទ្ទហតិ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – មុខាលេបនាទីនិ អាវុសោ ករោន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ មុខាលេបនាទីនិ អកំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – នច្ចំ វា អាវុសោ គីតំ វា វាទិតំ វា ទស្សនាយ គច្ឆន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ នច្ចម្បិ គីតម្បិ វាទិតម្បិ ទស្សនាយ គច្ឆិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កថំ អាវុសោ នច្ចាទីនិ បស្សន្តស្ស អាបត្តិ ហោតិ, កថំ បន អនាបត្តិ.

វិស្សជ្ជនា – នច្ចំ វា ភន្តេ គីតំ វា វាទិតំ វា ទស្សនាយ គច្ឆតិ អាបត្តិ ទុក្កដស្ស, យត្ថ ឋិតោ បស្សតិ វា សុណាតិ វា អាបត្តិ ទុក្កដស្ស, ទស្សនូបចារំ វិជហិត្វា បុនប្បុនំ បស្សតិ អាបត្តិ ទុក្កដស្ស, អារាមេ ឋិតស្ស បស្សតោ អនាបត្តិ, វិហារតោ បន វិហារំ បស្សិស្សាមីតិ គច្ឆតោ អាបត្តិយេវ, យត្ថ ឋិតោ បស្សតិ វា សុណាតិ វា អាបត្តិ ទុក្កដស្ស, អាសនសាលាយ និសិន្នោ បស្សតិ អនាបត្តិ, បស្សិស្សាមីតិ វុដ្ឋហិត្វា គច្ឆតិ អាបត្តិ ទុក្កដស្ស, យត្ថ ឋិតោ បស្សតិ វា សុណាតិ វា អាបត្តិ ទុក្កដស្ស, បតិបថំ គច្ឆន្តោ បស្សតិ អនាបត្តិ, គីវំ បរិវត្តេត្វា បស្សតោ បន អាបត្តិ ភន្តេ.

បុច្ឆា – អាយតកេន អាវុសោ គីតស្សរេន ធម្មំ គាយន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ អាយតកេន គីតស្សរេន ធម្មំ គាយិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ទារុបត្តំ អាវុសោ ធារេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ អាយស្មន្តំ បិណ្ឌោលភារទ្វាជំ អារព្ភ បញ្ញត្តំ, អាយស្មា ភន្តេ បិណ្ឌោលភារទ្វាជោ ឆវស្ស ទារុបត្តស្ស ការណា គិហីនំ ឧត្តរិមនុស្សធម្មំ ឥទ្ធិបាដិហារិយំ ទស្សេតិ, តស្មិំ ភន្តេ វត្ថុស្មិំ បញ្ញត្តំ.

ន ច ភិក្ខវេ ទារុបត្តោ ធារេតព្ពោ, យោ ធារេយ្យ អាបត្តិ ទុក្កដស្ស –

បុច្ឆា – ភគវតា អាវុសោ ឧច្ចាវចេ បត្តេ បដិក្ខិបិត្វា អយោ បត្តោ ភូមិបត្តោតិ ឥមេយេវ ទ្វេ បត្តា កត្ថ អនុញ្ញាតា, កំ អារព្ភ កិស្មិំ វត្ថុស្មិំ អនុញ្ញាតា.

វិស្សជ្ជនា – រាជគហេ ភន្តេ ឆព្ពគ្គិយេ ភិក្ខូ អារព្ភ អនុញ្ញាតា, ឆព្ពគ្គិយា ភន្តេ ភិក្ខូ ឧច្ចាវចេ បត្តេ ធារេសុំ សោវណ្ណមយា រូបិយមយា, តស្មិំ ភន្តេ វត្ថុស្មិំ អនុញ្ញាតា.

បុច្ឆា – សោទកំ អាវុសោ បត្តំ បដិសាមេន្តស្ស ច ឱតាបេន្តស្សច ឧណ្ហេ បត្តំ និទហន្តស្ស ច ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ សោទកំ បត្តំ បដិសាមេសុំ, ឱតាបេសុំ, ឧណ្ហេ បត្តំ និទហិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ឆវសីសបត្តំ អាវុសោ ធារេន្តស្ស ច សព្ពបំសុកូលិកស្ស ច ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ អញ្ញតរំ ភិក្ខុំ អារព្ភ បញ្ញត្តំ, អញ្ញតរោ ភន្តេ ភិក្ខុ សព្ពបំសុកូលិកោ អហោសិ, សោ ឆវសីសស្ស បត្តំ ធារេសិ, អញ្ញតរា ឥត្ថី បស្សិត្វា ភីតា វិស្សរមកាសិ ‘‘អភុំ មេ បិសាចោ វតាយ’’ន្តិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ចលកានិ វា អាវុសោ អដ្ឋិកានិ វា ឧច្ឆិដ្ឋោទកំ វា បត្តេន នីហរន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ ចលកានិបិ អដ្ឋិកានិបិ ឧច្ឆិដ្ឋោ ទកម្បិ បត្តេន នីហរិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ឧបាហនត្ថវិកា អាវុសោ ភគវតា កត្ថ អនុញ្ញាតា, កំ អារព្ភ កិស្មិំ វត្ថុស្មិំ អនុញ្ញាតា.

វិស្សជ្ជនា – អន្តរា ច ភន្តេ រាជគហំ អន្តរា ច វេសាលិំ អញ្ញតរំ ភិក្ខុំ អារព្ភ អនុញ្ញាតា, អញ្ញតរោ ភន្តេ ភិក្ខុ ឧបាហនាយោ កាយពន្ធនេន ពន្ធិត្វា គាមំ បិណ្ឌាយ បាវិសិ, អញ្ញតរោ ឧបាសកោ តំ ភិក្ខុំ អភិវាទេន្តោ ឧបាហនាយោ សីសេន ឃដ្ដេតិ, សោ ភិក្ខុ មង្កុ អហោសិ, តស្មិំ ភន្តេ វត្ថុស្មិំ អនុញ្ញាតា.

បុច្ឆា – អទ្ធានមគ្គប្បដិបន្នេន អាវុសោ បរិស្សាវនំ យាចិយមានេន ន ទទន្តស្ស ច អប្បដិស្សាវនកេន អទ្ធានំ បដិបជ្ជន្តស្ស ច ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – អន្តរា ច ភន្តេ រាជគហំ អន្តរា ច វេសាលិំ អញ្ញតរំ ភិក្ខុំ អារព្ភ បញ្ញត្តំ, អញ្ញតរោ ភន្តេ ភិក្ខុ បរិស្សាវនំ យាចិយមានោ ន អទាសិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – បុប្ផាភិកិណ្ណេ អាវុសោ សយនេ សយន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – វេសាលិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ បុប្ផាភិកិណ្ណេសុ សយនេសុ សយិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ឯកភាជនេ វា អាវុសោ ភុញ្ជន្តានំ ឯកថាលកេ វា បិវន្តានំ ឯកត្ថរណបាវុរណានំ វា តុវដ្ដានំ ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – វេសាលិយំ ភន្តេ ឆព្ពគ្គិយេវ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ឯកភាជនេបិ ភុញ្ជិំសុ, ឯកថាលកេបិ បិវិំសុ, ឯកមញ្ចកេបិ តុវដ្ដេសុំ, ឯកត្ថរណាបិ តុវដ្ដេសុំ, ឯកបាវុរណាបិ តុវដ្ដេសុំ, ឯកត្ថរណបាវុរណាបិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ចាមរិពីជនិំ អាវុសោ បដិក្ខិបិត្វា តិស្សោ ពីជនិយោ ភគវតា កត្ថ អនុញ្ញាតា, កិស្មិញ្ច វត្ថុស្មិំ អនុញ្ញាតា.

វិស្សជ្ជនា – សាវត្ថិយំ ភន្តេ អនុញ្ញាតា, សាវត្ថិយំ ភន្តេ ភគវតិ វិហរតិ សង្ឃស្ស ចាមរិពីជនី ឧប្បន្នា អហោសិ, ភគវតោ ឯតមត្ថំ អារោចេសុំ, តស្មិំ ភន្តេ វត្ថុស្មិំ អនុញ្ញាតា.

ន ភិក្ខវេ ចាមរិពីជនី ធារេតព្ពា, យោ ធារេយ្យ, អាបត្តិ ទុក្កដស្ស. អនុជានាមិ ភិក្ខវេ តិស្សោ ពីជនិយោ វាកមយំ ឧសីរមយំ មោរបិញ្ឆា មយំ.

បុច្ឆា – ទីឃេ អាវុសោ នខេ ធារេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អញ្ញតរំ ភិក្ខុំ អារព្ភ បញ្ញត្តំ, អញ្ញតរោ ភន្តេ ភិក្ខុ ទីឃេ នខេ ធារេសិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កត្តរិកាយ អាវុសោ កេសេ ឆេទាបេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ កត្តរិកាយ កេសេ ឆិន្ទិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ទីឃេ អាវុសោ នាសិកាលោមេ ធារេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ ទីឃានិ នាសិកាលោមានិ ធារេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ឧច្ចាវចា អាវុសោ កណ្ណមលហរណិយោ បដិក្ខិបិត្វា ទស កណ្ណមលហរណិយោ ភគវតា កត្ថ អនុញ្ញាតា, កំ អារព្ភ កិស្មិំ វត្ថុស្មិំ អនុញ្ញាតា.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ អនុញ្ញាតា, ឆព្ពគ្គិយា ភន្តេ ភិក្ខូ ឧច្ចាវចា កណ្ណមលហរណិយោ ធារេសុំ សោវណ្ណមយំ រូបិយមយំ, តស្មិំ ភន្តេ វត្ថុស្មិំ អនុញ្ញាតា.

បុច្ឆា – សង្ឃាដិបល្លត្ថិកាយ និសីទន្តស្ស អាវុសោ ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ សង្ឃាដិបល្លត្ថិកាយ និសីទិំសុ, សង្ឃាដិយា បត្តា លុជ្ជិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អកាយពន្ធនេន អាវុសោ គាមំ បវិសន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ អញ្ញតរំ ភិក្ខុំ អារព្ភ បញ្ញត្តំ, អញ្ញតរោ ភន្តេ ភិក្ខុ អកាយពន្ធនោ គាមំ បិណ្ឌាយ បាវិសិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – គិហិនិវត្ថំ អាវុសោ និវាសេន្តស្ស ច, គិហិបារុតំ បារុបន្តស្ស ច, សំវេល្លិយំ និវាសេន្តស្ស ច ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ គិហិនិវត្ថំ និវាសិំសុ, គិហិបារុតម្បិ បារុបិំសុ, សំវេល្លិយម្បិ និវាសិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – ឧភតោ កាជំ អាវុសោ ធារេន្តស្ស ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ឧភតោ កាជំ ធារេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – លោកាយតំ អាវុសោ បរិយាបុណន្តស្ស ច វាចេន្តស្ស ច ទុក្កដំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.