៨. វត្តក្ខន្ធក

បុច្ឆា – អាគន្តុកានំ អាវុសោ ភិក្ខូនំ វត្តំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ សម្ពហុលេ អាគន្តុកេ ភិក្ខូ អារព្ភ បញ្ញត្តំ, អាគន្តុកា ភន្តេ ភិក្ខូ សឧបាហនាបិ អារាមំ បវិសិំសុ, ឆត្តបគ្គហិតាបិ អារាមំ បវិសិំសុ, ឱគុណ្ឋិតាបិ អារាមំ បវិសិំសុ, សីសេបិ ចីវរំ ករិត្វា អារាមំ បវិសិំសុ, បានីយេនបិ បាទេ ទោវិំសុ, វុឌ្ឍតរេបិ អាវាសិកេ ភិក្ខូ នាភិវាទេសុំ, នបិ សេនាសនំ បុច្ឆិំសុ, តស្មិំ ភន្តេ វត្ថុស្មិំ ‘‘តេន ហិ ភិក្ខវេ អាគន្តុកានំ ភិក្ខូនំ វត្តំ បញ្ញបេស្សាមិ, យថា អាគន្តុកេហិ ភិក្ខូហិ សម្មា វត្តិតព្ពំ, អាគន្តុកេន ភិក្ខវេ ភិក្ខុនា ឥទានិ អារាមំ បវិសិស្សាមីតិ ឧបាហនា ឱមុញ្ចិត្វា នីចំ កត្វា បប្ផោដេត្វា គហេត្វា ឆត្តំ អបនាមេត្វា សីសំ វិវរិត្វា សីសេ ចីវរំ ខន្ធេ កត្វា សាធុកំ អតរមានេន អារាមោ បវិសិតព្ពោ’’ ឯវមាទិនា ភន្តេ អាគន្តុកានំ ភិក្ខូនំ វត្តំ បញ្ញត្តំ.

បុច្ឆា – អាវាសិកានំ អាវុសោ ភិក្ខូនំ វត្តំ ភគវតា កត្ថ កំ អារព្ភ កិស្មិំ វត្ថុស្មិំ បញ្ញត្តំ, កថញ្ច បន បញ្ញត្តំ.

វិស្សជ្ជនា – សាវត្ថិយំ ភន្តេ សម្ពហុលេ អាវាសិកេ ភិក្ខូ អារព្ភ បញ្ញត្តំ, សម្ពហុលា ភន្តេ អាវាសិកា ភិក្ខូ អាគន្តុកេ ភិក្ខូ ទិស្វា នេវ អាសនំ បញ្ញបេសុំ, ន បាទោទកំ បាទបីឋំ បាទកថលិកំ ឧបនិក្ខិបិំសុ, ន បច្ចុគ្គន្ត្វា បត្តចីវរំ បដិគ្គហេសុំ, ន សេនាសនំ បញ្ញបេសុំ, តស្មិំ ភន្តេ វត្ថុស្មិំ បញ្ញត្តំ, តស្មិំ ភន្តេ វត្ថុស្មិំ –

‘‘អាវាសិកេន ភិក្ខវេ ភិក្ខុនា អាគន្តុកំ ភិក្ខុំ វុឌ្ឍតរំ ទិស្វា អាសនំ បញ្ញបេតព្ពំ, បាទោទកំ បាទបីឋំ បាទកថលិកំ ឧបនិក្ខិបិតព្ពំ, បច្ចុគ្គន្ត្វា បត្តចីវរំ បដិគ្គហេតព្ពំ បានីយេន បុច្ឆិតព្ពោ’’ ឯវមាទិនា ភន្តេ អាវាសិកានំ ភិក្ខូនំ វត្តំ ភគវតា បញ្ញត្តំ.

បុច្ឆា – គមិកានំ អាវុសោ ភិក្ខូនំ វត្តំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ, កថញ្ចបន បញ្ញត្តំ.

វិស្សជ្ជនា – សាវត្ថិយំ ភន្តេ សម្ពហុលេ គមិកេ ភិក្ខូ អារព្ភ បញ្ញត្តំ, សម្ពហុលា ភន្តេ គមិកា ភិក្ខូ ទារុភណ្ឌំ មត្តិកាភណ្ឌំ អប្បដិសាមេត្វា ទ្វារវាតបានំ វិវរិត្វា សេនាសនំ អនាបុច្ឆា បក្កមិំសុ, តស្មិំ ភន្តេ វត្ថុស្មិំ ‘‘គមិកេន ភិក្ខវេ ភិក្ខុនា ទារុភណ្ឌំ បដិសាមេត្វា ទ្វារវាតបានំ ថកេត្វា សេនាសនំ អាបុច្ឆា បក្កមិតព្ពំ’’ ឯវមាទិនា ភន្តេ អាការេន ភគវតា គមិកានំ ភិក្ខូនំ វត្តំ បញ្ញត្តំ.

បុច្ឆា – ភត្តគ្គេ អាវុសោ អនុមោទិតុំ ភគវតា កត្ថ អនុញ្ញាតំ, កំ អារព្ភ កិស្មិំ វត្ថុស្មិំ អនុញ្ញាតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អនុញ្ញាតំ, សម្ពហុលា ភន្តេ ភិក្ខូ ភត្តគ្គេ នានុមោទិំសុ, តស្មិំ ភន្តេ វត្ថុស្មិំ អនុញ្ញាតំ.

បុច្ឆា – ភិក្ខូនំ អាវុសោ ភត្តគ្គវត្តំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ទុន្និវត្ថា ទុប្បារុតា អនាកប្បសម្បន្នា ភត្តគ្គំ គច្ឆិំសុ, តស្មិំ ភន្តេ វត្ថុស្មិំ ‘‘សចេ អារាមេ កាលោ អារោចិតោ ហោតិ, តិមណ្ឌលំ បដិច្ឆាទេន្តេន បរិមណ្ឌលំ និវាសេត្វា កាយពន្ធនំ ពន្ធិត្វា សគុណំ កត្វា សង្ឃាដិយោ បារុបិត្វា គណ្ឋិកំ បដិមុញ្ចិត្វា ធោវិត្វា បត្តំ គហេត្វា សាធុកំ អតរមានេន គាមោ បវិសិតព្ពោ’’តិ ឯវមាទិនា ភន្តេ ភត្តគ្គវត្តំ បញ្ញត្តំ.

បុច្ឆា – ភិក្ខូនំ អាវុសោ សេនាសនវត្តំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ, កថញ្ច តំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ភិក្ខូសុ អជ្ឈោកាសេ ចីវរំ ករោន្តេសុ បដិវាតេ អង្គណេ សេនាសនំ បប្ផោដេសុំ, តស្មិំ ភន្តេ វត្ថុស្មិំ ‘‘យស្មិំ វិហារេ វិហរតិ, សចេ សោ វិហារោ ឧក្លាបោ ហោតិ, សចេ ឧស្សហតិ សោធេតព្ពោ’’តិ ឯវមាទិនា ភន្តេ ភិក្ខូនំ សេនាសនវត្តំ ភគវតា បញ្ញត្តំ.

បុច្ឆា – សមាចារំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – សមាចារំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ ឯកា អាបត្តិ.