៧. សង្ឃតេទកក្ខន្ធក

បុច្ឆា – កថំ អាវុសោ ឆន្នំ សក្យកុមារានំ សហ ឧបាលិកប្បកេន បព្ពជ្ជា អហោសិ, កថញ្ច នេសំ វិសេសោ ឧទបាទិ.

វិស្សជ្ជនា – ភគវា ភន្តេ ឧបាលិំ កប្បកំ បឋមំ បព្ពាជេសិ, បច្ឆា តេ សក្យកុមារេ, អថ ភន្តេ អាយស្មា ភទ្ទិយោ តេនេវ អន្តរវស្សេន តិស្សោ វិជ្ជា សច្ឆាកាសិ, អាយស្មា អនុរុទ្ធោ ទិព្ពចក្ខុំ ឧប្បាទេសិ, អាយស្មា អានន្ទោ សោតាបត្តិផលំ សច្ឆាកាសិ, ទេវទត្តោ បោថុជ្ជនិកំ ឥទ្ធិំ អភិនិប្ផាទេសិ. ឯវំ ខោ ភន្តេ ឆន្នំ សក្យកុមារានំ ឧបាលិកប្បកេន សហ បព្ពជ្ជា អហោសិ, ឯវញ្ច បន ភន្តេ តេសំ វិសេសាធិគមោ អហោសិ.

បកាសនីយ

បុច្ឆា – បកាសនីយកម្មំ អាវុសោ កាតុំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ទេវទត្តំ អារព្ភ បញ្ញត្តំ, ទេវទត្តោ ភន្តេ ‘‘សរាជិកាយ មំ ភគវា បរិសាយ ខេឡាសកវាទេន អបសាទេតិ, សារិបុត្តមោគ្គល្លានេវ ឧក្កំសតី’’តិ កុបិតោ អនត្តមនោ ភគវតិ អាឃាតំ ពន្ធិ, តស្មិំ ភន្តេ វត្ថុស្មិំ បញ្ញត្តំ.

បកាសនីយ

បុច្ឆា – ទេវទត្តស្ស អាវុសោ បកាសនីយកម្មំ ការាបេត្វា កថំ ភគវា បកាសេតុំ អាណាបេសិ.

វិស្សជ្ជនា – ភគវា ភន្តេ ទេវទត្តស្ស បកាសនីយកម្មំ កាតុំ បញ្ញបេត្វា អាយស្មន្តំ សារិបុត្តំ អាមន្តេសិ ‘‘តេន ហិ ត្វំ សារិបុត្ត ទេវទត្តំ រាជគហេ បកាសេហី’’តិ, ឯវំ ខោ ភន្តេ ទេវទត្តស្ស បកាសនីយកម្មំ កត្វា ទេវទត្តំ រាជគហេ បកាសេតុំ ភគវា អាណាបេសិ.

ទេវទត្ត

បុច្ឆា – កថំ អាវុសោ ទេវទត្តេន ទុដ្ឋចិត្តេន វធកចិត្តេន តថា គតស្ស រុហិរំ ឧប្បាទេត្វា បឋមំ អានន្តរិយំ កម្មំ ឧបចិតំ.

វិស្សជ្ជនា – ភគវា ភន្តេ គិជ្ឈកូដស្ស បព្ពតស្ស ឆាយាយំ ចង្កមិ, អថ ភន្តេ ទេវទត្តោ គិជ្ឈកូដំ បព្ពតំ អារុហិត្វា មហតិំ សិលំ បវិជ្ឈិ ‘‘ឥមាយ សមណំ គោតមំ ជីវិតា វោរោបេស្សាមី’’តិ, អថ ខោ ភន្តេ ទ្វេ បព្ពតកូដានិ សមាគន្ត្វា តំ សិលំ សម្បដិច្ឆិំសុ, តតោ បបតិកា ឧប្បតិត្វា ភគវតោ បាទេ រុហិរំ ឧប្បាទេសិ. ឯវំ ខោ ភន្តេ ទេវទត្តេន ទុដ្ឋេន វធកចិត្តេន តថាគតស្ស រុហិរំ ឧប្បាទេត្វា បឋមំ អានន្តរិយកម្មំ ឧបចិតំ.

បុច្ឆា – កុលេសុ អាវុសោ តិកភោជនំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ ទេវទត្តំ អារព្ភ បញ្ញត្តំ, ទេវទត្តោ ភន្តេ បរិហីនលាភសក្ការោ សបរិសោ កុលេសុ វិញ្ញាបេត្វា វិញ្ញាបេត្វា ភុញ្ជិ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អលំ ទេវទត្ត, មា តេ រុច្ចិ សង្ឃភេទោ, គរុកោ ខោ ទេវទត្ត សង្ឃភេទោតិអាទិកោ អាវុសោ ឱវាទោ ភគវតា កត្ថ ទិន្នោ, កិស្មិំ វត្ថុស្មិំ ទិន្នោ.

វិស្សជ្ជនា – រាជគហេ ភន្តេ ទេវទត្តំ អារព្ភ ទិន្នោ, ទេវទត្តោ ភន្តេ សង្ឃភេទាយ បរក្កមិ ចក្កភេទាយ, តស្មិំ ភន្តេ វត្ថុស្មិំ ទិន្នោ.

អលំ ទេវទត្ត, មា តេ រុច្ចិ សង្ឃភេទោ, គរុកោ ខោ ទេវទត្ត សង្ឃភេទោ –

បុច្ឆា – ‘‘សុករំ សាធុនា សាធុំ, សាធុំ បាបេន ទុក្ករំ. បាបំ បាបេន សុករំ, បាបមរិយេហិ ទុក្ករ’’ន្តិ- អាវុសោ ឥទំ ឧទានំ ភគវតា កត្ថ ឧទានិតំ, កំ អារព្ភ កិស្មិំ វត្ថុស្មិំ ឧទានិតំ.

វិស្សជ្ជនា – រាជគហេ ភន្តេ ទេវទត្តំយេវ អារព្ភ ឧទានិតំ, អាយស្មា ភន្តេ អានន្ទោ បុព្ពណ្ហសមយំ និវាសេត្វា បត្តចីវរមាទាយ រាជគហំ បិណ្ឌាយ បាវិសិ, អថ ខោ ភន្តេ ទេវទត្តោ យេនាយស្មា អានន្ទោ តេនុបសង្កមិ, ឧបសង្កមិត្វា អាយស្មន្តំ អានន្ទំ ឯតទវោច ‘‘អជ្ជតគ្គេ ទានាហំ អាវុសោ អានន្ទ អញ្ញត្រេវ ភគវតា អញ្ញត្រេវ ភិក្ខុសង្ឃា ឧបោសថំ ករិស្សាមិ សង្ឃកម្មំ ករិស្សាមី’’តិ, តស្មិំ ភន្តេ វត្ថុស្មិំ ឧទានិតំ.

សុករំ សាធុនា សាធុំ, សាធុំ បាបេន ទុក្ករំ;

បាបំ បាបេន សុករំ, បាបមរិយេហិ ទុក្ករំ.

បុច្ឆា – ភេទានុវត្តកានំ អាវុសោ ភិក្ខូនំ ថុល្លច្ចយំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ បញ្ញត្តំ, អាយស្មា ភន្តេ សារិបុត្តោ ភគវន្តំ ឧបសង្កមិត្វា ឯតទវោច ‘‘សាធុ ភន្តេ ភេទានុវត្តកា ភិក្ខូ បុន ឧបសម្បជ្ជេយ្យុ’’ន្តិ, តស្មិំ ភន្តេ វត្ថុស្មិំ បញ្ញត្តំ.

‘‘សាធុ ភន្តេ ភេទានុវត្តកា ភិក្ខូ បុន ឧបសម្បជ្ជេយ្យុ’’ន្តិ –

បុច្ឆា – កិត្តាវតា នុ ខោ អាវុសោ សង្ឃរាជិ ហោតិ នោ ច សង្ឃភេទោ, កិត្តាវតា ច បន សង្ឃរាជិ ចេវ ហោតិ សង្ឃភេទោ ច.

វិស្សជ្ជនា – ឯកតោ ភន្តេ ឯកោ ហោតិ, ឯកតោ ទ្វេ ចតុត្ថោ អនុស្សាវេតិ, សលាកំ គាហេតិ ‘‘អយំ ធម្មោ អយំ វិនយោ ឥទំ សត្ថុសាសនំ ឥមំ គណ្ហថ ឥមំ រោចេថាតិ’’, ឯតេនេវ ភន្តេ នយេន ចតុន្នំ វា បញ្ចន្នំ វា ឆន្នំ វា សត្តន្នំ វា អដ្ឋន្នំ វា សង្ឃរាជិ ហោតិ, នោ ច សង្ឃភេទោ, ឯកតោ ភន្តេ ចត្តារោ ហោន្តិ, ឯកតោ ចត្តារោ, នវមោ អនុស្សាវេតិ, សលាកំ គាហេតិ ‘‘អយំ ធម្មោ អយំ វិនយោ ឥទំ សត្ថុសាសនំ ឥមំ គណ្ហថ ឥមំ រោចេថា’’តិ, ឯវំ ខោ ភន្តេ សង្ឃរាជិ ចេវ ហោតិ សង្ឃភេទោ ច. ឯវំ ខោ ភន្តេ សង្ឃរាជិ ហោតិ, នោ ច សង្ឃភេទោ, ឯវញ្ច បន ភន្តេ សង្ឃរាជិ ចេវ ហោតិ សង្ឃភេទោ ច.

បុច្ឆា – កិត្តាវតា នុ ខោ អាវុសោ សង្ឃោ ភិន្នោ ហោតិ.

វិស្សជ្ជនា – ឥធ ភន្តេ ភិក្ខូ អធម្មាទិំ ធម្មាទីនីតិ ទីបេន្តិ, តេ ឥមេហិ អដ្ឋារសហិ វត្ថូហិ អបកស្សន្តិ, អវបកស្សន្តិ, អាវេនិំ ឧបោសថំ ករោន្តិ, អាវេនិំ បវារណំ ករោន្តិ, អាវេនិំ សង្ឃកម្មំ ករោន្តិ, ឯវំ ខោ ភន្តេ សង្ឃោ ភិន្នោ ហោតិ.

បុច្ឆា – កិត្តាវតា នុ ខោ អាវុសោ សង្ឃោ សមគ្គោ ហោតិ.

វិស្សជ្ជនា – ឥធ ភន្តេ ភិក្ខូ អធម្មំ អធម្មោតិ ទីបេន្តិ, ធម្មំ ធម្មោតិ ទីបេន្តិ, អវិនយំ អវិនយោតិ ទីបេន្តិ…បេ… ទុដ្ឋុល្លំ អាបត្តិំ ទុដ្ឋុល្លា អាបត្តីតិ ទីបេន្តិ, អទុដ្ឋុល្លំ អាបត្តិំ អទុដ្ឋុល្លា អាបត្តីតិ ទីបេន្តិ, តេ ឥមេហិ អដ្ឋារសហិ វត្ថូហិ ន អបកស្សន្តិ, ន អវបកស្សន្តិ, ន អាវេនិំ ឧបោសថំ ករោន្តិ, ន អាវេនិំ បវារណំ ករោន្តិ, ន អាវេនិំ សង្ឃកម្មំ ករោន្តិ, ឯត្តាវតា ខោ ភន្តេ សង្ឃោ សមគ្គោ ហោតិ.

បុច្ឆា – សមគ្គំ អាវុសោ សង្ឃំ ភិន្ទិត្វា កិំ សោ បសវតិ.

វិស្សជ្ជនា – សមគ្គំ ខោ ភន្តេ សង្ឃំ ភិន្ទិត្វា កប្បដ្ឋិតិកំ កិព្ពិសំ បសវតិ, កប្បំ និរយម្ហិ បច្ចតិ.

បុច្ឆា – ភិន្នំ ខោ អាវុសោ សង្ឃំ សមគ្គំ កត្វា កិំ សោ បសវតិ.

វិស្សជ្ជនា – ភិន្នំ ខោ ភន្តេ សង្ឃំ សមគ្គំ កត្វា ព្រហ្មំ បុញ្ញំ បសវតិ, កប្បំ សគ្គម្ហិ មោទតិ.

បុច្ឆា – សង្ឃភេទំ បុច្ឆិស្សំ, សនិទានំ សនិទ្ទេសំ. សមុក្កដ្ឋបទានំ អាវុសោ កតិ អាបត្តិយោ.

វិស្សជ្ជនា – សង្ឃភេទំ វិស្សជ្ជិស្សំ, សនិទានំ សនិទ្ទេសំ. សមុក្កដ្ឋបទានំ ភន្តេ ទ្វេ អាបត្តិយោ.